KHAOLO EA 43
Na Bakreste ba Lokela ho Noa Joala?
Lefatšeng lohle, batho ba na le maikutlo a sa tšoaneng ka joala. Batho ba bang ba thabela ho noa joala ka linako tse ling ha ba e-na le metsoalle ea bona. Ba bang ba khetha hore ba se ke ba noa ho hang, ha ba bang bona ba noa hore ba be ba tahoe. Empa Bibele e re’ng ka joala?
1. Na ke phoso ho noa joala?
Bibele ha e re ke phoso ho noa joala. Ho e-na le hoo, ha e bua ka limpho tse ngata tseo Molimo a re fileng tsona, e akarelletsa le “veine e thabisang pelo ea motho.” (Pesaleme ea 104:14, 15) Bibele e bua ka banna le basali ba bang ba tšepahalang ba neng ba noa joala.—1 Timothea 5:23.
2. Bibele e fana ka keletso efe ho batho ba khethang ho noa?
Jehova o hloile ho noa haholo le botahoa. (Bagalata 5:21) Lentsoe la hae le re: “U se ke oa ba har’a ba noang veine haholo.” (Liproverbia 23:20) Kahoo haeba re batla ho noa, ebang re bang kapa re na le batho ba bang, ha rea lokela ho noa hoo re sa khoneng ho nahana hantle, ho laola lintho tseo re li buang le tseo re li etsang kapa ho noa hoo joala bo ka re kulisang. Haeba re sa khone ho laola tsela eo re noang ka eona, re lokela ho ikemisetsa ho khaotsa ho noa ka ho feletseng.
3. Re ka bontša joang hore re hlompha liqeto tseo batho ba bang ba li etsang ka joala?
Motho e mong le e mong o lokela ho iketsetsa qeto ea hore na o tla noa joala kapa che. Ha rea lokela ho ahlola motho ea khethang ho noa joala ka tsela e itekanetseng, hape ha rea lokela ho qobella motho ea sa batleng ho noa hore a noe. (Baroma 14:10) Re etsa qeto ea hore re se ke ra noa haeba ho noa ho ka bakela batho ba bang mathata. (Bala Baroma 14:21.) Ha re batle “se molemo ho [rona], empa se molemo ho motho e mong.”—Bala 1 Bakorinthe 10:23, 24.
ITHUTE LINTLHA TSE LING
Ithute hore na Bibele e ka u thusa joang ho etsa qeto ea hore na u lokela ho noa joala le hore na u lokela ho noa hakae. Hape ithute hore na u ka etsa’ng haeba u e-na le bothata ba ho noa haholo.
4. Etsa qeto ea hore na u tla noa kapa che
Maikutlo a Jesu e ne e le afe ka ho noa joala? E le hore u fumane karabo, bala ka mohlolo oa pele oo a ileng a o etsa. Bala Johanne 2:1-11 ebe le buisana ka lipotso tsena:
Mohlolo oo Jesu a o entseng o re ruta eng ka tsela eo a ikutloang ka eona ka joala le ka batho ba bo noang?
Ha e le moo Jesu a sa re ke phoso ho noa joala, Mokreste o lokela ho ikutloa joang ha motho e mong a etsa qeto ea ho noa?
Leha ho le joalo, taba ea hore Mokreste o lokolohile hore a ka noa joala ha e bolele hore a ka noa neng kapa neng ha a batla. Bala Liproverbia 22:3 ’me u hlokomele hore na maemong a latelang e ka ba bohlale hore u noe kapa che:
Haeba u tl’o khanna kapa u tl’o sebetsa ka mochine o ka bang kotsi.
Ha u imme.
Ha ngaka e itse u se ke oa noa joala.
Ha u e-na le bothata ba ho noa haholo.
Ha molao o sa u lumelle ho noa joala.
Ha u e-na le motho ea entseng qeto ea hore a se ke a noa hobane a kile a ba le bothata ba ho noa haholo.
Na joala bo lokela ho ba teng lechatong la hao kapa meketjaneng eo u e etsang? E le hore u bone hore na u ka thusoa ke’ng ho etsa qeto, bapala VIDEO.
Bala Baroma 13:13 le 1 Bakorinthe 10:31, 32. Ka mor’a ho bala lengolo ka leng, buisanang ka potso ena:
Ke joang ho etsa seo u ithutang sona lengolong lee ho ka u thusang hore u etse qeto e tla thabisa Jehova?
Mokreste e mong le e mong o iketsetsa qeto ea hore na o tla noa joala kapa che. Le haeba ka linako tse ling a noa joala, a ka ’na a khetha hore ka linako tse ling a se ke a bo noa
5. Etsa qeto ea hore na u tla noa hakae
Haeba u etsa qeto ea ho noa joala, hopola hore le hoja Jehova a sa re ke phoso ho bo noa, o re ho fosahetse ho noa haholo. Ke hobane’ng ha a cho joalo? Bala Hosea 4:11, 18 ebe le buisana ka potso ena:
Ho ka etsahala’ng haeba motho a noa haholo?
Ke’ng e ka re thusang hore re se ke ra noa haholo? Re lokela hore re ikokobetse e le hore re tsebe lintho tseo re ka khonang ho li etsa le tseo re ke keng ra khona ho li etsa. Bala Liproverbia 11:2 ebe le buisana ka potso ena:
Ke hobane’ng ha ho le molemo hore re lekanyetse hore na re tla noa joala bo bokae?
6. U ka khona ho khaotsa ho noa haholo
Ithute hore na ke’ng e ileng ea thusa ntate e mong hore a khaotse ho noa haholo. Bapala VIDEO ebe le buisana ka lipotso tse latelang.
Videong ee, ha Dmitry a ne a noele joala o ne a itšoara joang?
Na o ile a khona ho tlohela ho noa hang-hang?
Ke’ng e ileng ea mo thusa hore qetellong a khaotse ho noa joala haholo?
Bala 1 Bakorinthe 6:10, 11 ebe le buisana ka lipotso tsena:
Botahoa ke sebe se seholo hakae?
Ke’ng e bontšang hore motho ea noang haholo a ka khona ho fetoha?
Bala Matheu 5:30 ebe le buisana ka potso ena:
Ha Jesu a ne a re motho a khaole letsoho la hae, o ne a bolela hore re lokela ho tela lintho tse itseng e le hore re khahlise Jehova. U ka etsa’ng haeba u thatafalloa ke ho tlohela ho noa joala haholo?a
Bala 1 Bakorinthe 15:33 ebe le buisana ka potso ena:
Metsoalle ea hao e ka ama tsela eo u noang ka eona joang?
MOTHO A KA ’NA A RE: “Na ke phoso ho noa joala?”
U ka mo araba joang?
KAKARETSO
Joala ke mpho e tsoang ho Jehova, empa o hloile ho noa haholo le botahoa.
Re Ithutile’ng?
Bibele e re’ng ka joala?
Ke hobane’ng ha ho le kotsi ho noa haholo?
Re ka bontša joang hore re hlompha liqeto tseo ba bang ba li etsang tabeng ea ho noa joala?
BATLA
Bacha ba ka etsa liqeto tse nepahetseng joang tabeng ea ho noa joala?
Bona hore na u ka etsa’ng e le hore u hlole bothata ba ho noa haholo.
“Joala U ka bo Laola Joang?” (Molula-Qhooa, January 1, 2010)
Na Bakreste ba lokela ho otlanya likhalase tsa veine?
“Lipotso Tse Tsoang ho Babali” (Molula-Qhooa, February 15, 2007)
Paleng ea bophelo e nang le sehlooho se reng “Ke ne ke le Tanka e Lesoba,” bona hore na ke’ng e ileng ea thusa ntate e mong hore a khaotse ho noa haholo.
a Batho ba lemalletseng ho noa joala ba ka ’na ba hloka thuso ea litsebi hore ba bo tlohele. Lingaka tse ngata li khothalletsa hore batho ba kileng ba e-ba le bothata ba ho noa haholo, ba tlohele joala ka ho feletseng.