“Lintho tse Hahang Litebello tsa Rōna”
HO NE ho futhumetse hoseng ka Sontaha, Loetse 10, ha ba 4155 ba ne ba bokane Holong e ntle ea Kopano ea Lipaki tsa Jehova Jersey City, New Jersey, bakeng sa ketsahalo ea ho ntšoa ha mangolo a liithuti tsa sehlopha sa bo87 sa Sekolo sa Gileade sa Bibele sa Watchtower. Ho ba neng ba le teng e ne e le liithuti tse 24 le baeti ba memiloeng hammoho le litho tsa lelapa la Bethele la Brooklyn le mapolasi a Mokhatlo.
Bamameli ba ile ba itokisetsa lenaneo hantle ka hora ea 10:00 hoseng, ha Albert Schroeder ea neng a sebeletsa e le molula-setulo oa letsatsi leo, a ba laela ho etsa joalo. Ka mor’a pina e bulang, John Barr o ile a fana ka thapelo. Baena bana ka bobeli ke litho tsa Sehlopha se Busang. Moena Schroeder a fana ka tlhaloso e khutšoanyane mabapi le sehlopha le ho bontša hore liithuti tse amohetseng mangolo li ne li “itokiselitse ho kenya letsoho mosebetsing oa lefatše lohle oa Lipaki tsa Jehova, o etsoang hona joale linaheng tse 210.” Eaba o tsoela pele ho kenyelletsa libui tse supileng tse latelang.
Robert Wallen, ea sebeletsang Liofising tsa Taolo tsa ntlo-khōlō Brooklyn, o ne a tšetlehile sehlooho sa hae tabeng ena, “Ratanang ka Botebo,” se theiloeng ho 1 Petrose 4:8. (NW) O boletse hore baromuoa ba lokela ho thusana, ’me kaha liithuti tsohle e ne e le banyalani, o ile a hla a tobisa litlhaloso tsa hae ka ho khethehileng ho banyalani. O ile a eletsa: “Mosali o lokela ho rata monna oa hae esita le haeba ho ka etsahala hore a ithute puo ea naha esele kapele ho feta monna oa hae. O lokela ho bontša kutloisiso le kutloelo-bohloko. Hape, o lokela ho utloisisa monna oa hae ha e le beke ea hae ea ho pheha!” (Ka ho tloaelehileng, moromuoa ka mong o abeloa letsatsi leo a lokisetsang lijo bakeng sa baromuoa bohle ba lulang lehaeng la baromuoa.) Eaba joale o hlalosa boikutlo bo tepelletsang le liphihlelo tse tšehisang tseo banna ba bang ba bileng le tsona ha ba ithuta ho pheha, joaloka phihlelo ea monna e mong ea ileng a sebelisa phofshoana ea bicarbonate ho e-na le phofshoana ea ho baka bohobe. Moena Wallen a boela a hlahisa ntlha ea hore monna o tlameha “ho ba seli ka litlhoko tsa mosali oa hae,” erekaha ho ka etsahala a sebelise nako e ngata haholo a hlokometse boikarabelo ba phutheho. Ho banna le basali bana, o ile a re: “Ka mehla le be ba hahang; le se ke la etsa litlhaloso tse nyatsang, esita le ho lōna ka bolōna. Le se ke la ikarola ho ba bang. Ha le entse liphoso, li lumeleng.”
Sebui se latelang, Daniel Sydlik, setho sa Sehlopha se Busang, se ile sa khetha sehlooho: “Bolokang Mollo oa Moea oa Molimo o Tuka,” se theiloeng ho 1 Ba-Thessalonika 5:19. O itse: “Mollo o ka futhumatsa le ho senya. Ka linako tse ling baromuoa ba ee ba khothatse athe ka linako tse ling ba ee ba tšose. Monna-moholo e mong oa Moafrika o kile a re: ‘Butsoela habonolo,’ joalokaha eka o leka ho tsosa tlhase ea mollo o shoang! Ha a bua ka lintho tseo ho ka etsahalang hore u li fumane kabelong ea hao—likhoere-khoere tse sa koaheloang, lintsintsi, sephethe-phethe se lerata, naha e ncha, le bolumeli bo sa tloaelehang—bontša tlhompho. U tšoasa lintsintsi tse ngata ka mahe a linotši ho feta ka asene. Ithute ‘ho butsoela ka bonolo’ le ho boloka mollo oa moea oa Jehova o tuka.”
Ha latela sehlooho “Kena Kabelong ea Hao ka Cheseho le ka Masene” se ileng sa hōlisoa ke Kenneth Flodin, molebeli oa Lehae la Bethele Watchtower Farms. Erekaha joale Sekolo sa Gileade se falliselitsoe Watchtower Farms, liithuti tsohle li tloaelane haholo le Moena Flodin. Libaka tse peli tseo ho hlokahalang masene ho tsona li ile tsa hōlisoa puong ea hae: (1) lerato la lintho tse bonahalang le (2) puo e sa nepahalang kapa monahano o sa nepahalang. O ile a eletsa: “Qobang boithati ’me le fetohe ba sa ithateng. Talimang pele linthong tse mabotho-botho le tse ntle lefatšeng le lecha; le se ke la li batla hona joale.” Ho thusa liithuti ho qoba boikutlo bo sa nepahalang, sebui se ile sa qotsa Numere 13:28, 32. Eaba o re: “Ka linako tse ling batho ba ee ba bone ntho e tšoanang, empa ba bang ba tla ba le maikutlo a sa nepahalang, ha ba bang ba ba le maikutlo a nepahetseng. Joaloka Kalebe oa mehleng ea boholo-holo, a re tšepeng Jehova. Bolella ba bang mehopolo e nepahetseng ea hao. ’Me haeba u teana le puo e sa nepahalang, fetola taba ka ho qoba mohopolo o fosahetseng.”
Lloyd Barry, setho sa Sehlopha se Busang eo e neng e le moromuoa nakong e fetileng, o fane ka keletso e sebetsang. O itse: “Lerato, thabo, le khotso ke litšoaneleho tsa bohlokoa ho baromuoa ba bacha. Lehaeng la lōna la baromuoa u tla lemoha mefokolo ea ba bang, empa tobisa mahlo mefokolong ea hao.” A ba hopotsa mehleng ea pele ha a ne a le Japane ha baromuoa ba ne ba thabela ho ja tlhapi letsatsi le leng le le leng, empa joale ha fihla baromuoa ba bacha ba neng ba kulisoa ke tlhapi. Ka baka la lerato la bona ho bana ba bacha ho ile ha fetoloa mofuta oa lijo tse phehuoang. A eletsa ka hore: “Le boloke boikutlo ba lōna ba ho tšeha; le ka mohla le se lumelle letsatsi ho phirimela bothata leha e le bofe boo le ka bang le bona. Bolokang khotso lehaeng, ’me le tla thaba bophelong ba lōna ba boromuoa.”—Ba-Efese 4:26.
Jack Redford, e mong oa barupeli ba Gileade, a bua sehloohong: “Jehova o tla Phethahatsa Koetliso ea Lōna,” a theile litlhaloso tsa hae ho 1 Petrose 5:10. O itse: “Jehova a ka u koetlisa ka ho lumella maemo a itseng ho hlaha ao u tla fumana ho le thata ho sebetsana le ’ona. Joalokaha a ile a koetlisa baapostola ho sebetsana ka katleho le likhohlano tsa bona tsa botho, o tla u koetlisa ka ho tšoanang. U se nyahame ha ho na le liphapano tse itseng tsa mohopolo. Itokisetse ho lokisa botho ba hao. Boikhohomoso bo tla etsa hore ho be thata, empa boikokobetso bo tla nolofatsa lintho. Ithute ho tenyetseha. Jehova o tla u koetlisa hore u tsebe ho sebelisana le ba bang. ‘U se nehele pelo ea hao ho mamela mantsoe ’ohle ao ba bang ba a buang ka uena.’” (Moeklesia 7:21, 22) Tlhoriso le eona e ka sebeletsa ho u koetlisa. Baromuoa ba ileng ba mamella tlhoriso ba thabile ’me ha ba ikoahlaee, ba thabela hore ebe ba ile ba koetlisoa joalo ke tlhoriso.
Ulysses Glass, morupeli e mong, a fana ka mantsoe a hae a ho phethela ho liithuti. O ile a thea mantsoe a hae ho Ba-Efese 4:1-3, a babatsa sehlopha ka ho bonahatsa litšoaneleho tsa bonngoe tse hlalosoang moo le ho se khothalletsa ho tsoela pele se etsa joalo, a re: “Khotso ke tšoaneleho e kopanyang, ’me ea hlokahala bakeng sa bonngoe.” A tsoela pele ka Ba-Efese 4:4-6 le ho hlalosa hape limakatso tsa moea oa Molimo, a hopotsa bohle hore “Jehova ke Mohloli oa matla ’ohle a maholo. Re lokela ho lula re mo tšaba; ’me ke ntho e tšabisang ho oela matsohong a hae.”—Ba-Heberu 10:31.
Litebello tse Phahameng
Bohle ba ile ba mamela ka thahasello e khōlō ha Theodore Jaracz, setho sa Sehlopha se Busang sa Lipaki tsa Jehova, a bua sehloohong: “Lintho tse Hahang Litebello tsa Rōna.” Ha a beha mabaka ho tsoa ho 1 Ba-Korinthe 2:9, o itse: “Temana ena ha e bue ka lintho tse bonahalang, hobane temana e hlahlamang, 1 Ba-Korinthe 2:10, e bua ka ‘tse tebileng tsa Molimo.’ Tsena li akarelletsa ‘bohlale ba Molimo’ bo amanang le ‘sephiri se halalelang,’ ‘bohlale ba oona bo patiloeng’ bo tsoang ka ’nģane ho potoloho ena ea letsatsi, e, bo tsoa ho Molimo ka booona.” (1 Ba-Korinthe 2:7) Bamameli ba ile ba tobisoa ho Esaia 64:4 (NW), eo e bileng khopotso ho bona ‘ho lula ba lebelletse’ ho Molimo le lintho tseo o li lokiselitseng.
Ka sebele batho ba Molimo ba na le litebello tse ntle hakaakang! Moena Jaracz a qolla tse latelang: “Ka 1919 Babylona e Moholo e ile ea oa; ka 1922 ha ba le khothatso e hlasimollang ea ‘ho tsebahatsa Morena le ’Muso,’ ho bua ka ’Muso o hlonngoeng lefatšeng lohle; ka 1935 batho ba Molimo ba ithuta ka se boleloang ke ‘bongata bo boholo’ ba Tšenolo 7:9; ka 1943 ba bona baromuoa ba Sekolo sa Gileade ba qalisa ho romeloa lipheletsong tsa lefatše; kajeno, ka 1989, lōna liithuti le na le monyetla oa ho bolela lintho tse molemo ho batho ba leng likabelong tsa lōna ba laba-labelang ho li utloa.”
Ka mor’a hore mangolo a nehoe liithuti, e mong oa liithuti o ile a bala lengolo le amang pelo la kananelo le ngotsoeng ke sehlopha.
Motšehare oa mantsiboea, Lon Schilling, mohokahanyi oa Komiti ea Watchtower Farms, o ile a tsamaisa kakaretso ea Thuto ea Molula-Qhooa. Eaba liithuti li fana ka lenaneo le monate la ’mino le ho tšoantšisa liphihlelo tsa tsona tsa tšebeletso ea tšimo. Ka mor’a sena, bahoeletsi ba moo ba ile ba fana ka tšoantšiso e nakong e nang le sehlooho: “Ho Loantša Mesebetsi e Maqiti ea Satane.” Qetellong, ka mor’a ho mamela lipuisano tsa lipotso le liithuti tse ncha tse tšeletseng, mokhopi o thabileng o ile oa bina pina e koalang lenaneo ’me oa thabela ho kopanela thapelong le mookameli oa Sekolo sa Gileade ea lilemo li 96, Frederick Franz.
[Lebokose le leqepheng la 23]
MANANE A AMANG SEHLOPHA
Lenane la linaha tse emetsoeng: 5
Lenane la linaha tseo ba abetsoeng ho tsona: 10
Lenane la banyalani: 12
Lenane lohle la Liithuti: 24
Karolelano ea lilemo tsa bona: 30,9
Karolelano ea lilemo ’neteng: 13,4
Karolelano ea lilemo tšebeletsong ea nako e tletseng: 9,2
[Setšoantšo se leqepheng la 23]
Sehlopha sa bo87 se amohelang mangolo sa Sekolo sa Gileade sa Bibele sa Watchtower
Moleng o ka tlaase, mela e baliloe ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka letsohong le letona moleng ka mong.
(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.