Lipaki Tsa Jehova—Li Hatela Pele ka Kholiseho e Tiileng!

Tlaleho ea Seboka sa Selemo le Selemo

MATSATSING ana a ho qeaqea le ho ba le khoao, Lipaki tsa Jehova lia ikhetha ka ho ba Bakreste ba emeng ka kholiseho e tiileng. Sena se ile sa hlakisoa sebokeng sa selemo le selemo sa Watch Tower Bible and Tract Society of Pennsylvania, se neng se tšoaretsoe Holong ea Kopano ea Lipaki tsa Jehova ea Jersey City, New Jersey, ka Moqebelo oa la 7 October, 2000.a

Puong ea hae ea selelekela, molula-setulo, John E. Barr, eo e leng setho sa Sehlopha se Busang sa Lipaki tsa Jehova, o ile a re: “Har’a ba limilione tse likete lefatšeng, rea tseba re bile rea lumela hore Mora oa Jehova ea ratoang, Kreste Jesu, hona joale o lutse teroneng maholimong, o busa har’a lira tsa hae.” Ho ile ha fanoa ka bopaki ba kholiseho eo e tiileng litlalehong tse tšeletseng tse thabisang tse tsoang lefatšeng lohle.

Ho Fenya Tumelo ea Balimo ka ’Nete ea Bibele Haiti

Tšebelisano le meea e atile haholo Haiti. John Norman, mohokahanyi oa Komiti ea Lekala, ha a pheta litaba o re: “Hangata batho e ba litho tsa bolumeli ba voodoo e le hore ba sireletsehe.” Ngakana-ntšonyana e ’ngoe e ile ea e-ba le lipelaelo ha e khaoha leoto ka tšohanyetso. E ile ea ipotsa: ‘See se ka nketsahalla joang haeba balimo ba ntširelelitse?’ Joaloka ba bang ba bangata, Lipaki tsa Jehova li ile tsa ruta monna enoa ’nete ’me o ile a thusoa ho ikarola tumelong ea balimo. Ho bontša hore ho na le monyetla oa khōlo Haiti, ka la 19 April, 2000, palo ea ba neng ba le teng Sehopotsong sa lefu la Kreste e ne e lekana le ea bahoeletsi ba ’Muso ba naha eo e mennoe hane.

Cheseho Tšimong ea Korea e Nammeng

Korea, karolo ea 40 lekholong ea Lipaki tsa Jehova e tšebeletsong ea nako e tletseng. Milton Hamilton, mohokahanyi oa Komiti ea Lekala, o ile a re: “Kaha ho na le lebotho lena le leholohali, tšimo ea rōna ea batho ba fetang limilione tse 47 e akaretsoa hoo e ka bang hang ka khoeli.” Khōlo e liphuthehong tsa puo ea matsoho e totobetse. Potolohong e ’ngoe ea puo ea matsoho, ho khannoa lithuto tsa Bibele tse 800. Ena ke karolelano ea thuto e le ’ngoe bakeng sa mohoeletsi ka mong. Ka masoabi, barab’abo rōna ba bacha ba sa ntse ba kenngoa teronkong ka lebaka la ho se jele paate. Leha ho le joalo, Bakreste bana ba tšepahalang ba tšoaroa hantle ’me hangata ba fuoa mesebetsi e etsoang ke batho ba ka tšeptjoang.

Ho Finyella se Hlokahalang Bakeng sa Khōlo Mexico

Tlhōrō ea baboleli ba ’Muso ba 533 665 e ile ea tlaleha tšebeletso ea tšimo Mexico ka August 2000. Palo ea ba bileng teng Sehopotsong e ne e feta ea bahoeletsi bao e mennoe hararo. Robert Tracy, mohokahanyi oa Komiti ea Lekala o ile a re: “Pakane ea rōna ea selemo sena ke ho haha Liholo tse ling tsa ’Muso tse 240.” O ile a eketsa: “Ho ntse ho le joalo, re hloka tse ling tse ngata.”

Bacha ba Lipaki tsa Jehova ba Mexico ke mehlala. Moprista e mong oa K’hatholike ha a bua ka mohlankana e mong o ile a re: “Ke ne nka rata ho ba le a le mong feela ea kang eena har’a balateli ba ka. Batho bana baa nkhahla hobane ba ikemiselitse ka matla ba bile ba sebelisa Bibele ka bohlale. Ba ’nile ba emela Molimo, esita leha bophelo ba bona bo le kotsing.”

Ho Tšepahala Har’a Merusu Sierra Leone

Ho tloha ka April 1991, ha ntoa ea lehae e qhoma Sierra Leone, batho ba likete ba bolailoe, ba holofatsoa kapa ba khaoloa litho. Bill Cowan, mohokahanyi oa Komiti ea Lekala, o ile a etsa tlaleho ena: “Ntoa le mathata li bile le phello e tebileng bathong. Ba bangata ba neng ba iphapanyetsa molaetsa oa rōna hona joale ba mamela ka thahasello. Ho tloaelehile hore batho, leha re e-s’o ba meme, ba itlise Holong ea ’Muso ebile e le ka lekhetlo la pele ho tla mamela. Hangata barab’abo rōna ba emisoa seterateng ke batho ba kōpang ho khanneloa thuto ea Bibele.” Ho sa tsotellehe ho se tsitse ho ntseng ho ja setsi Sierra Leone, mosebetsi oa ho bolela ka ’Muso o beha litholoana naheng eo.

Lenaneo la Kaho le Nammeng Afrika Boroa

Hona joale, ho hlokahala Liholo tsa ’Muso tse likete tse ’maloa tšimong ena e hlokomeloang ke ofisi ea lekala ea Afrika Boroa. Liholo tse makholo li se li ahiloe. John Kikot, setho sa Komiti ea Lekala, o ile a re: “Ho e-na le hore barab’abo rōna ba kopanele mek’huk’hung kapa ka tlas’a lifate, joalokaha ba ne ba etsa pele, ba se ba kopanela libakeng tse loketseng tseo ba lulang hantle ho tsona. Le hoja bongata ba Liholo tsena tsa ’Muso e le tsa boemo bo itekanetseng, hangata li ikhetha ka ho ba mehaho e nang le seriti ka ho fetisisa libakeng tseo li leng ho tsona. Libakeng tse ling, ho hlokometsoe hore ka mor’a hore Holo ea ’Muso e hahuoe, selemong se latelang palo ea litho tsa phutheho e feta ea pele e mennoe habeli.”

Moloko o Mocha oa Lipaki Ukraine

Selemong sa tšebeletso sa 2000, ho bile le tlhōrō ea bahoeletsi ba 112 720 naheng ena. Ba fetang 50 000 ho bona ba ithutile ’nete ea Bibele lilemong tse hlano tse fetileng. John Didur, mohokahanyi oa Komiti ea Lekala, o ile a re: “Ka sebele, Jehova o hlahisitse moloko o mocha oa bacha ba Lipaki hore o bolele lebitso la hae!” O ile a eketsa: “Lilemong tse peli tse fetileng, re abile limakasine tse fetang limilione tse 50, e leng palo e lekanang le ea baahi ba naha eo. Khoeli ka ’ngoe, ka karolelano, re amohela mangolo a sekete a tsoang ho batho ba thahasellang ba kōpang boitsebiso bo eketsehileng.”

Litšobotsi Tse Ling Tse Hlasimollang Tsa Lenaneo Lena

Daniel Sydlik, setho sa Sehlopha se Busang, o ile a fana ka puo e hapang tlhokomelo. Sehlooho sa eona se reng, “Kamoo Sehlopha se Busang se Fapanang Kateng le Mokhatlo o Ngolisitsoeng ka Molao,” se hlaha makasineng ena, ’me se thehiloe puong eo e rutang.

Theodore Jaracz oa Sehlopha se Busang o ile a fana ka puo e susumetsang monahano eo sehlooho sa eona se reng, “Balebeli le Bahlanka ba Sebeletsang ba Khethoa ka Tsela ea Puso ea Molimo.” Sehlooho se seng se hlahang makasineng ena se thehiloe tabeng eo.

Seboka sa selemo le selemo se ne se boetse se akarelletsa puo e hlasimollang e ileng ea fanoa ke David Splane, eo e leng setho sa Sehlopha se Busang, e neng e le mabapi le temana ea selemo ea 2001. E thehiloe mantsoeng a moapostola Pauluse ’me sehlooho sa eona se re: ‘Le eme le feletse le ka kholiseho e tiileng thatong eohle ea Molimo.’ (Bakolose 4:12) Lipaki tsa Jehova lefatšeng lohle li ikemiselitse ho etsa seo ha ka botšepehi li ntse li bolela litaba tse molemo tsa ’Muso oa Molimo lefatšeng lohle.—Matheu 24:14.

[Mongolo o botlaaseng ba leqephe]