Ba Ile ba Etsa Thato ea Jehova

Filipi o Kolobetsa Molaoli oa Moethiopia

HA A ntse a palame koloi ea hae, Moethiopia e mong o ne a sebelisa nako ea hae ka bohlale. O ne a balla holimo—tloaelo e neng e atile har’a ba neng ba le leetong lekholong la pele la lilemo. Monna enoa e ne e le molaoli “ea neng a le pusong tlas’a Kandase mofumahali oa Baethiopia.”a O ne a “okametse letlotlo lohle la hae”—ha e le hantle, e ne e le letona la lichelete. Molaoli enoa o ne a bala Lentsoe la Molimo e le hore a fumane tsebo.—Liketso 8:27, 28.

Haufi le moo e ne e le moevangeli Filipi. Lengeloi le ne le mo lebisitse sebakeng sena, ’me joale o ile a bolelloa: “Atamela ’me u ikopanye le koloi ena.” (Liketso 8:26, 29) Re ka inahanela ha Filipi a ipotsa, ‘Monna eo ke mang? O ntse a bala’ng? Ke hobane’ng ha ke lebisitsoe ho eena?’

Ha Filipi a matha mabapa le koloi, o ile a utloa Moethiopia eo a bala mantsoe ana: “Joaloka nku o ile a tlisoa tlhabong, le joaloka konyana e sa tsebeng ho bua ka pel’a mokuti oa eona, kahoo ha a ahlamise molomo oa hae. Nakong ea ho kokobetsoa ha hae o ile a amohuoa kahlolo. Ke mang ea tla pheta lintlha tse qaqileng tsa moloko oa hae? Hobane bophelo ba hae bo tlosoa lefatšeng.”—Liketso 8:32, 33.

Kapele-pele Filipi o ile a lemoha serapa seo. Se ne se e-tsoa bukeng ea Esaia. (Esaia 53:7, 8) Moethiopia eo o ne a qakuoe ke seo a neng a se bala. Filipi o ile a qala moqoqo ka potso: “Na ha e le hantle u tseba seo u se balang?” Moethiopia eo o ile a araba: “Ka sebele, nka tseba joang ntle leha e mong a ka ntataisa?” Joale o ile a kōpa Filipi ka tieo hore a palame le eena koloing ea hae.—Liketso 8:30, 31.

“Ke Eng e Nthibelang ho Kolobetsoa?”

Moethiopia eo o ile a re ho Filipi: “Kea u kōpa, Moprofeta o bua see mabapi le mang? Mabapi le eena kapa mabapi le motho e mong ea itseng?” (Liketso 8:34) Pherekano ea Moethiopia eo e ne e sa makatse, kaha tlhaloso ea “nku” kapa “mohlanka,” ea boprofeta ba Esaia e ne e ’nile ea e-ba sephiri ka nako e telele. (Esaia 53:11) E tlameha ebe sena se ile sa hlaka hakaakang ha Filipi a bolella Moethiopia eo “litaba tse molemo mabapi le Jesu”! Ka mor’a nakoana, Moethiopia eo o ile a re: “Bona! Metsi; ke eng e nthibelang ho kolobetsoa?” Kahoo, Filipi o ile a mo kolobetsa hona hoo.—Liketso 8:35-38.

Na ee e bile ketso ea lepotla-potla? Le hanyenyane! Moethiopia enoa e ne e le mosokolohi oa Mojuda.b Ka hona, e ne e se e ntse e le morapeli oa Jehova ea nang le tsebo ea Mangolo, ho kopanyelletsa le boprofeta bo amanang le Mesia. Leha ho le joalo, tsebo ea hae e ne e sa fella. Joale, kaha o ne a se a fumane boitsebiso bona ba bohlokoa malebana le mosebetsi oa Jesu Kreste, Moethiopia eo o ile a utloisisa seo Molimo a neng a se hloka ho eena ’me o ne a ikemiselitse ho sebetsa tumellanong le sona. Kolobetso e ne e tšoaneleha.—Matheu 28:18-20; 1 Petrose 3:21.

Ka mor’a moo, “kapele moea oa Jehova oa tlosa Filipi.” O ile a ea kabelong e ’ngoe. Moethiopia eo ‘o ile a tsoela pele ho tsamaea a thabile.’—Liketso 8:39, 40.

Thuto Bakeng sa Rōna

Joaloka bahlanka ba Jehova ba mehleng ena, re na le boikarabelo ba ho thusa batho ba lipelo li tšepahalang hore ba ithute ’nete ea Lentsoe la Molimo. Ba bangata ba bile le katleho ho boleleng litaba tse molemo ho ba bang ha ba le maetong kapa liketsahalong tse ling tse sa reroang. Ka lebaka la mosebetsi oa boboleli ba ’Muso, selemo le selemo likete tse makholo li tšoantšetsa boinehelo ba tsona ho Jehova Molimo ka ho kolobetsoa.

Ka sebele, ba bacha ’neteng ha baa lokela ho potlakisetsoa kolobetsong. Ba lokela ho fumana tsebo e nepahetseng ka Jehova Molimo le Mora oa hae, Jesu Kreste, pele. (Johanne 17:3) Joale ba tlameha ho baka, ba tlohele boitšoaro bo fosahetseng ’me ba sokolohe e le hore ba lumellanye bophelo ba bona le litekanyetso tsa Molimo. (Liketso 3:19) Hona ho nka nako, haholo-holo haeba monahano le boitšoaro bo fosahetseng li ’nile tsa mela ka metso. Le hoja ba bacha ’neteng ba lokela ho nka ka botebo sehlabelo sa ho ba morutuoa oa Mokreste, tlhohonolofatso e khōlō e tla fumaneha ka ho ba le kamano e inehetseng le Jehova Molimo. (Bapisa le Luka 9:23; 14:25-33.) Ka mafolo-folo, bao e leng Lipaki tsa Jehova ba tataisetsa bao ba bacha ’neteng mokhatlong o hlophisitsoeng oo Molimo a o sebelisang ho phetha thato ea hae. (Matheu 24:45-47) Joaloka Moethiopia, bana ba tla thaba ha ba ithuta ’me ba lumellanya bophelo ba bona le seo Molimo a se batlang ho bona.

[Mongolo o botlaaseng ba leqephe]

[Lebokose le leqepheng la 8]

Ke Hobane’ng ha a Bitsoa Leqhalaha?

Ho pholletsa le tlaleho ea Liketso khaolo ea 8, Moethiopia eo o bitsoa “leqhalaha.” Leha ho le joalo, kaha Molao oa Moshe o ne o sa amohele monna oa lehaole ka phuthehong, ka ho hlakileng monna enoa e ne e se leqhalaha ka kutloisiso ea sebele. (Deuteronoma 23:1) Lentsoe la Segerike bakeng sa “leqhalaha” le ka bolela motho ea boemong bo phahameng ba boikarabelo. Ka hona, Moethiopia enoa e ne e le molaoli tlas’a mofumahali oa Ethiopia.