The Kingdom Interlinear Translation of the Greek Scriptures e bontša hore phroʹne·ma e hlaha ka makhetlo a mane ho Ba-Roma 8:6, 7, 27 le hore moelelo oa eona oa sebele o tsitsitseng ke “ho ba le mohopolo o sekametseng [nthong e itseng].” Litsebi tsa Magerike Bauer, Arndt, le Gingrich li hlalosa phroʹne·ma e le: ‘mokhoa oa ho nahana, ho tsepamisa mohopolo nthong e itseng, sepheo, taba-tabelo, ho hahamalla ntho.’—A Greek-English Lexicon of the New Testament and Other Early Christian Literature.

Ka ho fapaneng, temana ea 27 (NW) e bua ka Molimo ka booona. Rea bala: “Leha ho le joalo ea [Jehova] phenyang lipelo o tseba sepheo sa moea, hobane moea o kōpela bahalaleli se tumellanong le Molimo.” E, “ea” eo ho buuoang ka eena mona ke Jehova, Ea Utloang thapelo.

Lentsoe phroʹne·ma le ka be le fetoletsoe e le “ho ba le mohopolo o sekametseng [nthong e itseng]” temaneng ea 27. Empa moea o halalelang hase motho eo ka sebele a nahanang kapa hore o na le monahano oa oona. Moea ke matla a sebetsang a Molimo, o tsebang kamoo moea oa oona o halalelang o sebetsang ka teng ho phethahatsa thato ea oona. Ho phaella moo, se boleloang ke temana ena se fapana le se boleloang ke Ba-Roma 8:6, 7. (NW) Litemana tseo tsa pejana li totobalitse tlhoko eo batho ba nang le eona ea ho laola monahano oa bona le liketso tsa bona. Empa ha ho hlokahale hore Jehova a sebeletse ho itaola, kapa a ho loanele. O tseba se neng se tlalehiloe ka Bibeleng tlas’a pululelo, joaloka litlhaloso tsa Bibele tse bontšang thato ea hae ka bahlanka ba hae ba lefatšeng. Dr. Heinrich Meyer o hlalosa Ba-Roma 8:27 (NW) tjena: “Joang kapa joang Molimo o ka tseba morero oa Moea.”

Ka hona, ho fetoleloa ha “sepheo” ho tumellanong le se fuperoeng ke boitsebiso kapa moko-taba oa Ba-Roma 8:27 (NW), ’me ho lumelloa ke Segerike. The Translator’s New Testament e e fetolela tjena: “Ea phenyang lipelo o tseba sepheo sa Moea.”