Ke Hobane’ng ha Molimo a Lumella ho Utloa Bohloko?

KA LINAKO tse ling ha motho a botsa potso e reng “Hobane’ng?” o batla matšeliso ebile o batla likarabo hobane haeba potso eo e qhololitsoe ke hobane motho a lahlehetsoe haholo, o hlile o hloka matšeliso e le kannete. Na Bibele e fana ka matšeliso a joalo? Nahana ka linnete tse tharo tsa bohlokoa tse fumanoang ka Bibeleng mabapi le taba ena.

Ea pele, hase phoso ho botsa hore na ke hobane’ng ha Molimo a lumella ho utloa bohloko. Batho ba bang ba tšoha hore ha ba botsa potso eo ekare ha ba na tumelo ho Molimo kapa ha ba mo hlomphe. Ho e-na le hoo, haeba u botsa potso ena ka botšepehi, u e mong oa batho ba tšepahalang ba ’nileng ba e botsa. Moprofeta Habakuke ea tšepahalang o ile a botsa Molimo tjena: “U etsetsa’ng hore ke bone mahlomola, ke bone tšenyeho, le likhōka ke li bone? Kahohle ke lintoa le litsekisano feela.” (Habakuke 1:3, Bibele—Phetolelo e Ncha) Jehova Molimo ha aa ka a khalemela Habakuke. Ho e-na le hoo, o ile a etsa hore lipotso tsa monna eo ea tšepahalang li ngoloe e le hore kaofela ha rōna re li bale.—Baroma 15:4.

Ea bobeli, ke habohlokoa ho utloisisa hore Molimo o u utloela bohloko mahlomoleng a hao. Hase ea itšehlang thajana le ea sa tsejoeng; o “rata toka” ’me o hloile bokhopo hammoho le mahlomola ao bo a bakang. (Pesaleme ea 37:28; Liproverbia 6:16-19) Khale koana mehleng ea Noe, “pelo ea [Molimo e ile] ea utloa bohloko” ka lebaka la mabifi a neng a ntse a e-ja setsi lefatšeng. (Genese 6:5, 6) Molimo ha a e-s’o fetohe; o ntse a ikutloa ka tsela e tšoanang ka se etsahalang kajeno.—Malakia 3:6.

Ea boraro, ha ho mohla Molimo a bakang bokhopo. Bibele e hlakisa taba ena hantle. Ba reng Molimo ke eena ea bakang lintho tse kang lipolao le bokhukhuni ba mo senya lebitso. Hlokomela se boleloang ke Jobo 34:10 ha e re: “Ho ke ho be hōle le Molimo oa ’nete hore a sebetse bokhopo, le hore Ea Matla ’Ohle a sebetse ka mokhoa o hlokang toka!” Ka tsela e tšoanang, Jakobo 1:13 e re: “Ha a le tlas’a teko, ho se ke ha e-ba le ea reng: ‘Ke ntse ke lekoa ke Molimo.’ Etsoe Molimo a ke ke a lekoa ka lintho tse mpe kapa hona hore o leka leha e le mang ka tsona.” Ka lebaka leo, haeba u utloisitsoe bohloko ke bobe, kholiseha hore Molimo hase eena sesosa sa bobe boo.

Ke Mang ea Busang Lefatše?

Ho sa tsotellehe se boletsoeng ka holimo, re ntse re sala re ipotsa potso ena, Haeba Molimo o lerato, o na le toka ebile o na le matla, ke hobane’ng ha re pota-potiloe ke bobe? Ho na le maikutlo a tloaelehileng empa e le a fosahetseng a lokelang ho lokisoa pele. Batho ba bangata ba nahana hore Molimo ea Matla ’Ohle ke eena ’musi oa lefatše lena, ea laolang ntho e ’ngoe le e ’ngoe ka ho toba. Mopresidente oa seminari e ’ngoe ea thuto ea bolumeli o ile a re: “Ha ho na athomo kapa molek’hule le o mong o teng bokahohleng o seng tlas’a puso ea hae.” Na Bibele e hlile e ruta seo?

Ha ho joalo. Ba bangata baa makala ha ba ithuta hore na Bibele e hlile e re ke mang ea busang lefatše. Ho tea mohlala, 1 Johanne 5:19 e re: “Lefatše lohle le rapaletse matleng a ea khopo.” Ea khopo eo ke mang? Jesu Kreste o ile a re ke Satane Diabolose, eo a itseng ke “’musi oa lefatše.” (Johanne 14:30) Joale, na see hase ntho e utloahalang? Satane o khopo, ke lemenemene ebile o lonya—e leng lintho tseo e leng sesosa sa mahlomola a makana-kana ao batho ba fetang tlas’a ’ona. Empa ke hobane’ng ha Molimo a lumella Satane ho busa?

Tseko e Hlahisitsoeng Edene

Motsoali ea lerato le ea bileng a nang le bokhoni o ne a tla ikutloa joang haeba a ne a ka qosoa phatlalatsa ka hore o thetsa bana ba hae, o sebelisa matla a hae hampe holim’a bona le hore o ba thibela ho fumana lintho tse molemo? Na o ne a tla shanofatsa mashano ao a mo senyang lebitso ka ho loantša ea mo qosang? Ho totobetse hore o ne a ke ke a etsa joalo. Ha e le hantle, haeba a ne a ka etsa joalo, o ne a tla etsa hore batho ba lumele hore liqoso tseo ke ’nete.

Papiso ena e re thusa ho utloisisa tsela eo ka eona Jehova Molimo a ileng a sebetsana le seo a ileng a qosoa ka sona qalong feela ea pale ea moloko oa batho sebakeng se bitsoang Edene. Moo, Molimo o ile a bolella batho ba babeli ba pele, e leng Adama le Eva, morero oa hae o babatsehang bakeng sa bana ba hae ba lefatšeng. Ba ne ba lokela ho tlala lefatše, ba le buse ’me ba le fetole paradeise ea lefatše lohle. (Genese 1:28) Ho feta moo, bara ba Molimo ba moea ba limilione tse makholo ba ne ba e-na le tjantjello e khōlō morerong ona o thabisang.—Jobo 38:4, 7; Daniele 7:10.

Kaha ke Molimo ea seatla se bulehileng, Jehova o ile a fa Adama le Eva lehae la serapa se setle se nang le litholoana tsohle tse monate. Ke sefate se le seng too! seo ba neng ba sa lokela ho se ama—“sefate sa tsebo ea botle le bobe.” Ka hore ba se ke ba ja tsa sefate sena, Adama le Eva ba ne ba tla bontša hore ba tšepa Ntate oa bona ka botlalo, ba hlokomela hore o na le tokelo ea ho etsa qeto ka se nepahetseng le se fosahetseng bakeng sa bana ba hae.—Genese 2:16, 17.

Leha ho le joalo, ka masoabi e mong oa bara ba Molimo ba moea, ea neng a susumelitsoe ke takatso ea hore a rapeloe, o ile a bolella Eva hore haeba a ka ja tholoana e hanetsoeng, o ne a ke ke a shoa. (Genese 2:17; 3:1-5) Ka tsela ena, lengeloi lena le khopo, e leng Satane, ka nyeliso le ile la hanyetsa Molimo, ha e le hantle, la mo bitsa raleshano! Satane o ile a boela a qosa Molimo ka hore o patetse Adama le Eva ntho ea bohlokoa eo ba neng ba lokela ho e tseba. Satane o ile a fana ka maikutlo a hore batho ba lokela ho iketsetsa qeto ea hore na ke sefe se nepahetseng le hore na ke sefe se fosahetseng. Ka mantsoe a mang, Satane o ile a qosa Molimo ka hore ha a tšoanelehe ho ba ’Musi le ho ba Ntate, ’me sena se ne se bolela hore ke eena Satane ea ka tšoanelehang ho ba ’Musi le ho ba Ntate.

Ka lebaka la mashano ana a lonya le a bolotsana, lengeloi lena le ile la iphetola Satane Diabolose. Mabitso ana a bolela “Mohanyetsi” le “Moetselletsi.” Adama le Eva ba ile ba etsa’ng? Ba ile ba tšehetsa Satane, eaba ba furalla Molimo.—Genese 3:6.

Jehova a ka be a ile a timetsa marabele ana ka ho panya ha leihlo. Empa, joalokaha ho boletsoe papisong ea rōna, litseko tse joalo li ne li ke ke tsa rarolloa ka ho iphetetsa ka mabifi. Hape hopola hore ha Satane a ne a phephetsa Molimo, mangeloi a limilione a ne a mametse. Ha e le hantle, hamorao palo e khōlō empa eo re sa e tsebeng, e ile ea ikopanya le Satane bofetoheling, ea iketsa bademona.—Mareka 1:34; 2 Petrose 2:4; Juda 6.

Ke Hobane’ng ha Molimo a E-s’o Kenelle?

Ka ho eka Adama le Eva hore ba batle ho ipusa ho fapana le ho busoa ke ’Mōpi oa bona, ha e le hantle Satane o ile a theha lelapa le neng le hlile le sa ipuse le mpang le bile tlas’a bolaoli ba hae. Ebang le ne le tseba kapa le sa tsebe hore le susumelitsoe ke “ntat’a” lona Diabolose, lelapa lena le ne le tla ikhethela hore na le batla ho etsa eng bophelong le hore na ke sefe se nepahetseng le se fosahetseng. (Johanne 8:44) Empa na tsela eo ea bophelo e ne e tla le fa tokoloho ea ’nete le thabo e sa feleng? Jehova o ne a tseba hantle hore e ke ke. Leha ho le joalo, o ile a lumella marabele ana hore a latele tsela eo ea ’ona ea ho itaola, hobane ena e ne e le eona feela tsela ea hore litseko tse hlahisitsoeng Edene li rarolloe ’me li rarolleloe ruri.

Joale ho se ho fetile lilemo tse ka holimo ho 6 000, moloko oa batho o hahile tsamaiso ea lintho lefatšeng lohle, o lekile puso ea mefuta-futa le melao ea boitšoaro ea mefuta-futa. Na u khotsofetse ke litholoana tsa eona? Na lelapa la motho le hlile le thabile, le khotsong ’me le momahane? Ho totobetse hore karabo ke che! Ho e-na le hoo, lintoa, litlala, likoluoa tsa tlhaho, ho kula le lefu li aparetse moloko oa batho, e leng ho bakang “lefeela,” ‘bohloko’ le ho ‘bobola’ feela joalokaha Bibele e bolela.—Baroma 8:19-22; Moeklesia 8:9.

Ho ntse ho le joalo, ba bang ba ka ’na ba botsa: ‘Ke hobane’ng ha Molimo a sa thibela litlokotsi?’ ’Nete ke hore seo e ne e tla be e le ho hloka toka, ’me se ne se tla etsa hore ho be le pherekano tsekong ena, ka hore se ne se tla fana ka maikutlo a hore motho a ka fetohela Molimo empa a se ke a hlaheloa ke letho. Ke ka lebaka leo Jehova a sa kang a sebetsa ka sekhukhu ho thibela litlokotsi le litlōlo tsa molao tsohle tseo ka tsela e tobileng kapa e sa tobang li bakoang ke ho se mamele Molimo.a Le ka mohla Jehova o ne a ke ke a tšehetsa leshano le kotsi la hore tsamaiso ea Satane e ka atleha, le la hore e fumane mohloli oa thabo! Leha ho le joalo, Jehova ha aa iphapanyetsa se etsahalang. Ha e le hantle, joalokaha re tla bona hona joale, o ne a ntse a sa lula feela.

“Ntate o ’Nile a Tsoela Pele ho Sebetsa”

Mantsoe ao a Jesu a bontša hore Molimo ha aa lula a sa etse letho, a shebeletse feela ha lintho li etsahala. (Johanne 5:17) Ho e-na le hoo, ho tloha ha bofetoheli bo etsahala Edene, esale a tšoere ka thata. Ho etsa mohlala, o ile a susumelletsa bangoli ba Bibele ho tlaleha tšepiso ea hae ea hore “peō” e tlang e ne e tla silakanya Satane le bohle ba imatahantseng le eena. (Genese 3:15) Ho phaella moo, a sebelisa Peō ena, Molimo o ne a tla theha puso, e leng ’Muso oa leholimo o neng o tla hlohonolofatsa batho ba mamelang ’me o felise lintho tsohle tse bakang bohloko esita le lona lefu.—Genese 22:18; Pesaleme ea 46:9; 72:16; Esaia 25:8; 33:24; Daniele 7:13, 14.

E le hore a phethahatse litšepiso tseo tse babatsehang, Jehova o ile a romela lefatšeng Eo e neng e tla ba ’Musi ea ka sehloohong oa ’Muso oo. Enoa e ne e le Jesu Kreste, Mora oa Molimo. (Bagalata 3:16) Tumellanong le morero oa Molimo ka eena, Jesu o ne a ruta haholo-holo ka ’Muso oa Molimo. (Luka 4:43) Ha e le hantle, ka liketso tsa hae Kreste o ile a bontša hore na ha e se e le Morena oa ’Muso oo ke lintho life tseo a tla li etsa. O ile a fepa ba lapileng ba likete, a folisa ba kulang, a tsosa bafu a ba a bonahatsa matla a hae holim’a lihloliloeng ka hore a khutsise sefefo se matla. (Matheu 14:14-21; Mareka 4:37-39; Johanne 11:43, 44) Ha e bua ka Jesu, Bibele e re: “Ho sa tsotellehe hore na litšepiso tsa Molimo li ngata hakae, li fetohile E, ka eena.”—2 Bakorinthe 1:20.

Ba mamelang Jesu ka hore ba tsoe “lefatšeng”—e leng tsamaiso ea lintho e ikarotseng ho Molimo, e busoang ke Satane—ba amoheloa lelapeng la Jehova. (Johanne 15:19) Lelapa lena la lefatšeng lohle la Bakreste ba ’nete le laoloa ke lerato, le phehella khotso ’me le tsejoa ka ho ikemisetsa ho tlosa le mosaletsa feela oa leeme esita le khethollo ea merabe har’a lona.—Malakia 3:17, 18; Johanne 13:34, 35.

Ho e-na le ho tšehetsa lefatše la hona joale, Bakreste ba ’nete ba tšehetsa ’Muso oa Molimo ebile baa o phatlalatsa, kaha ba mamela taelo ea Jesu e tlalehiloeng ho Matheu 24:14. Nahana ka sena: Ke bo-mang ba bolelang “litaba tsena tse molemo tsa ’muso” lefatšeng lohle? Ke bo-mang bao e le lelapa la moea la lefatše lohle ba ileng ba hana ho kenella lintoeng le liqhoebeshanong tse bakang likarohano tsa lichaba le merabe? Ke bo-mang ba lumeletseng Lentsoe la Molimo hore le tataise boitšoaro ba bona, ho sa tsotellehe hore na batho ba rata melao-motheo ea lona e phahameng kapa che? (1 Johanne 5:3) Ba bangata ba hlokometse hore tsena li etsoa ke Lipaki Tsa Jehova. Ak’u itlhahlobele bopaki.

Etsa Qeto ea ho Tšehetsa Puso ea Molimo!

Moloko oa batho, o ikarotseng ho Molimo o khelositsoeng ke Satane, o hahile tsamaiso ea lefatše e ntseng e tsoela pele ho baka masisa-pelo le ho felloa ke tšepo. Esita le lefatše ka bolona le ntse le senyeha! Ka lehlakoreng le leng, Jehova o thehile ’muso oa leholimo o fetotseng bophelo ba batho ba limilione hore bo ntlafale o bileng o fileng e mong le e mong oa bona tšepo ea sebele. (1 Timothea 4:10) U tla khetha hofe?

Hona joale ke nako ea ho etsa qeto, hobane Molimo a ke ke a lumella Satane le lefatše la hae le khopo ho tsoela pele ka ho sa feleng. Morero oa Molimo oa qalong, oa ho etsa lefatše lena paradeise ha o e-s’o fetohe. Ka lebaka leo, ’Muso oa hae le batšehetsi ba oona ba tla atleha haholo, athe lefatše le tlas’a taolo ea Satane lona le tla ba ‘bohlokong ba mahlomola’ ho fihlela ha Molimo a le felisa. (Matheu 24:3, 7, 8) Joale, haeba ka botšepehi u ile ua hoeletsa ho Molimo ua re “Hobane’ng?,” mo mamele ka hore u nke ka ho teba molaetsa oa Bibele o fanang ka matšeliso le tšepo. Esita le hona joale, meokho ea hao e bakoang ke ho sareloa e ka fetoha meokho ea thabo.—Matheu 5:4; Tšenolo 21:3, 4.

[Mongolo o botlaaseng ba leqephe]

[Litšoantšo tse leqepheng la 7]

Na u khotsofalitsoe ke litholoana tsa puso ea motho?

[Litlhaloso Tsa Moo Litšoantšo li Nkiloeng Teng]

Baby: © J. B. Russell/Panos Pictures; crying woman: © Paul Lowe/Panos Pictures

[Setšoantšo se leqepheng la 8, 9]

Jesu o tla tsosolosa Paradeise—a be a tsose bafu