Lula U E-na le Pono ea Mangolo Litabeng Tsa Kalafo

“U rate Jehova Molimo oa hao . . . ka kelello ea hao eohle le ka matla a hao ’ohle.”​—MAR. 12:30.

1. Morero oa Molimo e ne e le ofe ka batho?

JE NE e se morero oa Jehova Molimo hore batho bao a ba bōpileng ba kule ’me ba shoe. Adama le Eva ba ile ba behoa serapeng sa Edene, kapa paradeiseng ea nyakallo, ‘hore ba e leme le ho e hlokomela’ ka ho sa feleng eseng ka lilemonyana tse 70 kapa tse 80. (Gen. 2:8, 15; Pes. 90:10) Haeba banyalani bao ba pele ba ne ba ile ba lula ba tšepahala ho Jehova ’me ba ikokobelletsa bobusi ba hae ka lerato, ho ka be ho se mohla ba kileng ba kula, ba fokola, hape ba ka be ba sa shoa.

2, 3. (a) Botsofali bo tšoantšetsoa ka lintho life bukeng ea Moeklesia? (b) Ke mang ea ikarabellang ka lefu leo re le futsitseng ho Adama, ’me se bakiloeng ke lona se tla etsolloa joang?

² Moeklesia khaolo ea 12 e fana ka tlhaloso e hlakileng ea “matsatsi a tlokotsi” a tsamaeang le botsofali ho batho ba sa phethahalang. (Bala Moeklesia 12:1-7.) Moriri o mosoeu o bapisoa le lithunthung tsa “sefate sa almonde.” Maoto a tšoantšoa le “banna ba mafolofolo” ba seng ba iname ’me ba thothomela. Mafumahali a eang fensetereng ho ea batla leseli empa a fumana lefifi feela ke tšoantšetso e loketseng ea mahlo a seng a sa bone hantle. Kaha meno a mang a khenohile, ‘basali ba silang ba khaolitse ho sebetsa kahobane ba fokotsehile.’

³ Ho hang e ne e se morero oa Molimo hore batho ba qetelle ba e-na le maoto a tetemang, mahlo a seng a sa bone hantle le lisene. Ho feta moo, lefu leo re le futsitseng ho Adama ke o mong oa “mesebetsi ea Diabolose” eo Mora oa Molimo a tla e “qhaqha” ka ’Muso oa hae oa Bomesia. Moapostola Johanne o ile a ngola a re: “Mora oa Molimo o ile a bonahatsoa ka morero ona, e leng, ho qhaqha mesebetsi ea Diabolose.”​—1 Joh. 3:8.

Ho Tšoenyeha ka Tsela e Loketseng ke ha Tlhaho

4. Ke hobane’ng ha bahlanka ba Jehova ba tšoenyeha ka tsela e loketseng ka bophelo ba bona, empa ke sefe seo ba se hlokomelang?

⁴ Hona joale, bahlanka ba bang ba Jehova ba na le mathata a ho kula le botsofali a hlahelang batho ba baetsalibe. Maemong a joalo, ho tšoenyeha ka tsela e loketseng ka bophelo ba rōna ke ha tlhaho ebile ho molemo. Na ha re batle ho sebeletsa Jehova ‘ka matla a rōna ’ohle’? (Mar. 12:30) Leha ho le joalo, ha re ntse re leka ho lula re phetse hantle kamoo ho ka khonehang, ha rea lokela ho iphoufaletsa maemo ebile re lokela ho hlokomela hore, ha e le hantle, re ke ke ra liehisa botsofali kapa ra qoba ho kula ka ho feletseng.

5. Ke sefe seo re ka ithutang sona tseleng eo bahlanka ba Molimo ba tšepahalang ba ’nileng ba sebetsana le ho kula ka eona?

⁵ Bahlanka ba tšepahalang ba Jehova ba bangata ba ile ba tlameha ho tobana le mathata a ho kula. Epafroditase e ne e le e mong oa bona. (Bafil. 2:25-27) Motsoalle ea tšepahalang oa moapostola Pauluse e leng Timothea o ne a khathatsoa ke mala hangata, ke ka lebaka leo Pauluse a ileng a mo khothalletsa hore a noe “veine e nyenyane.” (1 Tim. 5:23) Pauluse ka boeena o ile a lokela ho loantšana le “moutloa nameng,” mohlomong e ne e le bohloko ba mahlo kapa lefu le neng le e-s’o be le pheko ka nako eo. (2 Bakor. 12:7; Bagal. 4:15; 6:11) Mabapi le ‘moutloa o neng o le nameng’ ea hae, Pauluse o ile a etsa thapeli e tiileng ho Jehova. (Bala 2 Bakorinthe 12:8-10.) Molimo ha aa ka a folisa Pauluse “moutloa nameng” ka mohlolo. Ho e-na le hoo, Molimo o ile a mo matlafatsa hore a o mamelle. Kahoo, bofokoli ba Pauluse bo ile ba bonahatsa matla a Jehova. Na ho na le seo re ka ithutang sona tabeng ee?

Qoba ho Tšoenyeha ho Tlōla Tekano ka Litaba Tsa Kalafo

6, 7. Ke hobane’ng ha re lokela ho qoba ho tšoenyeha ho tlōla tekano ka bophelo ba rōna?

⁶ Joalokaha u tseba, Lipaki Tsa Jehova li lumela ho phekoloa ka litsela tse sa tšoaneng. Hangata makasine ea rōna ea Tsoha! e ba le lihlooho tse buang ka litaba tsa bophelo. Le hoja re sa khothalletse mokhoa o itseng oa phekolo, re ananela ha basebeletsi ba tsa bophelo ba re thusa ba bile ba e-ba le tšebelisano-’moho le rōna. ’Nete ke hore rea tseba hore nako ea hore re be le bophelo bo phethahetseng ha e e-s’o fihle. Ka lebaka leo, rea tseba hore ke bohlale hore re qobe ho tšoenyeha ho tlōla tekano ka litaba tsa kalafo. Re lokela ho talima litaba ka tsela e fapaneng le ea batho ba ‘se nang tšepo,’ ba nahanang hore bophelo bona ke bona feela bo teng, le ba ka lekang makhobonthithi ’ohle hore ba phekole mafu a bona. (Baef. 2:2, 12) Re ikemiselitse hore Jehova a se ke a re lahla hobane feela re batla ho pholosa bophelo ba rōna ba hona joale, etsoe re kholisehile hore haeba re lula re tšepahala ho Molimo, re tla “tšoara ka tieo bophelo ba sebele,” e leng bophelo bo sa feleng tsamaisong e ncha ea lintho eo a e tšepisitseng.​—1 Tim. 6:12, 19; 2 Pet. 3:13.

⁷ Ho na le lebaka le leng le etsang hore re qobe ho tšoenyeha ho tlōla tekano ka bophelo ba rōna. Ho tšoenyeha ho tlōla tekano ka bophelo ba rōna ho ka qetella ho entse hore re be baikhabi. Pauluse o ile a lemosa ka kotsi ena ha a ne a khothalletsa Bafilipi hore ‘ba se ke ba hlokomela lithahasello tsa litaba tsa bona feela, empa hape ba hlokomele lithahasello tsa ba bang.’ (Bafil. 2:4) Ke ntho e nepahetseng hore re itlhokomele ka tsela e leka-lekaneng, empa thahasello ea sebele eo re e bontšang ho barab’abo rōna le ho batho bao re ba tlisetsang “litaba tsena tse molemo tsa ’muso” e tla etsa hore re se ke ra tšoenyeha ho tlōla tekano ka bophelo ba rōna bo botle ba ’mele.​—Mat. 24:14.

8. Ho tšoenyeha ho tlōla tekano ka bophelo ba rōna ho ka ’na ha etsa hore re qetelle re entse eng?

⁸ Ho na le kotsi ea hore Mokreste a ka ’na a lumella litaba tse amanang le bophelo bo botle hore li mo sitise ho sebeletsa Jehova. Ho ameha ho tlōla tekano ka litaba tsa kalafo ho ka boetse ha etsa hore re leke ho qobella batho ba bang hore ba amohele maikutlo a rōna mabapi le bohlokoa ba ho ja ka tsela e itseng, phekolo ea mofuta o itseng kapa motsoako o eketsang phepo ’meleng. Mabapi le taba ena, nahana ka molao-motheo o fumanoang mantsoeng ana a Pauluse: ‘Nepisisa lintho tsa bohlokoa haholo, e le hore u hloke sekoli le hore u se ke ua khopisa ba bang ho fihlela letsatsing la Kreste.’​—Bafil. 1:10.

Ke Sefe Seo e Leng sa Bohlokoa Haholo?

9. E ’ngoe ea lintho tsa bohlokoa haholo tseo re sa lokelang ho li hlokomoloha ke eng, hona hobane’ng?

⁹ Haeba re nepisisa lintho tseo e leng tsa bohlokoa haholo, re tla kopanela ka mafolofolo mosebetsing oa ho phekola batho moeeng. O finyelloa ka ho bolela le ho ruta Lentsoe la Molimo. Mosebetsi ona o thabisang o re ruisa molemo ’me o ruisa le bao re ba rutang molemo. (Liprov. 17:22; 1 Tim. 4:15, 16) Ka linako tse ling makasine ea Molula-Qhooa le ea Tsoha! e ba le lihlooho tse buang ka bara le barali babo rōna ba nang le mafu a kotsi. Ka linako tse ling lihlooho tsena li hlalosa hore na batho bao ba khona joang ho sebetsana le mathata a bona kapa hore na ba itebatsa ’ona joang ka nakoana ka ho leka ho thusa ba bang ho tseba Jehova le litšepiso tsa hae tse hlollang.a

10. Ke hobane’ng ha ho tsotelleha hore na re khetha kalafo ea mofuta ofe?

¹⁰ Ha a kula, Mokreste e mong le e mong eo e leng motho e moholo o lokela ho “jara mojaro oa hae” oa boikarabelo ha a khetha mofuta oa phekolo. (Bagal. 6:5) Leha ho le joalo, re lokela ho hopola hore Jehova oa tsotella hore na re khetha kalafo ea mofuta ofe. Feela joalokaha ho hlompha melao-motheo ea Bibele ho re susumelletsa hore re “ile . . . mali,” ka tsela e tšoanang, ho hlompha Lentsoe la Molimo haholo, ho lokela ho re susumelletsa ho qoba mefuta ea kalafo e ka re ntšang kotsi moeeng kapa ea senya kamano ea rōna le Jehova. (Lik. 15:20) Mekhoa e meng ea ho hlahloba mafu le ea ho a alafa e bonahala e amana le boselamose. Jehova o ile a nyatsa Baiseraele ba bakoenehi ba ileng ba sebelisa “matla a boselamose,” kapa mekhoa ea ho sebelisana le meea. O ile a re: “Khaotsang ho tlisa linyehelo tse ling hape tsa lijo-thollo tsa lefeela. Libano—li manyala ho ’na. Khoeli e thoasitseng le sabatha, ho bitsoa ha kopano—nke ke ka mamella tšebeliso ea matla a boselamose hammoho le seboka se hlomphehang.” (Esa. 1:13) Ha re kula, ho hang eo hase nako ea hore re etse ntho e ka ’nang ea sitisa lithapelo tsa rōna le e ka senyang kamano ea rōna le Molimo.​—Lillo 3:44.

“Ho Hlaphoheloa Kelellong” Hoa Hlokahala

11, 12. “Ho hlaphoheloa kelellong” ho ameha joang ha re khetha mofuta oa phekolo?

¹¹ Ha re kula, re ke ke ra lebella hore Jehova a re phekole ka mohlolo, empa re ka rapella hore a re fe bohlale ha re khetha mofuta oa phekolo. Re lokela ho lumella melao-motheo ea Mangolo le ho hlaphoheloa kelellong hore li re tataise ha re khetha mofuta oa phekolo. Haeba ho khoneha, ha boemo bo sa jese litheohelang, e ka ’na ea e-ba bohlale ho ea lingakeng tse ’maloa tse nang le tsebo e khethehileng, tumellanong le keletso e ho Liproverbia 15:22, e reng: “Merero ea senyeha moo ho se nang lekunutu, empa ha baeletsi ba le bangata ho na le se finyelloang.” Moapostola Pauluse o ile a khothalletsa balumeli-’moho le eena ‘hore ba phele ka ho hlaphoheloa kelellong le ho loka le boinehelo ba bomolimo har’a tsamaiso ena ea hona joale ea lintho.’​—Tite 2:12.

¹² Kajeno, batho ba bangata ba iphumana ba le boemong bo tšoanang le ba mosali ea neng a kula mehleng ea Jesu. Ho Mareka 5:25, 26, rea bala: “Ho ne ho e-na le mosali e mong ea neng a khathalitsoe ke phallo ea mali ka lilemo tse leshome le metso e ’meli, ’me lingaka tse ngata li ne li mo baketse bohloko bo boholo hape o ne a sebelisitse sohle seo a nang le sona ’me o ne a sa rua molemo empa, ho e-na le hoo, o ne a bile mobe haholo.” Jesu o ile a folisa mosali eo ’me a mo tšoara ka mohau. (Mar. 5:27-34) Ha ba le tsietsing, Bakreste ba bang ba ’nile ba e-ba tekong ea ho khetha mekhoa ea ho hlahloba mafu le ea ho a phekola e khahlanong le melao-motheo ea borapeli bo hloekileng.

13, 14. (a) Satane a ka sebelisa mefuta ea phekolo eo re e khethang joang ho senya botšepehi ba rōna? (b) Ke hobane’ng ha re sa lokela ho ikamahanya le eng kapa eng e nang leha e le lefothanyana feela la matla a phahametseng tlhaho?

¹³ Satane o tla sebelisa mokhoa ofe kapa ofe ho re khelosa borapeling ba ’nete. Joalokaha a leka ho liha batho ba bang ka boitšoaro bo bobe ba ho kopanela liphate le ka lerato la lintho tse bonahalang, ka ho tšoanang o leka ho etsa hore ba bang ba se ke ba tšepahala ka ho sebelisa mekhoa e belaetsang ea phekolo e tšoanang le ho sebelisa matla a phahametseng tlhaho kapa tšebelisano le meea. Re rapela Jehova hore a re lopolle “ho ea khopo” le “tlōlong ea molao ea mofuta o mong le o mong.” Kahoo, ha rea lokela ho tanakela Satane ka ho ikamahanya le ntho efe kapa efe e amanang le tšebelisano le meea le matla a phahametseng tlhaho.​—Mat. 6:13; Tite 2:14.

¹⁴ Jehova o ile a thibela Baiseraele ho sebelisa bonohe le boselamose. (Deut. 18:10-12) Pauluse o thathamisa “tšebelisano le meea” le “mesebetsi ea nama.” (Bagal. 5:19, 20) Ho feta moo, “ba sebelisanang le meea” ba ke ke ba e-ba le sebaka tsamaisong e ncha ea lintho ea Jehova. (Tšen. 21:8) Joale, ho hlakile hore ntho efe kapa efe e nang leha e le lefothanyana feela la tšebelisano le meea, e manyala ho Jehova.

“Ho ba le Kahlolo e Molemo ha Lōna ho ke ho Tsejoe”

15, 16. Ke hobane’ng ha re hloka bohlale ha re khetha mofuta oa kalafo, ’me sehlopha se busang sa lekholong la pele la lilemo se ile sa fana ka keletso efe e bohlale?

¹⁵ Ha re nahana ka sena, hoa hlaka hore haeba mokhoa o itseng oa ho hlahloba mafu kapa oa ho a phekola o belaetsa, ho tla be ho loketse hore re o hane. Ka lehlakoreng le leng, ha rōna re sa khone ho hlalosa kamoo mokhoa o itseng oa ho phekola o sebetsang kateng, seo hase bolele hore mokhoa oo o amana le tšebelisano le meea ka tsela e itseng. Ho ba le pono ea Mangolo litabeng tsa kalafo ho hloka hore re be le bohlale ba bomolimo le kahlolo e molemo. Ho Liproverbia khaolo ea 3 re fumana keletso e reng: “Tšepa Jehova ka pelo ea hao eohle ’me u se ke ua itšetleha ka kutloisiso ea hao. U mo ele hloko litseleng tsohle tsa hao, ’me o tla otlolla litsela tsa hao. . . . Sireletsa bohlale bo sebetsang le matla a ho nahana, ’me e tla ba bophelo moeeng oa hao.”​—Liprov. 3:5, 6, 21, 22.

¹⁶ Le hoja re etsa matsapa a hore re lule re phela hantle ’meleng ka hohle kamoo re ka khonang kateng, re tlameha ho ba hlokolosi hore re se ke ra senya kamano ea rōna le Molimo ha re leka ho sebetsana ka katleho le ho kula kapa botsofali. Joaloka litabeng tse ling, le litabeng tsa kalafo re lokela ho etsa hore ‘ho ba le kahlolo e molemo ha rōna ho ke ho tsejoe ke batho bohle’ ka hore re phele tumellanong le melao-motheo ea Bibele. (Bafil. 4:5) Lengolong leo e neng e le la bohlokoa haholo, sehlopha se busang sa lekholong la pele la lilemo se ile sa laela Bakreste hore ba ile borapeli ba litšoantšo, mali le bohlola. Lengolo leo le ne le akarelletsa tiisetso e reng: “Haeba le phema lintho tsena, le tla atleha.” (Lik. 15:28, 29) Ka tsela efe?

Ho Itlhokomela ka Tsela e Loketseng ka Tšepo ea ho Fumana Bophelo bo Phethahetseng

17. Re ruile molemo oa ho phela hantle ’meleng joang ka lebaka la ho khomarela melao-motheo ea Bibele?

¹⁷ E mong le e mong oa rōna o lokela ho ipotsa: ‘Na ke utloisisa ka botlalo hore na ke atlehile hakae ka lebaka la ho mamela ka hohle-hohle melao-motheo ea Bibele tabeng ea mali le bohlola?’ Hape, nahana ka melemo eo re e fumaneng ka lebaka la ho loanela ho ‘itlhatsoa litšila tsohle tsa nama le tsa moea.’ (2 Bakor. 7:1) Ha re khomarela melao-motheo ea Bibele tabeng ea bohloeki, re qoba maloetse a mangata. Rea atleha hobane re qoba ho tsuba koae le ho sebelisa lithethefatsi tse ling tse seng molaong tse ka re silafatsang moeeng le ’meleng. Hape nahana ka melemo ea bophelo bo botle e tlisoang ke ho ja le ho noa ka teka-tekano. (Bala Liproverbia 23:20; Tite 2:2, 3.) Le hoja ho phomola le ho ikoetlisa ho ka ’na ha ntlafatsa bophelo ba rōna, ka sebele, ka ho khetheha re phela hantle ’meleng le moeeng hobane re lumela ho tataisoa ke Mangolo.

18. Ke eng eo re lokelang ho ameha haholo ka eona, ’me re ka lebella ho phethahala ha boprofeta bofe bo mabapi le bophelo bo botle?

¹⁸ Taba ea bohlokoa ka ho fetisisa, re lokela ho hlokomela hore re phela hantle moeeng re be re matlafatse kamano ea rōna ea bohlokoa le Ntate oa rōna ea leholimong, e leng eena Mohloli oa ‘bophelo ba hona joale le oa bo tlang ho tla’ lefatšeng la hae le lecha le tšepisitsoeng. (1 Tim. 4:8; Pes. 36:9) Lefatšeng le lecha la Molimo, batho ba tla phekoloa ka ho feletseng moeeng le nameng ka lebaka la ho tšoareloa libe motheong oa sehlabelo sa Jesu sa thekollo. Konyana ea Molimo, Kreste Jesu, e tla re tataisetsa “lilibeng tsa metsi a bophelo,” ’me Molimo o tla hlakola meokho eohle mahlong a rōna. (Tšen. 7:14-17; 22:1, 2) Joale, re tla boela re bone ha boprofeta bona bo hlollang bo phethahala: “Ha ho moahi ea tla re: ‘Kea kula.’”​—Esa. 33:24.

19. Ha re ntse re hlokomela bophelo ba rōna ka tsela e loketseng re ka kholiseha ka eng?

¹⁹ Re kholisehile hore topollo ea rōna e atametse, ’me re letetse ka tjantjello e khōlō ho bona letsatsi leo ka lona Jehova a tla felisa ho kula le lefu. Ha re sa ntse re letetse nako eo, re kholisehile hore Ntate oa rōna ea lerato o tla re thusa ho mamella mathata a rōna a ho kula, hobane ‘oa re tsotella.’ (1 Pet. 5:7) Ka lebaka leo, a re hlokomeleng bophelo ba rōna empa ka linako tsohle re bo hlokomele tumellanong le tataiso e hlakileng ea Lentsoe le bululetsoeng la Molimo!

[Mongolo o botlaaseng ba leqephe]

Tlhahlobo

• Ke mang ea ikarabellang ka ho kula, ’me ke mang ea tla re lopolla mathateng a bakoang ke sebe?

• Le hoja e le ntho e tloaelehileng hore re khathatsehe ka bophelo ba rōna, re lokela ho qoba eng?

• Ke hobane’ng ha Jehova a tsotella hore na re khetha kalafo ea mofuta ofe?

• Ho khomarela melao-motheo ea Bibele ho ka re tsoela molemo joang mabapi le bophelo ba rōna?

[Setšoantšo se leqepheng la 23]

Batho ba ne ba sa bōpeloa hore ba kule le hore ba tsofale

[Setšoantšo se leqepheng la 23]]

Ho sa tsotellehe mathata a bophelo, batho ba Jehova ba thabela tšebeletso ea tšimo