Bokreste ba ’Nete Boa Hlōla!
“Ka tsela e matla lentsoe la Jehova la ’na la hōla le ho hlōla.”—LIKETSO 19:20.
1. Hlalosa kamoo Bokreste bo ileng ba hōla kateng lekholong la pele la lilemo.
BAKRESTE ba pele ba ne ba bolela lentsoe la Molimo ka cheseho e neng e ke ke ea tapisoa kahobane ba ne ba susumetsoa ke matla a moea o halalelang. Rahistori e mong o ile a ngola, a re: “Bokreste bo ne bo atile ka potlako e hlollang lefatšeng la Roma. Ka selemo sa 100, hoo e ka bang profinse e ’ngoe le e ’ngoe e sikileng le Mediterranean e ne e e-na le baahi ba Bakreste ho eona.”
2. Satane o ile a leka joang ho sitisa litaba tse molemo, ’me see se ne se boletsoe esale pele joang?
2 Satane Diabolose o ne a ke ke a khutsisa Bakreste ba pele. Bakeng sa hoo, o ile a sebelisa bokoenehi e le mokhoa o mong oa hore a sitise matla a litaba tse molemo. Setšoantšong sa Jesu sa koro le mofoka, o ne a boletse esale pele hore bo tla hlaha. (Matheu 13:24-30, 36-43) Moapostola Petrose le eena o ne a lemositse hore ho tla hlaha mesuoe ea bohata ka phuthehong, e neng e tla kenya lihlopha tse senyang tsa bolumeli ba bokhelohi. (2 Petrose 2:1-3) Ka ho tšoanang, moapostola Pauluse o ne a lemositse ka ho khethehileng hore bokoenehi bo ne bo tla tla pele ho letsatsi la Jehova.—2 Bathesalonika 2:1-3.
3. Ho ile ha etsahala’ng ka mor’a lefu la baapostola?
3 Ka mor’a lefu la baapostola, litaba tse molemo li ile tsa pupetsoa ke lithuto le lifilosofi tsa bohetene. Joalokaha ho ne ho boletsoe esale pele, mesuoe ea bohata e ile ea sotha le ho silafatsa molaetsa o hloekileng oa ’nete. Butle-butle, Bokreste ba ’nete bo ile ba pupetsoa ke Bokreste-mōtoana. Ho ile ha hlaha sehlopha sa baruti se ileng sa leka ho thibela batho feela ho ba l e Bibele. Le hoja palo ea ba neng ba ipolela hore ke Bakreste e ile ea eketseha, borapeli ba bona bo ne bo sa hloeka. Palo ea linaha tsa Bokreste-’mōtoana e ile ea hōla ’me bo ile ba fetoha mokhatlo o matla le o nang le tšusumetso linaheng tse sekametseng Bophirimela, empa bo ne bo se na tlhohonolofatso ea Molimo kapa moea oa hae.
4. Ke hobane’ng ha morero oa Satane oa ho nyopisa morero oa Molimo o sa ka oa atleha?
4 Leha ho le joalo, leqheka la Satane la ho nyopisa morero oa Jehova le ne le tla hlōleha. Esita le linakong tse mpe ka ho fetisisa tsa bokoenehi, Bokreste ba ’nete bo ne bo ntse bo phela ho ba bang. Banna ba neng ba kopitsa Bibele ba ne ba le hlokolosi hore ba etse joalo ka nepo. Kahoo, Bibele ka boeona e ile ea lula e sa fetoha, le hoja batho ba bangata ba neng ba bolela hore ba na le tokelo ea ho e ruta ba ile ba sotha molaetsa oa eona. Ho theosa le makholo a lilemo litsebi tse kang Jerome le Tyndale ka sebete li ile tsa fetolela le ho aba Lentsoe la Molimo. Batho ba limilione ba ne ba ka ba mocheng oa ho tseba Bibele le Bokreste ba mofuta o mong o itseng, le hoja e ne e le ba bohata.
5. Moprofeta Daniele o ile a bolela eng esale pele mabapi le “tsebo ea ’nete”?
5 Qetellong, joalokaha ho boletsoe esale pele bukeng ea Daniele, ‘tsebo ea ’nete e ile ea e-ba ngata.’ Sena se etsahetse “nakong ea bofelo”—e leng nako eo re phelang ho eona hona joale. (Daniele 12:4) Ka lebaka la moea o halalelang, batho ba ratang ’nete lefatšeng ka bophara ba na le tsebo e nepahetseng ea Molimo le merero ea hae. Esita le ka mor’a lilemo tse makholo tsa thuto ea bokoenehi, lentsoe la Molimo lea hlōla! Kajeno, litaba tse molemo li boleloa hohle, li supisa batho tšepong ea lefatše le lecha le thabisang. (Pesaleme ea 37:11) Joale, a re ke re hlahlobeng ho hōla hona ha lentsoe la Molimo mehleng ea kajeno.
Ho Hōla ha Lentsoe Kajeno
6. Liithuti tsa Bibele li ne li utloisisa linnete life selemong sa 1914?
6 Qetellong ea lekholo la bo19 la lilemo, ’nete ea Bibele e ile ea susumetsa sehlotšoana sa Liithuti tsa Bibele, seo kajeno se tsejoang e le Lipaki tsa Jehova. Ka 1914, Bibele e ne e phela ho sona. Li ne li utloisisa linnete tse hlollang mabapi le morero oa Molimo. Li ile tsa susumetsoa haholo ke lerato la Jehova ka hore a romele Mora oa hae lefatšeng, kahoo a bula monyetla oa bophelo bo sa feleng. Li ne li boetse li tseba le ho ananela lebitso la Molimo le botho ba hae. Ho feta moo, li ile tsa hlokomela hore ‘linako tsa Balichaba’ li se li phethahetse, li bontša hore nako e se e le haufi hore puso ea ’Muso oa Molimo e tlisetse moloko oa batho litlhohonolofatso. (Luka 21:24, King James Version) Tseo ke litaba tse molemo tse thabisang hakaakang! Linnete tsena tse matla li ne li lokela ho bolelloa e mong le e mong, kae le kae. Bophelo bo ne bo le kotsing!
7. ’Nete ea Bibele e hlōtse joang mehleng ea rōna?
7 Jehova o ile a hlohonolofatsa sehlotšoana seo sa Bakreste ba tlotsitsoeng ka moea. Kajeno, palo ea ba amohelang Bokreste ba ’nete e fetile limilione tse tšeletseng. Palo ea linaha tseo lentsoe la Molimo le boleloang ho tsona le eona e hōlile, kahobane Lipaki tsa Jehova li fumaneha linaheng tse 235. Ho feta moo, ’nete ea Bibele e matlafetse, e hlōla litšitiso tsohle, tsa bolumeli le tse ling. Mosebetsi ona oa ho bolela o etsoang lefatšeng lohle o eketsa bopaki bo ke keng ba hanyetsoa ba hore Jesu o teng ka matla a ’Muso.—Matheu 24:3, 14.
8. Ba bang ba ’nile ba re’ng ka palo e hōlang ea Lipaki tsa Jehova?
8 Feela joalokaha bo-rahistori ba ile ba bua ka ho hōla ho babatsehang ha Bokreste lekholong la pele la lilemo, litsebi tse ngata li buile ka ho hōla ha palo ea batho ba Jehova mehleng ea hona joale. United States, litsebi tse peli li ile tsa ngola hammoho li re: “Lilemong tse fetileng tse 75 palo ea Lipaki tsa Jehova e hōtse e sa phetse ka mokhoa o tsotehang . . . ’me e hōtse joalo lefatšeng ka bophara.” Koranta e ’ngoe ea Afrika Bochabela e bitsa Lipaki “bo bong ba malumeli a hōlang ka potlako le a hlomphuoang haholo a tsejoang lichabeng ka lebaka la ho khomarela ha tsona ka ho feletseng lithutong tsa Bibele.” Koranta e ’ngoe ea K’hatholike e buellang mekhoa ea khale, e hatisoang Europe, e bolela ka “palo e hōlang ka mokhoa o tsotehang ea Lipaki tsa Jehova.” Ke eng se tlatselitseng hore palo ee e hōle?
Moea o Halalelang oa Sebetsa Kajeno
9. (a) Lebaka le ka sehloohong la hore kajeno lentsoe la Molimo le hlōle ke lefe? (b) Jehova o hulela batho ho eena joang?
9 Lebaka le ka sehloohong la hore lentsoe la Molimo le hlōle kajeno ke hore moea oa Jehova o sebetsa ka matla, feela joalokaha ho ne ho le joalo lekholong la pele la lilemo. Jesu o itse: “Ha ho motho ea ka tlang ho ’na ntle leha a huloa ke Ntate ea nthomileng.” (Johanne 6:44) Mantsoe ana a fana ka maikutlo a hore Molimo ka bonolo o hula ba sekametseng ho lokeng, o ipiletsa lipelong. Ka mosebetsi oa ho bolela oa Lipaki tsa hae, Jehova o hulela tšebeletsong ea hae “lintho tse lakatsehang tsa lichaba tsohle”—e leng batho ba lefatše ba bonolo ba kang linku.—Hagai 2:6, 7.
10. Ke batho ba mefuta efe ba nkileng khato ka seo lentsoe la Molimo le ba bolellang sona?
10 Hase feela hore moea o halalelang o file batho ba Molimo matla a ho isa lentsoe la Molimo lipheletsong tsa lefatše; o susumelitse batho ba mefuta eohle ho nka khato ka seo litaba tse molemo li ba bolellang sona. Ke ’nete hore ba amohetseng lentsoe la Molimo ba tsoa “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng.” (Tšenolo 5:9; 7:9, 10) Ba fumanoa har’a barui le mafutsana, ba rutehileng haholo le ba sa rutehang. Ba bang ba amohetse lentsoe tlas’a maemo a ntoa le mahloriso a sehlōhō, ha ba bang bona ba le amohetse linakong tsa khotso le nala. Tlas’a ’muso oa mofuta o mong le o mong, litsong tsohle, ho tloha likampong tsa mahloriso ho fihlela matlong a marena, banna le basali ba nkile khato e ntle ka seo litaba tse molemo li ba bolellang sona.
11. Moea o halalelang o sebetsa joang bophelong ba batho ba Molimo, ’me ke phapang efe e totobetseng?
11 Ho sa tsotellehe ho se tšoane ho hlollang ha batho ba Molimo, ba lula hammoho ka kutloano. (Pesaleme ea 133:1-3) Sena ke bopaki bo eketsehileng ba hore moea o halalelang oa sebetsa bophelong ba ba sebeletsang Molimo. Moea oa hae ke tšusumetso e matla ea ho etsa se molemo e nolofalletsang bahlanka ba hae ho bontša lerato, thabo, khotso, mosa le litšoaneleho tse ling tse ipiletsang. (Bagalata 5:22, 23) Kajeno, re bona ka ho hlakileng seo moprofeta Malakia a ileng a se bolela esale pele khale, a re: “Le tla boela le bone phapang pakeng tsa ea lokileng le ea khopo, pakeng tsa ea sebeletsang Molimo le ea sa kang a mo sebeletsa.”—Malakia 3:18.
Lentsoe la Molimo Lea Hlōla ho Basebetsi ba Chesehang
12. Lipaki tsa Jehova li ikutloa joang ka mosebetsi oa ho bolela evangeli, ’me li lebelletse hore batho ba itšoare joang mabapi le mosebetsi oa tsona oa ho bolela litaba tse molemo?
12 Kajeno Lipaki tsa Jehova hase batho ba kenang kereke ba sa etseng letho. Li kopanela ka mafolofolo mosebetsing oa ho bolela evangeli. Joaloka Bakreste ba pele, li itlhahisa ka boithatelo ho tla etsa thato ea Molimo, li batla ho thusa ba bang hore ba ithute ka litšepiso tsa ’Muso tsa Jehova. Li sebetsa hammoho le Molimo ’me tumellanong le moea oa hae o halalelang, li bokella ba bang hore ba sebeletse Jehova. Ka ho etsa joalo, li bontša mohau oa Jehova le lerato la hae ho moloko oa batho o sa lumelang. Li etsa sena ho sa tsotellehe ho thulana le boiphapanyo, litšomo le mahloriso. Jesu o ile a lokisetsa balateli ba hae boitšoaro bo fapa-fapaneng boo batho ba neng ba tla bo bontša malebana le litaba tse molemo. O ile a re: “Lekhoba ha le leholo ho mong’a lona. Haeba ba ntlhorisitse, le lōna ba tla le hlorisa; haeba ba bolokile lentsoe la ka, ba tla boloka le la lōna.”—Johanne 15:20.
13. Ke litšoaneleho life tse sieo ho Bokreste-’mōtoana tse ngata haholo har’a Lipaki tsa Jehova?
13 Re khahloa ke ho tšoana ho teng kajeno pakeng tsa Lipaki tsa Jehova le ba ileng ba amohela Bokreste ba ’nete lekholong la pele la lilemo. Se hlokomelehang ka tsela e tšoanang ke phapang e teng kajeno pakeng tsa Lipaki tsa Jehova le Bokreste-’mōtoana. Ka mor’a ho ngola ka cheseho eo Bakreste ba pele ba neng ba e-na le eona ea ho bolela evangeli, setsebi se seng sea tletleba: “Ntle leha ho ka ba le phetoho leanong la hona joale la kereke e le hore mosebetsi oa ho bolela evangeli o ka boela oa bonoa e le tlamo ho Mokreste e mong le e mong ea kolobelitsoeng, ’me [phetoho e joalo] ea bontšoa ka mekhoa ea bophelo e phahametseng ea ba sa lumelang, ha ho bonahale eka re ka tsoela pele.” Litšoaneleho tse hlileng li haellang Bokreste-’mōtoaneng li ngata haholo har’a Lipaki tsa Jehova! Tumelo ea tsona ea phela, ke tumelo ea ’nete le tumelo e thehiloeng ’neteng ea Bibele eo li ikutloang li tlamehile ho e bolella bohle ba tla mamela.—1 Timothea 2:3, 4.
14. Jesu o ne a e-na le pono efe ka bosebeletsi ba hae, ’me barutuoa ba hae ba lokela ho bontša maikutlo afe kajeno?
14 Jesu o ne a nka bosebeletsi ba hae ka botebo haholo, a bo entse ntho e ka sehloohong ho eena. O ile a re ho Pilato: “Ke tsoaletsoe sena, ’me ke tletse sena lefatšeng, hore ke pakele ’nete.” (Johanne 18:37) Batho ba Molimo ba ikutloa kamoo Jesu a neng a ikutloa kateng. Kaha ’nete ea Bibele e ka lipelong tsa bona, ba leka ho fumana litsela tsa ho e bolella ba bangata kamoo ho ka khonehang. Tse ling tsa litsela tsena li bontša masene a fetisisang.
15. Ba bang ba bontšitse masene joang ha ba bolela litaba tse molemo?
15 Naheng e ’ngoe ea Amerika Boroa, Lipaki li ile tsa theosa le nōkana e ’ngoe e tlatsang Nōka ea Amazon e le hore li e’o bolella batho ’nete. Leha ho le joalo, ha ntoa ea lehae e qhoma ka 1995, baahi ba ile ba haneloa ho tsamaea nōkeng eo. Kaha Lipaki li ne li ikemiselitse ho ’na li fa batho ba thahasellang lingoliloeng tsa Bibele, li ile tsa rera ho phaphamatsa molaetsa hore o tsamaee ka nōka. Li ne li ngola mangolo ’me li a kenya le likopi tsa limakasine tsa Molula-Qhooa le Tsoha! ka libotlolong tsa polastiki tse sa tšelang letho. Ka mor’a moo li ne li lahlela libotlolo tseo ka nōkeng. Sena se ile sa tsoela pele ka lilemo tse ’nè le halofo ho fihlela batho ba lumelloa hape ho tsamaea nōkeng eo. Ho theosa le nōka eo, batho ba ne ba leboha Lipaki ka lingoliloeng tseo. Mofumahali e mong ea neng a ithuta Bibele o ile a li kopa a sekisitse meokho ’me a re: “Ke ne ke nahana hore nke ke ka hlola ke le bona hape. Leha ho le joalo, ha ke qala ho amohela lingoliloeng tse ka libotlolong, ke ile ka tseba hore ha lea ntebala!” Ba bang ba neng ba lula haufi le nōka eo ba ile ba bolela hore ba balile limakasine tseo khafetsa. Metsana e mengata e ne e e-na le “poso”—moo metsi a likolohang a ikentse letangoana leo lintho tse theosang le nōka li pota-potang teng ka nakoana li phaphametse. Batho ba thahasellang ba ne ba khathaletsa teng ho ea bona hore na ho na le “poso” e theosang le nōka.
16. Ka linako tse ling ho itlhahisa ho bula monyetla oa ho etsa barutuoa joang?
16 Jehova Molimo le mangeloi a hae a matla ke bona ba tšehelitseng le ba laolang ho boleloa ha litaba tse molemo. (Tšenolo 14:6) Ha re itlhahisa, ka linako tse ling ho hlaha menyetla e sa lebelloang ea ho etsa barutuoa. Nairobi, Kenya, basali ba babeli ba Bakreste ba neng ba le tšebeletsong ea tšimo ba ne ba qetile ho sebetsa matlo ao ba neng ba a abetsoe. Mosali e mong e mocha o ile a ba atamela ka tšohanyetso ’me ka thabo a re: “Ke ne ke ntse ke rapella ho kopana le batho ba kang lōna.” O ile a kōpa Lipaki ka tieo hore li tle lapeng ha hae hang-hang ho tla buisana le eena, ’me li ile tsa qala thuto ea Bibele le eena hona letsatsing leo. Ke hobane’ng ha mosali eo a ile a atamela Bakreste baa ba babeli ka potlako e kaalo? Lesea la hae le ne le ile la shoa libekeng tse peli tse fetileng. Kahoo, ha a bona mocha ea neng a nkile pampitšana e nang le sehlooho se reng “Ho na le Tšepo Efe Bakeng sa Baratuoa ba Shoeleng?” o ne a e batla ka matla ’me o ile a kōpa moshanyana eo hore a mo fe eona. Moshanyana eo o ile a hana, empa a mo supisa Lipaki tse neng li mo file eona. Kapele feela mosali enoa o ile a tsoela pele hantle moeeng ’me a khona ho loantša bohloko ba ho shoeloa ke ngoana.
Lerato la Molimo le Lokela ho Hlōla
17-19. Jehova o bontšitse moloko oa batho lerato la mofuta ofe ka thekollo?
17 Ho hōla ha lentsoe la Molimo lefatšeng lohle ho amana haufi haholo le sehlabelo sa thekollo sa Kreste Jesu. Mosebetsi oa ho bolela o tšoana le thekollo kahobane ke pontšo ea lerato la Jehova ho batho ba libakeng tsohle. Moapostola Johanne o ile a bululeloa hore a ngole, a re: “Molimo o ratile lefatše [la moloko oa batho] haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.”—Johanne 3:16.
18 Nahana ka lerato leo Jehova a le bontšitseng ha a lokisetsa thekollo. Ka lilemo tse se nang palo, Molimo o ne a thabetse kamano e haufi le Mora oa hae ea ratoang, ea tsoetsoeng a le mong, “tšimoloho ea pōpo ea Molimo.” (Tšenolo 3:14) Jesu o rata Ntat’ae ka botebo, ’me Jehova o ratile Mora oa hae “pele lefatše le thehoa.” (Johanne 14:31; 17:24) Jehova o ile a lumella hore Mora enoa ea ratoang oa hae a shoe e le hore batho ba ka fumana bophelo bo sa feleng. See ke pontšo e hlollang hakaakang ea ho rata moloko oa batho!
19 Johanne 3:17 e re: “Molimo o rometse Mora oa hae lefatšeng, eseng hore a ahlole lefatše, empa hore lefatše le pholosoe ka eena.” Kahoo, Jehova o ile a roma Mora oa hae ho tla etsa mosebetsi o bontšang lerato oa ho boloka, eseng oa ho ahlola kapa oa ho tsoa. Sena se lumellana le mantsoe a Petrose a reng: “[Jehova] ha a lakatse hore leha e le mang a timetsoe empa o lakatsa hore bohle ba fihle pakong.”—2 Petrose 3:9.
20. Poloko e amana joang le ho boleloa ha litaba tse molemo?
20 Kaha Jehova o ile a senyeheloa haholo ha a lokisetsa motheo o molaong bakeng sa poloko, o batla hore ba bangata kamoo ho ka khonehang ba e sebelise hamolemo. Moapostola Pauluse o ile a ngola, a re: “‘E mong le e mong ea ipiletsang lebitsong la Jehova o tla pholoha.’ Leha ho le joalo, ba tla ipiletsa joang ho eo ba sa behang tumelo ho eena? Hape, ba tla beha tumelo joang ho eo ba e-s’o utloele ka eena? Hape, ba tla utloa joang ha ho se ea bolelang?”—Baroma 10:13, 14.
21. Re lokela ho ikutloa joang ka monyetla oa ho ba le karolo mosebetsing oa boboleli?
21 Ke tokelo e babatsehang hakaakang ho ba le karolo mosebetsing oo o etsoang lefatšeng lohle oa ho bolela le ho ruta! Hase mosebetsi o bonolo, empa Jehova o thaba hakaakang ha a bona batho ba hae ka botšepehi ba phelela ’nete ’me ba bolella ba bang litaba tse molemo! Ho sa tsotellehe hore na maemo a hao ke afe, tlohella moea oa Molimo le lerato le ka pelong ea hao li u susumetse hore u be le karolo mosebetsing ona. Hape, hopola hore seo re bonang se finyelloa lefatšeng ka bophara ke bopaki bo kholisang ba hore Jehova Molimo o tla tloha a phethahatsa tšepiso ea hae ea ho tlisa “maholimo a macha le lefatše le lecha” tse khanyang tseo “ho loka ho tla aha ho tsona.”—2 Petrose 3:13.
Na Ua Hopola?
•Ke hobane’ng ha bokoenehi bo ne bo ke ke ba khutsisa baboleli ba litaba tse molemo?
•Lentsoe la Molimo le hlōtse joang mehleng ea rōna?
•Moea oa Molimo o sebetsa ka litsela life kajeno?
•Thekollo e amana joang le ho boleloa ha litaba tse molemo?
[Krafo/Setšoantšo se leqepheng la 16]
(Ha u batla ho bona boitsebiso bo hlophisitsoeng hantle, sheba sengoliloeng)
Palo e hōlang ea baboleli ba ’Muso lekholong la bo20 la lilemo
Karolelano ea Bahoeletsi (e baloa ka limilione)
6,0
5,5
5,0
4,5
4,0
3,5
3,0
2,5
2,0
1,5
1,0
0,5
1900 1910 1920 1930 1940 1950 1960 1970 1980 1990 2000
[Litšoantšo tse leqepheng la 15]
JEROME
TYNDALE
GUTENBERG
HUS
[Tlhaloso ea Moo Setšoantšo se Nkiloeng Teng]
Gutenberg and Hus: From the book The Story of Liberty, 1878
[Setšoantšo se leqepheng la 15]
Liithuti tsa Bibele li bolela litaba tse molemo ka bo-1920
[Litšoantšo tse leqepheng la 16, 17]
Lefatšeng lohle batho ba nka khato ka seo litaba tse molemo li ba bolellang sona
[Setšoantšo se leqepheng la 18]
Mosebetsi oa ho bolela o phahamisa lerato la Molimo joaloka sehlabelo sa thekollo sa Jesu Kreste