Balebeli le Bahlanka ba Sebeletsang ba Behoa ka Tsela ea Puso ea Molimo
“Ikeleng hloko ’me le ele hloko le mohlape oohle, oo moea o halalelang o le behileng balebeli har’a oona.”—LIKETSO 20:28.
1, 2. Esaia 60:22 e phethahala joang?
KE KHALE Jehova a boletse hore ho tla etsahala ntho e hlollang nakong ea bofelo. Ka moprofeta Esaia, ho itsoe: “E monyenyane o tla fetoha ba sekete, ’me ea fokolang e be sechaba se matla. ’Na, Jehova, ke tla ho potlakisa ka nako ea teng.”—Esaia 60:22.
2 Na ho na le bopaki ba hore boprofeta boo boa phethahala kajeno? E, bo teng! Ka bo-1870, ho ile ha thehoa phutheho e le ’ngoe ea batho ba Jehova Allegheny, Pennsylvania, U.S.A. Ho tloha qalong eo e nyenyane, ho hlahile liphutheho tse likete tse mashome ’me li hōla haholo lefatšeng lohle. Hona joale sechaba se matla sa baboleli ba ’Muso ba limilione se kopanela liphuthehong tse fetang 91 000 linaheng tse 235 lefatšeng lohle. Ntle ho pelaelo sena se tiisa hore Jehova o potlakisa ho bokelloa ha barapeli ba ’nete pele ho qhoma ‘matšoenyeho a maholo,’ a atametseng haholo hona joale.—Matheu 24:21; Tšenolo 7:9-14.
3. Ho kolobetsoa ‘ka lebitso la Ntate, la Mora le la moea o halalelang’ ho bolela eng?
3 Ka mor’a hore bana ba limilione ba inehele ho Jehova, tumellanong le litaelo tsa Jesu, ba ile ba kolobetsoa “ka lebitso la Ntate le la Mora le la moea o halalelang.” (Matheu 28:19) Ho kolobetsoa “ka lebitso la Ntate” ho bolela hore batho bana ba inehetseng ba hlokomela hore Jehova ke Ntate oa bona oa leholimo le Monehi-Bophelo ’me ba ikokobelletsa bobusi ba hae. Ho kolobetsoa ‘ka lebitso la Mora’ ho bolela hore ba hlokomela hore Jesu Kreste ke Morekolli oa bona, Moeta-pele le Morena. Ba boetse ba hlokomela karolo ea moea o halalelang oa Molimo, kapa matla a sebetsang ha o tataisa bophelo ba bona. Sena se bolela hore ba kolobelitsoe ‘ka lebitso la moea o halalelang.’
4. Basebeletsi ba Bakreste ba khethoa joang?
4 Ha barutuoa ba bacha ba kolobetsoa, ba khethoa hore e be basebeletsi ba Jehova Molimo. Ba khethoa ke mang? Ha e le hantle, mantsoe a tlalehiloeng ho 2 Bakorinthe 3:5 a sebetsa ho bona ha a re: “Ho tšoaneleha ha rōna ka ho lekaneng [re le basebeletsi] ho tsoa ho Molimo.” Ha ho na tlotla eo ba neng ba ka e lakatsa e fetang ea ho khethoa ke Jehova Molimo ka boeena! Ka mor’a hore ba kolobetsoe, ba tla tsoela pele ho hōla moeeng e le basebeletsi ba ‘litaba tse molemo’ hafeela ba lumela hore moea oa Molimo o ba etelle pele ’me ba tsoela pele ho sebelisa Lentsoe la hae.—Matheu 24:14; Liketso 9:31.
Ho Behoa ka Tsela ea Puso ea Molimo—Eseng ea Puso ea Sechaba ka Sechaba
5. Na balebeli ba Bakreste le bahlanka ba sebeletsang ba khethoa ka tsela ea puso ea sechaba ka sechaba? Hlalosa.
5 Kaloso ea balebeli ba tšoanelehang e bontšang ho hōla tsebong le thuso e bontšang tsebo ea bahlanka ba sebeletsang, lia hlokahala bakeng sa ho hlokomela basebeletsi ba mafolofolo ba ntseng ba eketseha ka seo ba se hlokang moeeng. (Bafilipi 1:1) Banna bao ba moea ba behoa joang? Eseng ka mekhoa e kang e sebelisoang Bokreste-’mōtoaneng. Ka mohlala, balebeli ba Bakreste ha ba khethoe ka tsela ea puso ea sechaba ka sechaba, ke hore, ka ho vouteloa ke batho ba bangata ba kopanelang phuthehong ea habo bona. Ho e-na le hoo, ba behoa ka tsela ea puso ea Molimo. Seo se bolela’ng?
6. (a) Puso ea Molimo ea sebele ke eng? (b) Ke hobane’ng ha balebeli le bahlanka ba sebeletsang ba behoa ka tsela ea puso ea Molimo?
6 Ha e hlalosoa ka tsela e bonolo feela, puso ea Molimo ea sebele ke puso eo ho eona Molimo e leng eena ea busang. Lipaki tsa Jehova ka boithaopo li ikokobelletsa puso ea hae ’me li sebelisana hammoho e le hore li etse thato ea Molimo. (Pesaleme ea 143:10; Matheu 6:9, 10) Balebeli ba Bakreste, kapa baholo le bahlanka ba sebeletsang ba behoa ka tsela ea puso ea Molimo hobane ho buelloa le ho behoa ha banna ba joalo ba nang le boikarabelo ho etsoa ho latela tokisetso ea Molimo joalokaha e bontšitsoe ka Mangolong a Halalelang. Kaha Jehova ke “hlooho ka holim’a tsohle,” ka sebele o na le tokelo ea ho rera kamoo mokhatlo oa hae o bonahalang o tla sebetsa kateng.—1 Likronike 29:11; Pesaleme ea 97:9.
7. Lipaki tsa Jehova li busoa joang?
7 Ho fapana le malumeli a mangata a Bokreste-’mōtoana, Lipaki tsa Jehova ha li iketsetse qeto ea hore na li tla sebetsa tlas’a tsamaiso ea moea ea mofuta ofe. Bakreste bana ba ’nete ba leka ka matla ho khomarela litekanyetso tsa Jehova. Balebeli ba har’a tsona ha ba behoe boemong boo ba leng ho bona ke mofuta o itseng oa tsamaiso ea kereke o kang litho tsa phutheho, ba boholong kerekeng kapa presbitheri. Haeba mekhoa e itseng ea lefatše e batla ho kena-kenana le ho behoa ha bona, batho ba Jehova ba hana ho sekisetsa. Ba ema ba tiile boemong boo baapostola ba ileng ba bo hlakisa hantle lekholong la pele la lilemo ha ba ne ba re: “Re tla mamela Molimo e le ’musi ho e-na le batho.” (Liketso 5:29) Kahoo, Lipaki li ikokobelletsa Molimo linthong tsohle. (Baheberu 12:9; Jakobo 4:7) Ho latela tsamaiso ea puso ea Molimo ho fella ka kamohelo ea Molimo.
8. Mekhoa ea puso ea sechaba ka sechaba le ea puso ea Molimo e fapana joang?
8 Kaha re bahlanka ba Jehova, ’Musi e Moholo oa Puso ea Molimo, re tla be re etsa hantle ha re hopola phapang pakeng tsa tsamaiso ea puso ea sechaba ka sechaba le ea puso ea Molimo. Tsamaiso ea puso ea sechaba ka sechaba e buella boemeli bo lekanang ’me e atisa ho khetholloa ka letšolo la ho iketa hore motho a behoe litulong le ho khethoa ke bongata. Tsamaiso e joalo ha e sebelisoe ha ho behoa batho ka tsela ea puso ea Molimo. Hase batho ba ba behang; ebile ha ba behoe ke lekhotla le itseng la molao. Ho totobetse hore ha Pauluse a bua ka hore o behiloe ke Jesu le Jehova hore e be “moapostola ho lichaba,” o ne a bolella Bagalata hore o behiloe ‘eseng ke batho kapa ke motho, empa ke Jesu Kreste le Molimo Ntate, ea ileng a mo tsosa bafung.’—Baroma 11:13; Bagalata 1:1.
Ho Behoa ke Moea o Halalelang
9. Liketso 20:28 e re’ng ka ho behoa ha balebeli ba Bakreste?
9 Ha Pauluse a ne a hopotsa balebeli ba lulang Efese hore ba behiloe ke Molimo ka moea o halalelang o itse: “Ikeleng hloko ’me le ele hloko le mohlape oohle, oo moea o halalelang o le behileng balebeli har’a oona, hore le lise phutheho ea Molimo, eo a e rekileng ka mali a Mora oa hae.” (Liketso 20:28) Ho ne ho hlokahala hore moea o halalelang o ’ne o etelle pele balebeli bao ba Bakreste ha ba ntse ba phetha mesebetsi ea bona e le balisa ba mohlape oa Molimo. Haeba motho ea neng a behiloe boemong bo itseng a se a sa finyelle litekanyetso tsa Molimo, ka nako e loketseng moea o halalelang o ne o tla mo tlosa boemong ba hae.
10. Moea o halalelang o phetha karolo ea bohlokoahali joang ho ba behoang ka tsela ea puso ea Molimo?
10 Re ka re moea o halalelang o phetha karolo ea bohlokoahali joang? Taba ea pele, tlaleho e bontšang litšoaneleho tse hlokoang ho ba alosang ba bang moeeng e bululetsoe ke moea o halalelang. Lengolong la hae le eang ho Timothea le le eang ho Tite, Pauluse o thathamisitse litekanyetso tse lokelang ho finyelloa ke balebeli le bahlanka ba sebeletsang. O buile ka litlhokahalo tse 16 tse sa tšoaneng. Ka mohlala, balebeli e ne e lokela ho ba batho ba sa nyatseheng, ba itekanetseng mekhoeng, ba hlaphohetsoeng kelellong, ba hlophisehileng, ba amohelang baeti, ba tšoanelehang bakeng sa ho ruta le lihlooho tsa malapa tse behang mohlala. Ba lokela ho itekanela tšebelisong ea lino tse tahang, ho se rate chelete, ho ba le boitšoaro. Ka mokhoa o tšoanang, banna ba neng ba hahamalla ho behoa boemong ba ho ba bahlanka ba sebeletsang ba ne ba beheloa litekanyetso tse phahameng.—1 Timothea 3:1-10, 12, 13; Tite 1:5-9.
11. Litšoaneleho tse ling tse lokelang ho finyelloa ke banna ba hahamallang boikarabelo ka phuthehong ke life?
11 Ho hlahloba litšoaneleho tsena ho bontša hore ba etellang pele borapeling ba Jehova e lokela ho ba mehlala boitšoarong ba Bokreste. Banna ba hahamallang boikarabelo ba phutheho ba lokela ho bontša hore moea o halalelang oa sebetsa ho bona. (2 Timothea 1:14) Ho lokela ho totobala hore moea oa Molimo o hlahisa ka ho banna bana litholoana tsa “lerato, thabo, khotso, tiisetso, mosa, molemo, tumelo, bonolo, boitšoaro.” (Bagalata 5:22, 23) Litholoana tse joalo li ne li tla bonahatsoa litšebelisanong tsa bona le balumeli-’moho le bona le ba bang. Ka sebele, ba bang ba ka ’na ba ipabola tabeng ea ho bonahatsa litholoana tse itseng tsa moea, ha ba bang ba ka ’na ba finyella litšoaneleho tse ling tsa bolebeli ka tekanyo e phahameng. Leha ho le joalo, tseleng ea bona ea bophelo ka kakaretso, bohle ba nang le tšepo ea ho behoa hore e be balebeli kapa bahlanka ba sebeletsang ba lokela ho bontša hore ke banna ba moea, ba finyellang seo Lentsoe la Molimo le se hlokang.
12. Ke bo-mang bao ho ka boleloang hore ba behoa ke moea o halalelang?
12 Ha Pauluse a ne a khothatsa ba bang hore e be baetsisi ba hae, o ne a ka bua ka bolokolohi hobane ka boeena o ne a etsisa Jesu Kreste, ea ‘re sietseng mohlala hore re latele mehato ea hae haufi-ufi.’ (1 Petrose 2:21; 1 Bakorinthe 11:1) Ka tsela eo, ho ka boleloa hore ba finyellang seo Mangolo a se hlokang nakong eo ka eona ba behoang ho ba balebeli kapa bahlanka ba sebeletsang ba behiloe ke moea o halalelang.
13. Moea o halalelang o thusa ba buellang banna ba lokelang ho sebeletsa ka phuthehong joang?
13 Ho na le ntlha e ’ngoe e bontšang kamoo moea o halalelang o sebetsang kateng ha ho buelloa balebeli le ha ba behoa. Jesu o ile a re ‘Ntate ea leholimong o fana ka moea o halalelang ho ba mo kōpang.’ (Luka 11:13) Ka hona, ha baholo ba phutheho ea sebaka ka seng ba kopana ho buella banna bakeng sa boikarabelo ba phutheho, ba rapella moea oa Molimo hore o ba tataise. Ba ba buella ba itšetlehile ka se boletsoeng ka Lentsoeng la Molimo le bululetsoeng, ’me moea o halalelang o ba nolofalletsa ho lemoha hore na motho ea hlahlojoang bakeng sa ho behoa o finyella seo Mangolo a se hlokang. Ba buellang motho ea itseng ha baa lokela ho susumetsoa ka ho sa lokelang ke chebahalo ea hae, thuto ea hae, kapa bokhoni ba hae ba tlhaho. Ntho e ka sehloohong eo ba lokelang ho lebisa tlhokomelo ho eona e lokela ho ba taba ea hore na ke motho oa moea, eo litho tsa phutheho li neng li ke ke tsa qeaqea ho mo atamela bakeng sa keletso ea moea.
14. Re ithuta eng ho Liketso 6:1-3?
14 Le hoja lihlopha tsa baholo li kopana le balebeli ba tsamaeang ha li buella barab’abo rōna hore ba sebeletse e le baholo le bahlanka ba sebeletsang, ha e le hantle ba behoa ho latela mohlala oa lekholo la pele la lilemo. Ka lekhetlo le leng, ho ne ho hlokahala banna ba tšoanelehang moeeng ba ka etsang mosebetsi oa bohlokoa. Sehlopha se busang se ile sa fana ka tataiso ena: “Ipatleleng banna ba supileng ba pakiloeng har’a lōna, ba tletseng moea le bohlale, e le hore re ka ba beha hore ba okamele mosebetsi ona o hlokahalang.” (Liketso 6:1-3) Ha banna ba neng ba sebetsana le boemo bona ba buella banna ba itseng, banna ba nang le boikarabelo moo Jerusalema e ne e le bona ba ba behang. Ho lateloa mohlala o tšoanang le oo kajeno.
15. Sehlopha se Busang se ameha joang tabeng ea ho beha banna?
15 Sehlopha se Busang sa Lipaki tsa Jehova ka ho toba se beha litho tsohle tsa Likomiti tsa Makala. Ha Sehlopha se Busang se etsa qeto ea hore na ke bo-mang ba ka jarang boikarabelo boo bo boima, se nahana ka polelo ea Jesu e reng: “E mong le e mong ea fuoeng ho hongata, ho tla batloa ho hongata ho eena; ’me eo batho ba behileng ho hongata taolong ea hae, ba tla batla ho fetang ho tloaelehileng ho eena.” (Luka 12:48) Ho ekelletsa ho beheng litho tsa Likomiti tsa Makala, Sehlopha se Busang se beha baholo ba Bethele le balebeli ba tsamaeang. Leha ho le joalo, se laela barab’abo rōna ba ka tšeptjoang ho se emela ha ho behoa batho likabelong tse ling. Le tabeng ena ho na le mohlala oa Mangolo.
‘Ba Behe, Joalokaha ke Ile ka U fa Litaelo’
16. Ke hobane’ng ha Pauluse a ile a siea Tite Kreta, ’me see se bontša eng mabapi le ba behoang ka tsela ea puso ea Molimo kajeno?
16 Pauluse o ile a bolella Tite, eo e neng e le mosebetsi-’moho le eena, a re: “Ke ka lebaka lena ke ileng ka u siea Kreta, e le hore u ka lokisa lintho tse neng li e-na le moo li haelloang le hore u ka beha banna ba baholo motseng o mong ka mor’a o mong, joalokaha ke ile ka u fa litaelo.” (Tite 1:5) Joale Pauluse o ile a thathamisa litšoaneleho tseo Tite a neng a lokela ho li sheba ho banna ba neng ba tla tšoaneleha hore ba behoe. Ka lebaka leo, kajeno Sehlopha se Busang se beha barab’abo rōna ba tšoanelehang makaleng hore ba se emele tabeng ea ho beha baholo le bahlanka ba sebeletsang. Ho eloa hloko hore ba emelang Sehlopha se Busang ba utloisise ka ho hlaka ba be ba latele tataiso ea Mangolo ha ba beha batho ba joalo. Kahoo, tlas’a tataiso ea Sehlopha se Busang, banna ba tšoanelehang ba behoa hore ba sebeletse liphuthehong tsa Lipaki tsa Jehova lefatšeng ka bophara.
17. Ofisi ea lekala e sebetsana joang le ba buelloang hore ba behoe e le baholo le bahlanka ba sebeletsang?
17 Ha mabitso a ba buelloang hore e be baholo le bahlanka ba sebeletsang a romeloa ofising ea lekala ea Mokhatlo oa Watch Tower, banna ba nang le phihlelo ba itšetleha ka moea oa Molimo hore o ba tataise ha ba ba beha. Banna bana ba ikutloa ba ikarabella, ba hlokomela hore ha baa lokela ho potlakela ho beha monna ofe kapa ofe matsoho, esere ba kopanela libeng tsa hae.—1 Timothea 5:22.
18, 19. (a) Mabitso a mang a ba behoang a romeloa joang? (b) Tsela eohle ea ho buella batho le ho ba beha e etsoa joang?
18 Ba bang ba ka ’na ba behoa ka hore ho romeloe lengolo le nang le setempe sa mokhatlo. Lengolo le joalo le ka sebelisetsoa ho beha barab’abo rōna ba ’maloa ka phuthehong.
19 Ba behoang ka tsela ea puso ea Molimo, ba behoa ke Jehova ka Mora oa hae le ka mocha oa Molimo o bonahalang oa lefatšeng, “lekhoba le tšepahalang le le masene” le Sehlopha se Busang sa lona. (Matheu 24:45-47) Tsela ena eohle ea ho buella le ho beha e etsoa tlas’a tsamaiso, kapa tataiso ea moea o halalelang. Ho joalo hobane litšoaneleho li bontšitsoe Lentsoeng la Molimo, le bululetsoeng ka moea o halalelang, ’me motho ea behoang o bontša hore o beha litholoana tsa moea oo. Ka lebaka leo, ba behoang ba lokela ho talingoa e le ba behiloeng ke moea o halalelang. Feela joalokaha balebeli le bahlanka ba sebeletsang ba ne ba behiloe ka tsela ea puso ea Molimo lekholong la pele la lilemo, ho joalo le kajeno.
Ho Ananela Tataiso ea Jehova
20. Ke hobane’ng ha re e-na le boikutlo bo tšoanang le ba Davida bo tlalehiloeng Pesalemeng ea 133:1?
20 Nakong ena ea katleho ea moea le ho atoloha ha puso ea Molimo mosebetsing oa boboleli ba ’Muso, re leboha hore ebe Jehova ke eena ea ka sehloohong ea ikarabellang bakeng sa ho beha balebeli le bahlanka ba sebeletsang. Tokisetso ena ea Mangolo e thusa hore har’a rōna re le Lipaki tsa Jehova re boloke litekanyetso tse phahameng tsa Molimo tsa ho loka. Ho feta moo, moea oa Bokreste le boiteko bo matla ba banna bana li tlatsetsa haholo khotsong ea rōna e ikhethang le bonngoeng ba rōna re le bahlanka ba Jehova. Ka lebaka leo, joaloka mopesaleme Davida, re susumelletseha ho re: “Bonang! Kamoo ho leng hotle le kamoo ho khahlisang kateng ha bara ba motho ba lula hammoho bonngoeng!”—Pesaleme ea 133:1.
21. Esaia 60:17 e phethahala joang kajeno?
21 Re ananela hakaakang hore ebe Jehova o re tataisa ka Lentsoe la hae le moea o halalelang! Ka sebele mantsoe a tlalehiloeng ho Esaia 60:17 aa utloahala ha a re: “Ke tla tlisa khauta ho e-na le koporo, ke tla tlisa silevera ho e-na le tšepe, ’me ke tla tlisa koporo, ho e-na le lehong, ke tlise tšepe, ho e-na le majoe; ke tla beha khotso hore e be balebeli ba hao le ho loka hore e be ba u abelang mosebetsi.” Joalokaha tsamaiso ea puso ea Molimo e ’nile ea tsoela pele ho sebelisoa har’a Lipaki tsa Jehova, re latsoitse tlhohonolofatso ena mokhatlong oohle o hlophisitsoeng oa Molimo lefatšeng lohle.
22. Ke’ng eo ka nepo re e ananelang, ’me re lokela ho ikemisetsa ho etsa eng?
22 Re ananela haholo litokisetso tsa puso ea Molimo tseo re li etselitsoeng. Re ananela haholo mosebetsi o boima empa e le o khotsofatsang o etsoang ke balebeli le bahlanka ba sebeletsang ba behoang ka tsela ea puso ea Molimo. Ka pelo eohle re tlotlisa Ntate oa rōna oa leholimo ea lerato, ea entseng hore re atlehe moeeng ’me a re hlohonolofalitse ka ho enneng. (Liproverbia 10:22) Ka lebaka leo, a re ikemisetseng ho khema le mokhatlo o hlophisitsoeng oa Jehova. Ka holimo ho tsohle, a re tsoeleng pele ho sebeletsa hammoho bonngoeng re isa tlotla, thoriso le khanya lebitsong la Jehova le leholo le halalelang.
U ne U Tla Araba Joang?
•Ke hobane’ng ha re ka bolela hore balebeli le bahlanka ba sebeletsang ba behoa ka tsela ea puso ea Molimo eseng ka tsela ea puso ea sechaba ka sechaba?
•Banna ba Bakreste ba ikarabellang ba khethoa ke moea o halalelang ka tsela efe?
•Sehlopha se Busang se ameha joang tabeng ea ho beha balebeli le bahlanka ba sebeletsang?
•Ke hobane’ng ha re lokela ho leboha Jehova ka ho beha batho likabelong ka tsela ea puso ea Molimo?
[Litšoantšo tse leqepheng la 15]
Baholo le bahlanka ba sebeletsang ba na le tokelo ea ho sebeletsa kabelong ea puso ea Molimo