Ha a Thetsa Seaparo sa Jesu oa Fola

Taba ea hore Jesu o khutlile ho tsoa Dekapolise e tsebahala ho Bajuda ba lulang lebopong le ka leboea-bophirimela ho Leoatle la Galilea. Mohlomong ba bang ba se ba utloetse hore Jesu o ile a kokobetsa sefefo leoatleng, ’me ho ka etsahala hore ebe ba bang ba utloile le hore o ile a phekola banna ba neng ba kenoe ke bademona. Kahoo “bongata bo boholo” bo bokana haufi le leoatle, mohlomong Kapernauma, e le ho mo amohela. (Mareka 5:​21) Ha a theoha sekepe, batho ba bonahala ba tatetse ho kopana le eena.

E mong oa batho ba labalabelang ho kopana le Jesu ke molaoli ea okamelang oa synagoge, mohlomong e Kapernauma, ea bitsoang Jairuse. O itihela maotong a Jesu ’me o mo kopa ka ho phehella o re: “Moralinyana oa ka o boemong bo bobe ka ho fetisisa. Na ka kopo u ka tla ’me ua mo beha matsoho e le hore a ka fola ’me a phela.” (Mareka 5:​23) Ebe Jesu o tla araba Jairuse joang ha a mo kopa hore a phekole moralinyana oa hae ea lilemo li 12?​—Luka 8:42.

Ha a le tseleng e eang ha Jairuse, ho etsahala ntho e ’ngoe e amang maikutlo. Ho na le batho ba bangata ba tsamaeang le Jesu ba ntseng ba ipotsa hore na ba tla hle ba bone ha Jesu a etsa mohlolo o mong. Leha ho le joalo, mosali e mong har’a letšoele lena o amehile ka ntho e fapaneng. O amehile ka bokuli ba hae bo otlang pelo.

Mosali enoa oa Mojuda o se a kutse ka lilemo tse 12 a jeoa ke phallo ea mali e sa eeng moriting. O qetile chelete eohle ea hae a matha lingakeng. Leha ho le joalo, a iphumane a hamela letanteng. Ho e-na le hore a fole, bokuli ba hae bo ile ba tota.​—Mareka 5:26.

Nahana feela! Ha se feela hore bokuli bona boa mo fokolisa empa bo boetse boa mo soabisa. Bokuli bo kang bona hase boo motho a ka ratang hore a ’ne a bue ka bona bathong. Ho feta moo, Molao oa Moshe o re mosali ea nang le phallo ea mali ha aa hloeka. Motho leha e le ofe ea mo thetsang kapa ea tšoarang seaparo sa hae se mali, o lokela ho itlhatsoa ’me o tla nkoa a sa hloeka ho fihlela ka shoalane.​—Levitike 15:​25-27.

Mosali enoa o ile a “utloa lintho tse mabapi le Jesu,” kahoo o batla ho kopana le eena. Kaha ha aa hloeka, o phunyeletsa har’a letšoele a patile mohoasa a ntse a ipolella a re: “Haeba nka ama liaparo tsa hae tsa ka ntle feela ke tla fola.” Qetellong o atleha ho tšoara qola ea seaparo sa Jesu ’me hang hang oa utloa hore mali a hae a khaolitse ho phalla. O “folisitsoe boloetse bo bohloko.”​—Mareka 5:​27-29.

Joale Jesu o re: “Ke mang ea nkamileng?” U nahana hore mosali eo u ikutloa joang ha a utloa Jesu a cho joalo? Petrose o khalemela Jesu ka tsela e sa tobang o re: “Morupeli, bongata bo u pota-potile ’me bo u petelitse.” Joale ke hobane’ng ha a botsa hore na ke mang ea mo thetsitseng? Jesu o re: “Ho na le ea nkamileng, etsoe ke lemohile hore matla a tsoile ho ’na.”​—Luka 8:​45, 46.

Ha mosali enoa a elelloa hore ha a na sekoti sa ho ipata, o itihela fatše ka pel’a Jesu a thothomela ke letsoalo. O bua ’nete pontšeng ea bohle ’me o bolella Jesu hore o ne a kula empa joale o folile. Ka mosa Jesu o re ho eena: “Morali, tumelo ea hao e u folisitse. Tsamaea ka khotso, ’me u fole boloetseng ba hao bo bohloko.”​—Mareka 5:34.

Ho hlakile hore Morena eo Molimo a mo khethileng hore a buse lefatše ke motho ea atamelehang, ea mosa le ea tsotellang. O boetse o na le matla a ho thusa batho.