Bontša Tumelo Bakeng sa Bophelo bo sa Feleng
“E-ba le tumelo bakeng sa ho pholosa moea.”—BA-HEBERU 10:39, “NW.”
1. Buka ea boitsebiso ea K’hatholike e lumela eng mabapi le ho sebelisa ha Bibele lentsoe “moea”?
HA HO kae kapa kae moo Bibele e bolelang hore batho ba na le moea o sa shoeng o tsoelang pele o phela ha ’mele o shoa e be o phela ka ho sa feleng sebakeng sa moea. Esita le New Catholic Encyclopedia ea lumela: “Khopolo ea moea o tsoelang pele o phela ka morao ho lefu ha e lemohehe kapele ka hare ho Bibele. . . . Ka T[estamenteng] ea K[hale] moea ha o bolele karolo e ’ngoe ea motho, empa motho kaofela—motho joaloka boleng bo phelang. Ka ho tšoanang, ka T[estamenteng] e N[cha] o emela bophelo ba motho: bophelo ba motho ka mong.” Kahoo batho ha ba na meea, ke meea.
2. (a) Tumelo ea moea o sa shoeng e simolohile hokae? (b) ’Nete ke efe mabapi le boemo ba motho ka morao ho lefu?
2 Joalokaha sehlooho se ka pele se bontšitse, tumelo ea moea o sa shoeng ke khopolo ea bohetene e simolohileng mehleng ea pele ea histori. Moqapi oa eona ke ea ileng a hanyetsa phatlalatso e hlakileng ea Molimo ea hore motho o ne a tla “shoa” ka baka la ho se utloe. (Genese 2:17) Ke mohanyetsi, Satane Diabolose, ea itseng: “Ha e le ho shoa, le ke ke la shoa.” (Genese 3:4) ’Me hoo e ne e le leshano. (Johanne 8:44) Hamorao, Satane o ile a tšehetsa thuto ea ho se shoe ha moea oa motho. Empa ’nete e mabapi le boemo ba motho ka morao ho lefu e joalokaha e boletsoe ka hare ho Lentsoe la Molimo le bululetsoeng ho Moeklesia 9:5: “Bafu ha ba tsebe letho leha le le leng.”—Bona le Ba-Roma 5:12.
Tšepo ea Bophelo bo sa Feleng
3. Bibele e bua ho hongata mabapi le tšepo efe?
3 Le hoja Bibele e bontša ka ho hlaka hore ha ho ntho e kang moea o sa shoeng, e hlile e bolela ho hongata ka bophelo bo sa feleng. Tšepo ea bophelo bo ke keng ba fela e ne e le thuto ea motheo ea Jesu. O itse: “’Me bophelo bo sa feleng ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Johanne 17:3) Mabapi le ba bontšang tumelo ho Molimo le Kreste, Jesu o boletse: “Ke [ba] fa bophelo bo sa feleng.” (Johanne 10:28) Ka kholiseho e felletseng, o itse: “Ea lumelang ho ’na o na le bophelo bo sa feleng . . . o tla phela ka mehla.” (Johanne 6:47, 51) Hape o boletse: “Molimo o ratile lefatše hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng.”—Johanne 3:16.
4. Jesu o itse’ng mabapi le tšepo ea nako e tlang?
4 Kaha ha ho na moea o sa shoeng o tsoelang pele o phela lefung, tšepiso ea Bibele ea bophelo bo sa feleng e tla phethahatsoa joang? Jesu o ile a fana ka boitsebiso bo eketsehileng mabapi le sena ha a ne a etetse Maretha le Maria ka mor’a hore khaitseli’a bona Lazaro a shoe. O ile a re ho Maretha: “Ke ’na tsoho le bophelo; ea lumelang ho ’na, leha a shoele, o tla phela.” O ile a botsa Maretha: “Na u lumela hona na?” Eaba oa arabela: “E, Morena, kea lumela hobane ke uena Kreste, Mora oa Molimo.”—Johanne 11:25-27.
5, 6. Ha Jesu a tsosetsa Lazaro bophelong hoo ho ile ha bontša eng?
5 Ho bontša hore eena, joaloka Mora oa Molimo, o ne a fuoe matla a ho khutlisetsa bafu bophelong, Jesu o ile a ea lebitleng la Lazaro. Lazaro o ne a se a shoele matsatsi a mane, ’me ’mele oa hae o se o qalile ho bola. Leha ho le joalo, “[Jesu] a hoa ka lentsoe le leholo, a re: Lazaro, tsoa moo! Eaba mofu o tsoa a thatiloe matsoho le maoto ka masela, a khurumelitsoe sefahleho ka duku. Jesu a re ho bona: Mo lokolleng, le mo lesele a itsamaele.” (Johanne 11:43, 44) Lazaro ea shoeleng o ne a khutliselitsoe bophelong!
6 Lazaro ha aa ka a khutlisoa leholimong kapa sebakeng leha e le sefe se seng sa moea. Ha aa ka a ea sebakeng sa moea ha a shoa empa o ne a sa ikutloe ka lebitleng, moo bafu bohle ba leng hona teng. (Pesaleme ea 146:4; Johanne 3:13; Liketso 2:34) E ne e ke ke ea e-ba ho utloahalang ho nahana hore moea o sa shoeng oa Lazaro o ne o ntse o thabela thabo e khōlō leholimong eaba joale moea oo o tlosoa leholimong hore o tl’o kopanngoa hape le ’mele o sa phethahalang lefatšeng ho tla phela hape lefatšeng le tletseng bohloko, ho kula, le lefu. Empa kaha o ne a se leholimong, ho khutlisetsoa ha hae bophelong ho ile ha thabeloa, hobane ho ne ho bolela lilemo tse eketsehileng tsa bophelo ho eena le ho kopanngoa hape le baratuoa ba hae. Hamorao, o ne a tla boela a shoe.
7, 8. (a) Jesu o ile a tsosa bafu makhetlong afe hape? (b) Ke hobane’ng ha Jesu a ile a etsa mehlolo eo ea ho khutlisetsa batho bophelong?
7 Ha Jesu a tsosa ngoananyana ea neng a shoele, batsoali ba hae “ba ile ba itebala ke nyakallo e khōlō.” (Mareka 5:42, NW) Leha ho le joalo, qetellong ngoanana eo le eena o ile a boela a shoa. Ha Jesu a tsosa mora ea shoeleng oa mohlolohali oa Naine, “bohle ba tšoaroa ke tšabo, ba rorisa Molimo.” (Luka 7:16) Empa monna eo le eena o ile a shoa qetellong. Mabapi le mehlolo ena, The New International Dictionary of New Testament Theology ea tiisa: “Ba ileng ba tsosoa ke Kreste tšebeletsong ea hae lefatšeng ba ile ba lokela ho shoa, kaha litsoho tsena ha lia ka tsa fana ka ho se shoe.”
8 Ke hobane’ng ha Jesu a ile a tsosa batho baa bafung? Ka nako eno morero e ne e se ho fana ka bophelo bo sa feleng, empa e ne e le ho bontša hore ke eena Messia le ho bontša seo Molimo o neng o mo file matla a ho se etsa. Hoo ho ile ha haha tumelo tšepong ea tsoho le bophelo bo sa feleng tlas’a puso e tlang ea ’Muso oa Molimo oa leholimo matsohong a Kreste.—Mattheu 6:9, 10; Johanne 11:41, 42.
9. Ka nepo Maretha le Pauluse ba ile ba utloisisa thuto ea Jesu mabapi le tšepo ea tsoho joang?
9 Maretha o ne a tseba ka tšepo eo ka baka la ho tloaelana ha hae le Jesu, hobane pejana o ne a ile a re ho eena mabapi le Lazaro: “Kea tseba hobane o tla tsoha mohl’a tsoho, letsatsing la bofelo.” (Johanne 11:24) O ne a tseba hore tsoho e ne e ke ke ea etsahala letsatsing la hae (Lazaro) la bofelo, empa nakong e tlang, “letsatsing la bofelo”—Letsatsi la Kahlolo, nako eo ka eona bafu ba tla tsosoa tlas’a puso ea ’Muso oa Molimo. Moapostola Pauluse le eena o ne a tseba hoo, hobane o itse: “[Molimo] o beile letsatsi le leng leo o tla ahlola lefatše ka lona ka ho loka.” (Liketso 17:31) Pauluse o ile a bolela a re: “Tsoho ea bafu e tla ba teng, ea ba lokileng le ea ba sa lokang.” (Liketso 24:15) Ha aa ka a re tsoho e ne e se e ntse e etsahala empa o itse “e tla ba teng” nakong e tlang—tlas’a puso ea ’Muso.
10 Bukeng Immortality of the Soul or Resurrection of the Dead? moprofesa oa Lefora oa Moprostanta Oscar Cullmann oa ngola: “Ho na le phapang e khōlō pakeng tsa tebello ea Mokreste ea tsoho ea bafu le tumelo ea Bagerike ea ho se shoe ha moea. . . . Le hoja hamorao Bokreste bo ile ba hokahanya litumelo tsena tse peli, ’me kajeno Mokreste ea tloaelehileng a li ferekanya ka ho felletseng, ke bona ho se lebaka la ho pata seo ’na le boholo ba litsebi re se talimang e le ’nete. . . . Bophelo le khopolo tsa Testamente e Ncha li laoloa ka ho felletseng ke tumelo tsohong. . . . Motho kaofela, ea hlileng a shoeleng, o khutlisetsoa bophelong ke ketso ea Molimo e ncha ea pōpo.”
Ba Tsohela Hokae?
11 Ha Molimo o bōpa batho, o ile oa ba fa lefatše hore e be lehae la bona la ka ho sa feleng ’me oa rera ho tlatsa naletsana ena ka moloko o lokileng oa batho. (Genese 1:26-28; Pesaleme ea 115:16) Bibele e bua ka Jehova e le ea “bōpileng lefatše, moetsi oa lona ea le tiisitseng, ea sa ka a le bōpela lefeela, ea mpang a le bōpetse hore le ahuoe.”—Esaia 45:18.
12 Ho sa tsotellehe likete-kete tsa lilemo tsa ho se phethahale le lefu ho tloha ha motho e e-ba mofetoheli, e sa ntsane e le morero oa Molimo hore lefatše e be lehae la ka ho sa feleng la motho: “Ba lokileng ba tla ja lefa la lefatše, ’me ba tla hlola ho lona ka ho sa feleng.” (Pesaleme ea 37:29) “Ho lehlohonolo ba bonolo; hobane ba tla ja lefa la lefatše.” (Mattheu 5:5) Ka hona, ha Jesu a khutlisetsa bafu bophelong, o ile a ba tsosetsa hona mona lefatšeng, ’me hang-hang ba bang ba ile ba ba tseba e le bona batho ba neng ba shoele. Sena se ile sa tiisa hore tlas’a puso ea ’Muso bafu ba tla khutlisetsoa bophelong lefatšeng hore ba be le monyetla oa ho phela ho lona ka ho sa feleng. (Tšenolo 20:12, 13) Hoo ho tla phethahatsa morero oa Molimo bakeng sa batho le lefatše.—Esaia 46:9-11; 55:11; Tite 1:1, 2.
13 Leha ho le joalo, kaha likereke tsa Bokreste-’mōtoana li lumela hore moea ha o shoe, sena se li hlahisetsa qaka: Ke joang li ka etsang hore tsoho ea “motho kaofela,” joalokaha Jesu a ile a e bontša, e nyalane le tumelo ea tsona ea moea o sa shoeng o seng o ntse o le leholimong kapa liheleng? The Catholic Encyclopedia e phea khang: “Seboka sa Bone sa Lateran se ruta hore batho bohle, ho sa tsotellehe hore na ke ba khethetsoeng poloko kapa ba khopo, ‘ba tla tsoha hape ka ’mele ea bona eo ba ntseng ba e-na le eona hona joale.’” Ea phaella: “Joalokaha ’mele e le molekane oa moea litlōlong, e bile e le motsoalle oa oona litšoanelehong tsa oona tse babatsehang, toka ea Molimo e bonahala e hloka hore ’mele o kopanele tlhokofatsong ea moea le moputsong oa oona.” Ho latela tumelo ena, ’mele o tla kopanngoa hape le moea leholimong kapa liheleng. Halelele hakae? Mohloli oo oa boitsebiso oa bolela: “’Mele e tsositsoeng ea bahalaleli hammoho le baetsalibe e tla fuoa ho se shoe.”
14 Bukeng The Future Life, ea Mojesuit J. C. Sasia, rea bala: “Ka hona bophelo ba leholimo e tla ba ba menyaka hape le ka mecha ea kutlo e tlotlisitsoeng [ea ’mele o kopantsoeng hape le moea].” Mabapi le ’mele e kopantsoeng hape le meea ea eona liheleng, mohloli oo oa boitsebiso oa bolela: “Liheleng, ka mor’a tsoho [ea ’mele], mocha o mong le o mong oa kutlo o ’meleng oa motho o tla fumana kotlo ea oona e sa tloaelehang . . . Mocha oa kutlo oa ho ama o tla hlokofatsoa haholo-holo, hobane ka ho khetheha ke ka baka la libe tsa nama ba khopo ba sitetsoeng Molimo. . . . Kamano ea bona le ’mele ea bona e tla ba sesosa sa litlhokofatso le mesarelo e eketsehileng ho bona.”
15 Ka hona, ho amohela khopolo ea bohetene ea ho se shoe ha moea ho phetletse Bokreste-’mōtoana tsela ea hore hape bo amohele khopolo ea bohetene ea tlhokofatso e bohloko ka ho fetisisa ea meea—esita le ’mele—liheleng ka ho sa feleng. Leha ho le joalo, mabapi le mokhoa oa boholo-holo oa ho chesetsa melimo ea bohata bana e le mahlabelo, Jehova o ile a bolela: “Ba . . . chesa bana ba bona teng ka mollo, e tle e be secheso ho Baale, e leng seo ke sa kang ka ba laela sona, se sa kang sa itlhahela pelong ea ka.” (Jeremia 19:5) Kahoo ke ho nyefola ho ruta hore Molimo o hlokofatsa batho ka ho sa feleng, ha Lentsoe la oona ka booona le bontša ka ho hlaka hore bafosi ba sa bakeng ba tla timetsoa, ba felisoe hore ba se hlole ba e-ba teng. “Moea ofe kapa ofe o sa mameleng Moprofeta eo [Jesu] o tla timetsoa ka ho felletseng.”—Liketso 3:23, NW; bona le Mattheu 10:28, NW; Luka 17:27; Johanne 3:16; 2 Petrose 2:12; Juda 5.
Ho se Shoe
16 Leha ho le joalo, na Bibele ha e rute hore batho ba tla isoa leholimong hore ba e’o phela bophelo ba ho se shoe moo? E, e ruta hoo. Empa sena ha se na moo se amanang teng le meea ea batho e sa shoeng. Ho se shoe ke phello ea ho tsosoa ha motho e le sebōpuoa sa moea (joaloka Jesu) e seng ea hore o na le moea o sa shoeng o ileng oa tsoela pele o phela ka mor’a lefu. Moputso oa nako e tlang oa ho se shoe o ile oa tšepisoa batho ba bang ba tšepahalang, ba kang Kreste ’me o ne o tla phethahatsoa feela ha Kreste a e-tla matleng a ’Muso leholimong, e seng hang ka mor’a hore Kreste a nyolohele leholimong lekholong la pele la lilemo.—Pesaleme ea 110:1; 1 Ba-Korinthe 15:53, 54.
17 Ho feta moo, tšepo eo e ile ea tšepisoa bao ha ho bapisoa e leng ba seng bakae feela ba lelapa la motho. Bana Jesu o ile a ba bitsa “mohlatsoana.” (Luka 12:32) Sehlopha sena, ba 144 000 ka palo, se tsosetsoa bophelong ba leholimo e le libōpuoa tsa moea tse sa shoeng ho ea busa lefatše hammoho le Kreste ’Musong oa hae oa leholimo. (2 Petrose 3:13; Tšenolo 7:4; 14:1, 4; 20:4) Lefatše leo ba le busang mor’a nako le tla ahoa ke batho ba phethahetseng, bao ho seng pelaelo hore ba tla baloa ka likete tsa limillione. Boholo ba batho bao e tla be e le ba khutletseng lefatšeng ka ‘tsoho ea ba lokileng le ea ba sa lokang.’ (Liketso 24:15) Leha ho le joalo, ho tla ba le ba bang ba tla rua bophelo lefatšeng le lecha ntle le ba tsositsoeng bafung. Baa ke bo-mang?
“A ke ke a Shoa le ka Mohla o le Mong”
18 Le hoja tšepo e tiileng bakeng sa bafu e le tsoho, ho na le tšepo e ’ngoe e tsotehang mehleng ea rōna. E amana le seo Jesu a ileng a tsoela pele ho se bolella Maretha. Ka mor’a hore a re: “Ea lumelang ho ’na, leha a shoele, o tla phela [tsohong],” Jesu o ile a phaella, “e mong le e mong ea phelang, ’me a lumetse ho ’na, a ke ke a shoa le ka mohla o le mong.” (Johanne 11:25, 26) Polelong ena ea morao, Jesu o ile a bolela esale pele ka ntho e ’ngoe e hlollang: Ho ne ho tla tla nako eo ka eona ho neng ho ke ke ha hlokahala hore batho ba phelang ba shoe ho hang! Empa nako eo e ne e tla fihla neng?
19 Hona joale—mehleng ea rōna—ke nako ea hore tšepiso eo e phethahatsoe! Bopaki bohle bo bontša hore re haufi haholo le qetello ea lefatše lena le khopo. (Mattheu 24:3-14; 2 Timothea 3:1-5, 13) Ka hona, kajeno batho ba lumelang ho Molimo le ho Mora oa oona ba na le tšepo e hlollang ea ho pholoha bofelo ba tsamaiso ena le ho tsoela pele ho kena lefatšeng le lecha la Molimo ba ntse ba phela—ba ke ke ba hlola ba e-shoa le ka mohla! Ho Tšenolo 7:9, 14 ho buuoa ka bana e le “bongata bo boholo ba batho, bao ho seng motho ea ka tsebang ho bo bala, ba lichaba tsohle, le ba mefuta eohle, le ba merabe eohle, le ba lipuo tsohle . . . ba tsoang mahlomoleng a maholo,” ba pholositsoeng ke Molimo ka baka la ho bontša tumelo ha bona. Jesu o buile ka timetso e tlang ea tsamaiso ena e khopo e le “mahlomola a . . . maholo, ha e sa le le tšimolohong ea lefatše, ho fihlela joale, tsietsi e kalo ha e e-so ho ka e e-ba teng, ’me ha e ka ke ea boela ea e-ba teng le ka mohla o le mong.”—Mattheu 24:21; bona le Liproverbia 2:21, 22; Pesaleme ea 37:10, 11, 34.
20 Ho pholletsa le lefatše, ba limillione ba bongata bo boholo ba batho ba batlang ho phela ka ho sa feleng lefatšeng ba se ba ntse ba bontša tumelo litšepisong tsa Molimo le ho eo a mo fileng matla a ho ba “tsoho le bophelo,” Jesu Kreste. ’Me ba inehetse ho Molimo, ba tšoantšelitse sena ka kolobetso ea metsing. (Mattheu 28:19, 20) Ba lumela hore poloko eohle ba e fumane ka baka la ‘Molimo o lutseng teroneng le Konyana,’ Jesu Kreste.—Tšenolo 7:10.
21 Ba bongata bo boholo ba batho ba pholohang bofelo ba lefatše lena ba ke ke ba hloka ho tsosoa bafung hobane ‘ba ke ke ba shoa le ka mohla o le mong’! Na u se u nkile mehato ea ho ba e mong oa sehlopha see? Haeba ho joalo, u bulehetsoe ke tokelo e hlollang, e ikhethang hakaakang—ea ho pholoha bofelo ba tsamaiso e khopo ea Satane le ho kenngoa nakong e ncha ea ho loka e tla u tlisetsa bophelo bo phethahetseng ’meleng le bophelo bo sa feleng lefatšeng la paradeise! (Luka 23:43; Tšenolo 21:4, 5) Ka ho ithuta hore na thato ea Molimo ke efe le ho qophella ho e etsa, u ka bontša hore ha u ‘motho ea koenehang ho ea timelong.’ Le uena u ka ‘bontša tumelo ho pholosa moea.’—Ba-Heberu 10:39; 1 Johanne 2:15-17; Tšenolo 7:15.
Lipotso tsa Tlhahlobo
◻ Tšepo ea ’nete bakeng sa bafu ke efe?
◻ Ke hobane’ng ha tumelo ea Bokreste-’mōtoana ea ho tsosoa ha ’mele e le thohako ho Molimo?
◻ Bibele e ruta eng ka ho se shoe?
◻ Ke tšepo efe e hlollang eo batho ba ka bang le eona kajeno?
10. Moprofesa oa Lefora o etsa tlhaloso efe ka litumelo tsa Bokreste-’mōtoana mabapi le tsoho ha li bapisoa le thuto e hlakileng ea Bibele?
11, 12. (a) Morero oa Molimo bakeng sa batho le lefatše lee ke ofe? (b) Jesu o bontšitse joang hore morero oa Molimo bakeng sa lefatše ha oa fetoha?
13. Ke qaka efe eo likereke tsa Bokreste-’mōtoana li talimaneng le eona, ’me li leka ho e rarolla joang?
14. Sengoli se seng sa Mojesuit se leka ho hlakisa pono ea Bokreste-’mōtoana ka tsoho ea ’mele joang?
15. Ke hobane’ng ha ho bolela hore Molimo o hlokofatsa batho ka ho sa feleng liheleng e le ho nyefola?
16. Bibele e ruta eng mabapi le ho se shoe?
17. Ke ba bakae ba tla fumana ho se shoe, ’me ba phetha karolo efe morerong oa Molimo ka lefatše?
18. Ho phaella tšepong ea tsoho ea bafu, ntho e ’ngoe e hlollang eo Jesu a e boletseng esale pele ke efe?
19. (a) Tšepo ea hore batho ba se hlole ba e-shoa le ka mohla e ne e tla phethahatsoa nakong efe? (b) Bibele e hlalosa ba nang le tšepo ea ho se hlole ba e-shoa le ka mohla joang?
20, 21. Ke joang ba limillione kajeno ba bontšang tumelo ho Molimo le Kreste, ’me ba bangata ho bona ba ke ke ba hloka eng?