Phutheho ea “E-ba le Khotso”

1, 2. Saule o ne a ikemiselitse ho etsa eng Damaseka?

BANNA ba hlokofetseng ba atamela Damaseka moo ba rerileng ho etsa bokhopo! Ba tla ntša barutuoa ba Jesu malapeng ka ntšoe li sa fohloa, ba ba tlame, ba ba hobose ebe ba ba hulanyetsa Jerusalema ho ea ahloloa ke Lekhotla le Phahameng la Bajuda.

² Saule, moeta-pele oa sehlopha sena o se a ntse a le mali matsohong.a Nakoana pele ho mona, o ne a thabetse ho bona ha batho ba chesehelang bolumeli joaloka eena ba tlepetsa Setefane ka majoe. Setefane e ne e le morutuoa oa Jesu ea inehetseng. (Lik. 7:57–8:1) Kaha Saule ha aa khotsofalla ho hlorisa balateli ba Jesu ba lulang Jerusalema, o hlohlelletsa hore ba hlorisoe le libakeng tse ling. O batla ho fiela lequloana lena le lenyokonyane le bitsoang “Tsela ea Morena.”—Lik. 9:1, 2; sheba lebokose la sehlooho se reng: “Matla ao Saule a Neng a E-na le ’Ona Damaseka.”

3, 4. (a) Saule o ile a etsahalloa ke eng? (b) Re tla tšohla lipotso life?

³ Ka tšohanyetso, leseli le khanyang le potoloha Saule. Ba tsamaeang le eena ba bona leseli empa ba ema tlekelele! Saule oa foufala ’me o oela fatše. Saule ha a sa bona, ’me o utloa lentsoe le tsoang leholimong le re: “Saule, Saule, ekaba u ntlhorisetsa’ng?” Saule o maketse, ’me o re: “U mang Morena?” E tlameha ebe karabo eo Saule a e fumanang e mo tšosa haholo: “Ke ’na Jesu, eo u mo hlorisang.”—Lik. 9:3-5; 22:9.

⁴ Re ka ithuta eng mantsoeng a pele ao Jesu a a bolellang Saule? Ho hlahloba se ileng sa etsahala ha Saule a sokoloha ho ka re tsoela molemo joang? Seo phutheho e ileng ea se etsa ha ho e-ba le khotso ka mor’a hore Saule a sokolohe se re ruta eng?

“Ekaba u Ntlhorisetsa’ng?” (Liketso 9:1-5)

5, 6. Re ka ithuta eng mantsoeng ao Jesu a ileng a a bolella Saule?

⁵ Ha Jesu a emisa Saule tseleng e eang Damaseka, ha aa ka a re: “Ekaba u hlorisetsa’ng barutuoa ba ka?” Joalokaha re bone, o itse: “Ekaba u ntlhorisetsa’ng?” (Lik. 9:4) Ka sebele liteko tse hlahelang balateli ba Jesu li mo ama ka ho toba.—Mat. 25:34-40, 45.

⁶ Haeba u hatelloa ka lebaka la ho lumela ho Kreste, kholiseha hore Jehova le Jesu ba tseba seo. (Mat. 10:22, 28-31) Mohlomong teko eo e ke ke ea tloha hona joale. Hopola hore Jesu o ile a bona kamoo Saule a neng a kentse letsoho kateng lefung la Setefane, a ba a bona ha Saule a ntša barutuoa ba tšepahalang ka ntšoe li sa fohloa matlong a bona Jerusalema. (Lik. 8:3) Leha ho le joalo, Jesu ha aa ka a etsa letho ka nako eo. Empa Jehova o ile a sebelisa Kreste eaba o matlafatsa Setefane le barutuoa ba bang hore ba lule ba tšepahala.

7. Ke eng seo u lokelang ho se etsa hore u mamelle mahloriso?

⁷ Le uena u ka mamella mahloriso haeba u etsa lintho tse latelang: (1) Ikemisetse ho lula u tšepahala ho sa tsotellehe hore u hlaheloa ke eng. (2) Kopa thuso ea Jehova. (Bafil. 4:6, 7) (3) Tlohella phetetso ho Jehova. (Bar. 12:17-21) (4) Kholiseha hore Jehova o tla u fa matla a ho mamella ho fihlela a bona ho loketse hore a tlose teko eo.—Bafil. 4:12, 13.

“Saule, Ngoan’eso, Morena . . . o Itse ke Tle ho Uena” (Liketso 9:6-17)

8, 9. Ho ka etsahala hore Ananiase o ile a ikutloa joang ka mosebetsi oo a o filoeng?

⁸ Ha a qeta ho araba potso ea Saule e reng, “U mang Morena?” Jesu o ile a re ho eena: “Ema u ee motseng, u tla bolelloa hore na u etse’ng.” (Lik. 9:6) Saule ea foufetseng o ile a tataisetsoa moo a lulang teng Damaseka, ’me a itima lijo a ba a rapela ka matsatsi a mararo. Ka eona nako eo, Jesu o ile a bolella Ananiase ka Saule. Ananiase e ne e le morutuoa ea lulang motseng oo ’me o ne “a buuoa hantle ke Bajuda bohle” ba lulang Damaseka.—Lik. 22:12.

⁹ Ak’u nahane hore na Ananiase o ile a ferekana hakaakang! Hlooho ea phutheho, e leng Jesu Kreste ea tsositsoeng bafung, o bua le eena ka ho toba, o mo khethela hore a etse mosebetsi o khethehileng. Ke tlotla e kaakang empa ke mosebetsi o boima hakaakang! Ha Ananiase a bolelloa hore o lokela ho bua le Saule, o ile a re: “Morena, ke utloile batho ba bangata ba bua ka monna enoa le ka lintho tsohle tse mpe tseo a li entseng ho barutuoa ba hao Jerusalema. Hona joale, baprista ba baholo ba mo file matla a ho tšoara bohle ba tšepetseng lebitsong la hao.”—Lik. 9:13, 14.

10. Ke eng seo re ithutang sona ka Jesu tseleng eo a ileng a tšoara Ananiase ka eona?

¹⁰ Jesu ha aa ka a khalemela Ananiase ha a mo tsebisa se mo tšoenyang. Leha ho le joalo, Jesu o ile a mo bolella ka ho hlaka hore na o lokela ho etsa eng. A ba a mo hlompha ka hore a mo bolelle lebaka leo ka lona a batlang hore a etse mosebetsi ona o sa tloaelehang. Jesu o ile a re ka Saule: “Ke khethile monna enoa hore a tsebise lichaba, marena le Baiseraele lebitso la ka. Ke tla mo hlakisetsa hore na ke lintho tse ngata tse bohloko hakae tse tla mo hlahela hobane e le morutuoa oa ka.” (Lik. 9:15, 16) Hang-hang Ananiase o ile a etsa seo Jesu a mo laetseng sona. O ile a batla Saule oa mohlorisi ’me ha a mo fumana a re ho eena: “Saule ngoan’eso, Morena Jesu ea hlahileng ho uena ha u le tseleng e tlang mona o itse ke tle ho uena e le hore u ka boela oa bona ’me oa tlala moea o halalelang.”—Lik. 9:17.

11, 12. Re ithuta eng liketsahalong tse amanang le Jesu, Ananiase le Saule?

¹¹ Re ithuta lintlha tse ’maloa liketsahalong tse amanang le Jesu, Ananiase le Saule. Ka mohlala, Jesu o laola mosebetsi oa boboleli ka mafolofolo, joalokaha a tšepisitse. (Mat. 28:20) Le hoja Jesu a sa bue ka ho toba le batho kajeno, o laola mosebetsi oa boboleli ka mohlanka ea tšepahalang eo a mo khethileng hore a okamele bahlanka ba hae ba ntlo. (Mat. 24:45-47) Ba tataisoa ke Sehlopha se Busang, bahoeletsi le bo-pula-maliboho ba romeloa ho ea batla ba batlang ho tseba ho eketsehileng ka Kreste. Joalokaha ho boletsoe khaolong e fetileng, bongata ba bona ba rapetse Molimo hore a ba tataise eaba ka mor’a moo ba eteloa ke Lipaki Tsa Jehova.—Lik. 9:11.

¹² Ka boikokobetso Ananiase o ile a etsa mosebetsi oo a o filoeng ’me a hlohonolofatsoa. Na u mamela taelo ea ho fana ka bopaki bo hlakileng, esita leha mosebetsi oo o sa u jese litheohelang? Ba bang ba tšaba ho ea ka ntlo le ntlo le ho kopana le batho bao ba sa ba tsebeng. Ba bang ba thatafalloa ke ho pakela batho libakeng tsa khoebo, seterateng, ka fono kapa ka ho ngola mangolo. Ananiase o ile a hlola tšabo ea hae ’me a ba le tlotla ea ho thusa Saule hore a amohele moea o halalelang.b Ananiase o ile a atleha hobane o ne a tšepile Jesu ’me a nka Saule e le ngoan’abo. Re ka hlola tšabo haeba joaloka Ananiase, re lumela hore Jesu o laola mosebetsi oa boboleli, re utloela batho bohloko ’me re nka hore esita le batho bao re ba tšabang haholo ba ka fetoha barab’abo rona.—Mat. 9:36.

‘A Bolella Batho ka Jesu’ (Liketso 9:18-30)

13, 14. Haeba u ithuta Bibele empa u e-s’o kolobetsoe, u ka ithuta eng mohlaleng oa Saule?

¹³ Saule o ile a potlakela ho sebelisa seo a ithutileng sona. Ha a se a bona mahlong, o ile a kolobetsoa ’me a qala ho sebelisana ’moho le barutuoa ba Damaseka. Empa o ile a etsa ho eketsehileng. “Hang-hang feela a ea matlong a thapelo ’me a bolella batho hore Jesu ke Mora oa Molimo.”—Lik. 9:20.

¹⁴ Haeba u ntse u ithuta Bibele empa u e-s’o kolobetsoe, na joaloka Saule u tla sebelisa seo u ithutang sona ka hore u kolobetsoe? Ke ’nete hore Saule o ile a bona mohlolo oo Kreste a ileng a o etsa, ’me ha ho pelaelo hore sena se ile sa mo susumelletsa hore a nke khato. Empa le ba bang ba ile ba bona mehlolo ea Jesu. Ka mohlala, sehlopha se seng sa Bafarisi se ile sa shebella ha a folisa monna ea omeletseng letsoho ’me ka kakaretso Bajuda ba bangata ba ne ba tseba hore Jesu o tsositse Lazaro bafung. Leha ho le joalo, bongata ba bona ba ile ba iphapanyetsa mohlolo oo ’me ba bang ba ba ba mo hanyetsa. (Mar. 3:1-6; Joh. 12:9, 10) Empa Saule o ile a fetoha. Ke hobane’ng ha Saule a ile a fetoha empa ba bang ba sa ka ba fetoha? Hobane o ne a tšaba Molimo ho feta batho ’me a ananela ka ho teba mohau oo Kreste a mo bontšitseng oona. (Bafil. 3:8) Haeba le uena u etsa joalo, u ke ke ua lumella letho hore le u sitise ho etsa mosebetsi oa boboleli le ho tšoaneleha hore u kolobetsoe.

15, 16. Saule o ile a etsa’ng matlong a thapelo, ’me Bajuda ba Damaseka ba ile ba etsa joang?

¹⁵ Na u ka inahanela kamoo bongata bo ileng ba makala, ba tšoha ba ba ba halefa kateng ha Saule a ba bolella ka Jesu matlong a thapelo? Bo ile ba re: “Na monna eo ha se eena ea neng a hlasela barutuoa ba Jesu ba Jerusalema?” (Lik. 9:21) Ha Saule a hlalosa lebaka le fetotseng tsela eo a neng a ikutloa ka eona ka Jesu, o ile “a paka ka ho hlaka hore Jesu ke Kreste.” (Lik. 9:22) Empa hase bohle ba kholisoang ke mabaka a utloahalang. A ke ke a fetola monahano oa batho ba tsitlellang ho latela lineano kapa ba sa batleng ho fetoha ka lebaka la boikhohomoso. Leha ho le joalo, Saule ha aa ka a tela.

¹⁶ Lilemo tse tharo hamorao, Bajuda ba Damaseka ba ne ba ntse ba hanyetsa Saule. Qetellong, ba ile ba leka ho mo bolaea. (Lik. 9:23; 2 Bakor. 11:32, 33; Bagal. 1:13-18) Ha morero oo o tsebahala, Saule o ile a tloha motseng oo ka lenyele, a theoloa ka baskete lesobeng la lerako la motse. Luka o re ba ileng ba balehisa Saule bosiung boo e ne e le “barutuoa ba [Saule].” Lik. 9:25) Ho bonahala mantsoe ana a bontša hore bonyane ba bang ba ileng ba utloa ha Saule a bolela litaba tse monate Damaseka ba ile ba amohela molaetsa oa hae ’me ea e-ba balateli ba Kreste.

17. (a) Batho ba etsa joang ha ba utloa ’nete ea Bibele? (b) Re lokela ho tsoela pele re etsa’ng, hona hobane’ng?

¹⁷ Ha u ne u qala ho bolella ba lelapa, metsoalle le ba bang litaba tse monate tseo u ithutang tsona, mohlomong u ne u lebeletse hore bohle ba tla amohela ’nete ea Bibele hobane ea utloahala. Ho ka etsahala hore ba bang ba ile ba e amohela empa ba bangata ha baa ka ba e amohela. Ha e le hantle, e ka ’na eaba ba lelapa ba ile ba u nka u le sera. (Mat. 10:32-38) Leha ho le joalo, haeba u tsoela pele ho ntlafatsa bokhoni ba hao ba ho beha mabaka ka Mangolo, ’me u lula u itšoere joaloka Mokreste, esita le ba u hanyetsang ba ka ’na ba qetella ba fetohile.—Lik. 17:2; 1 Pet. 2:12; 3:1, 2, 7.

18, 19. (a) Ha Barnabase a tiisa hore Saule ke morutuoa, phello e bile efe? (b) Re ka etsisa Barnabase le Saule joang?

¹⁸ Ha Saule a kena Jerusalema, hoa utloahala hore ebe barutuoa ba ne ba sa lumele hore e se e le morutuoa. Leha ho le joalo, ha Barnabase a tiisa hore Saule e se e le morutuoa, baapostola ba ile ba mo amohela, ’me a lula le bona ka nakoana. (Lik. 9:26-28) Saule o ne a le masene ’me a se lihlong ka litaba tse monate. (Bar. 1:16) Ka sebete o ile a bolela litaba tse monate Jerusalema, e leng hona moo a neng a kile a hlorisa barutuoa ba Jesu Kreste ka sehloho. Bajuda ba Jerusalema ba ile ba tšoha haholo ha ba hlokomela hore moeta-pele oa bona o se a ba koenehetse, ’me joale ba qala ho batla ho mo bolaea. Bibele e re: “Ha barutuoa ba bang ba utloa taba ena, ba mo isa Sesarea eare ha a le moo, ba mo romela Tarsase.” (Lik. 9:30) Saule o ile a ikokobelletsa litaelo tseo Jesu a ileng a li fetisa ka phutheho. Sena se ile sa ruisa Saule le phutheho molemo.

¹⁹ Hlokomela hore Barnabase ke eena ea ileng a ithaopela ho thusa Saule. Ha ho pelaelo hore mosa ona o ile oa etsa hore bahlanka bana ba Jehova ba chesehang e be metsoalle e meholo. Na joaloka Barnabase, u ikemiselitse ho thusa ba bacha ka phuthehong ka ho sebetsa le bona tšebeletsong ea tšimo le ho ba thusa hore ba hatele pele moeeng? Haeba u etsa joalo, u tla putsoa haholo. Haeba u mohoeletsi e mocha oa litaba tse monate, na joaloka Saule u amohela thuso eo u e fuoang? Ka ho sebetsa le bahoeletsi ba nang le phihlelo e eketsehileng, u tla ntlafatsa bokhoni ba hao tšebeletsong, thabo ea hao e tla eketseha ’me u tla fumana metsoalle ea hlooho ea khomo.

“Ba Bangata ba Lumela ho Morena” (Liketso 9:31-43)

20, 21. Bahlanka ba Molimo ba nakong e fetileng le ba hona joale ba ’nile ba sebelisa nako ea khotso hamolemo joang?

²⁰ Ka mor’a hore Saule a sokolohe a be a tlohe sebakeng seo a sireletsehile, “barutuoa bohle ba Judea, Galilea le Samaria ba e-ba le khotso.” (Lik. 9:31) Barutuoa ba ile ba sebelisa nako ee ea “ha ho le monate” joang? (2 Tim. 4:2) Bibele e re ba ne ‘ba matlafala.’ Baapostola le bara ba bang babo rona ba ikarabellang ba ile ba matlafatsa tumelo ea barutuoa ’me ba etella pele ha phutheho ‘e ntse e tsamaea litseleng tsa Jehova ebile e khothatsoa ka moea o halalelang.’ Ka mohlala, Petrose o ile a sebelisa nako eo ho matlafatsa barutuoa ba motseng oa Lyda Thoteng ea Sharone. Ka lebaka la sena ba bangata ba lulang moo ba ile “ba lumela ho Morena.” (Lik. 9:32-35) Barutuoa ha baa ka ba khelosoa ke mesebetsi ea botho empa ba ile ba ikitlaetsa hore ba hlokomelane ba be ba bolele litaba tse monate. Phello e bile hore phutheho e ile ‘ea ’na ea eketseha.’

²¹ Ho elella bofelong ba lekholo la bo20 la lilemo, Lipaki Tsa Jehova linaheng tse ngata le tsona li ile tsa “e-ba le khotso.” Mebuso e ’nileng ea hatella batho ba Molimo ka lilemo tse mashome e ile ea oa ka tšohanyetso, ’me ha e-ba bonolo ho bolela litaba tse monate linaheng tseo ho tsona mosebetsi o neng o thibetsoe kapa maemong a mang thibelo ea tlosoa ka ho feletseng. Lipaki tse mashome a likete li ile tsa sebelisa monyetla oo ho paka phatlalatsa ’me ha e-ba le liphello tse babatsehang.

22. U ka sebelisa tokoloho eo u nang le eona hamolemo joang?

²² Na u sebelisa tokoloho eo u nang le eona hamolemo? Haeba u lula naheng e nang le tokoloho ea bolumeli, Satane o batla ho u hoka-hoka hore u lelekise maruo ho e-na le ho hahamalla mesebetsi e amanang le ’Muso. (Mat. 13:22) U se ke ua khelosoa. Sebelisa hamolemo nako leha e le efe ea khotso e lekanyelitsoeng e teng hona joale. E nke e le monyetla oa ho fana ka bopaki bo hlakileng le ho haha phutheho. Hopola hore maemo a hao a ka fetoha ka ho panya ha leihlo.

23, 24. (a) Re ithuta lintlha life tlalehong e buang ka Tabitha? (b) Re lokela ho ikemisetsa ho etsa eng?

²³ Nahana ka se ileng sa etsahalla Tabitha kapa Dorkase. O ne a lula motseng oa Jopa o neng o se hole le oa Lyda. Morali enoa oabo rona ea tšepahalang o ile a sebelisa nako le matlotlo a hae ka bohlale, “a etsa mesebetsi e mengata e metle a bile a phallela bafutsana.” Leha ho le joalo, o ile a kula ka tšohanyetso ’me a shoa.c Barutuoa ba Jopa, haholo-holo bahlolohali bao a neng a ba etsetsa lintho tse molemo ba ile ba sareloa haholo ha a shoa. Ha Petrose a fihla ntlong eo setopo sa hae se neng se lokisoa teng bakeng sa lepato, o ile a etsa mohlolo oo baapostola ba Jesu Kreste ba neng ba e-s’o ka ba o etsa. Petrose o ile a rapela eaba o tsosa Tabitha bafung! Inahanele feela hore na bahlolohali bao le barutuoa ba bang ba ile ba thaba hakaakang ha Petrose a ba bitsetsa ka kamoreng eo ’me a ba bontša hore Tabitha oa phela! Ruri liketsahalo tsena li ile tsa ba matlafatsa hore ba tobane le liteko tse larileng ka pele. Hase feela mohlolo oo o ileng oa “tsejoa hohle Jopa ’me batho ba bangata ba lumela ho Morena.”—Lik. 9:36-42.

²⁴ Re ithuta lintlha tse peli tsa bohlokoa tlalehong ena e thabisang e buang ka Tabitha. (1) Bophelo bo feta ka potlako. Kahoo, ke habohlokoa hakaakang hore re iketsetse lebitso le letle le Molimo ha monyetla o sa le teng! (Moek. 7:1) (2) Re na le tšepo e tiileng ea hore bafu ba tla tsoha. Jehova o ile a hlokomela liketso tse ngata tseo Tabitha a li entseng, ’me a mo putsa. O tla hopola boikitlaetso ba rona ’me a re tsose bafung haeba re ka shoa pele ho Armagedone. (Baheb. 6:10) Ka lebaka leo, ebang hona joale re phela ka thata kapa hamonate, a re phehelleng ho fana ka bopaki bo hlakileng ka Kreste.—2 Tim. 4:2.