“Re Tla Sebeletsa Jehova, . . . Molimo oa Rōna”

“Ha e le ’na le ba ntlo ea ka, re tla sebeletsa Jehova.”—JOSHUA 24:15.

1. Buka ea Joshua e sebeletsa ho re khothatsa le ho re sireletsa joang?

LIKETSAHALO tse susumetsang tsa buka ea Joshua li ngoletsoe “ho re ruta” hape li ngotsoe e le “litemoso” ho re khothatsa le ho re sireletsa “rōna ba hlahetsoeng ke mehla ea bofelo.” (Ba-Roma 15:4; 1 Ba-Korinthe 10:11) Ho totobatsoa litšoaneleho tsa bomolimo tse kang mamello, tumelo le kutlo. “Ka tumelo, marako a Jeriko a oele, hobane a potolohuoe ka matsatsi a supileng. Ka tumelo, Rahaba, mosali oa moetsalibe, ha a ka a timela le ba sa lumelang, hobane o na a amohele lihloela ka khotso.” (Ba-Heberu 11:30, 31) Tumelo ea Joshua, Rahaba, le ba bang ba tšepahalang morao koo e lokela ho re susumetsa hore re be sebete, re be matla, e le hore re ka phetha mosebetsi oa Molimo kajeno.—Joshua 10:25; Johanne 4:34.

2. (a) Joshua o bontšitse kutlo e feletseng joang? (b) Ho ile ha etsahala joang thabeng ea Ebale le ea Gerizime?

² Hoba ho hlōloe Ai ka tlhōlo e khōlō, Joshua a lebisa tlhokomelo litaelong tse qaqisitsoeng tse ngotsoeng ho Deuteronoma 27:1–28:68. Thabeng ea Ebale a haha aletare ea majoe feela, ’me moo a ntša taelo: “U tla hlaba le mahlabelo a teboho, ’me u tla a ja hona teng, u thabe pel’a Jehova, Molimo oa hao.” Majoe a mang a ile a hlongoa e le khopotso, a tlotsitsoe ka bosoeu, ’me a ngoloa mantsoe a Molao. Joale meloko ea aroha likoto tse peli, sehlopha se seng sa ema Thabeng ea Gerizime “ho hlohonolofatsa sechaba” ’me se seng bakeng sa ‘lithohako thabeng ea Ebale.’ Ka mantsoe a phahameng Balevi ba bolela lithohako bakeng sa ho se utloe, ’me sechaba kaofela sa arabela, “Amen!” Eaba joale ho boleloa mahlohonolo bakeng sa ho utloa. Empa malimabe a ne a talimane le Iseraele haeba e ka ‘hlōleha ho phethahatsa mantsoe a molao le ho tšaba lebitso le khanyang le le hlollang la Jehova’!—Joshua 8:32-35.

3, 4. (a) Tsela ea Iseraele e re ruta eng e matla kajeno? (b) Ke hoban’eng ha re sa lokela ho tenoa ke ho utloa lintho li le ling nako le nako? (c) Ho hlokoa eng ho kena ka “monyako o patisaneng”?

³ Na Iseraele e ’nile ea tsoela pele ho utloa ‘mantsoe a molao’? Ho sa tsotellehe likhothatso tse pheta-phetoang tsa Moshe, ’me hamorao tsa Joshua, ba ile ba hlōleha habohloko. Hoo ho re ruta thuto e matla hakaakang kajeno! Ho sa tsotellehe ho lemosoa nako le nako, kamehla ho na le ba bang ba nahanang hore ba ka soma seo Molimo o se hlokang, ‘ba ikela ka tsela ea bona,’ ’me ba ’na ba tsoella. Ke booatla bo bokaakang! Ha re boela liphihlelong tsa Iseraele, Pauluse o itse: “Ea lekanyang hore o sa eme, a ke a iponele hore a se ke a oa.”—1 Ba-Korinthe 10:12; Moeklesia 2:13.

⁴ Ba bang ba batho ba Molimo ba ’nile ba nyatsa litemoso tse ’nileng tsa fanoa, ba bolela hore ba tenoa ke ho utloa lintho li le ling nako le nako. Empa bona bana ke bona ba atisang ho oela pele lerabeng la Satane. Buka e bululetsoeng ea Deuteronoma (Mish·neh’ hat·to·rahʹ ka Seheberu, e bolelang “Pheto ea Molao”) boholo ba eona ke lipuo tse ’nè tsa Moshe; tsena li ile tsa hlakisetsa Iseraele hore e tlameha ho utloa melao ea Jehova e boletsoeng pele. Moshe o ile a sebelisa mantsoe a temoso a imenang hane bakeng sa ho lemosa ka ho se utloe ho neng ho tla fella ka “lithohako” ho feta ao a ileng a a sebelisa bakeng sa ho bua ka “litlhohonolofatso.” Thabeng ea Ebale, Joshua a boela a hlokomelisa Iseraele hore ba tlameha ho utloa. Na hoo ha ho re bontše hore na ke habohlokoa hakaakang ho loanela ho ‘kena ka monyako o patisaneng’?—Mattheu 7:13, 14, 24-27; 24:21, 22.

5. Iseraele joale e ile ea talimana le lebotho lefe le kopaneng, ’me re bona boemo bofe bo tšoanang kajeno?

⁵ Joale ho ne ho bonahala hore ho tla ba le ntoa ea makhaola-khang. Motse o qalang oa Jeriko o ne o felisitsoe, joalokaha bolumeli ba bohata bo tla felisoa ha ‘mahlomola a maholo’ a qala. Ai e ne e oele. Empa joale “marena ’ohle a mose o koano ho Jordane, a lihlabeng le mahoatateng, ho isa le mabopong ’ohle a Leoatle le Leholo, mabapa le Lebanone, marena a ba-Hethe, le a ba-Amore, le a ba-Kanana, le a ba-Fereze, le a ba-Heve, le a ba-Jebuse . . . a phutheha hammoho, a e-ba ntsoe le le leng ho ea loantša Joshua le ba-Iseraele.” (Joshua 9:1, 2) Ho se tšoanang le sena kajeno, re fumana lichaba tsa lefatše hona joale li phuthehile hammoho joaloka hoo ho bitsoang Machaba a Kopaneng. Li ipatlela khotso le tšireletseho ka litumellano tsa tsona empa li ‘bōkanetse ho loantša Jehova le motlotsuoa oa hae,’ Joshua e Moholoanyane. (Pesaleme ea 2:1, 2) Phello e tla ba efe?

Ho Etsa ka Bohlale

6, 7. (a) Bagibeone ba bonahetse ba thahasella eng, ’me ba ile ba sebelisa leqheka lefe? (b) Joshua o ile a ahlola taba joang?

⁶ Joaloka Rahaba pele ho bona, ba bang bao e seng Baiseraele joale ba qala ho bontša hore ba thahasella ho pholoha. Bana e ne e le baahi ba Gibeone, motse o moholo o ka leboea ho Jebuse, kapa Jerusalema. Ba ne ba utloetse ka liketso tse matla tsa Jehova ’me ba ikemiselitse hore ba tla batla khotso le tšireletseho ka litumellano tsa Jehova. Empa joang? Ba romela liahelong tsa Iseraele Gilgale banna ba nkileng mofaho o omeletseng le o kumehileng le makuka a tsofetseng, ’me ba apere liaparo tse lapiloeng, ba roetse lieta tse lapiloeng. Ha ba atamela Joshua, banna bana ba re: “Bahlanka ba hao ba tsoa naheng e hole-hole, ka baka la lebitso la Jehova, Molimo oa hao; etsoe re utloile botumo ba hae.” Ha a utloa sena, “Joshua a etsa khotso le bona, a hlaba selekane le bona, sa ho ba tlohela ba phela.”—Joshua 9:3-15.

⁷ Leha ho le joalo, Iseraele ea phakisa ea tseba hore ha e le hantle Bagibeone ‘ba ahisane le bona’! Eaba Joshua joale o talima leqheka la bona joang? A hlompha kano eo ba neng ba e etselitsoe, ‘ho ba tlohela ba phela, a ba bea ba rathang patsi, le ba khang metsi a phutheho.’—Joshua 9:16-27; bapisa Deuteronoma 20:10, 11.

8. Bagibeone ba tšoantšetsa “bongata bo boholo ba batho” ka litsela life?

⁸ Banethinime ba bangata, ba ileng ba sebeletsa tempeleng ea Jehova hamorao, mohlomong e ne e le mothapo oa Bagibeone. Ke ka hona Bagibeone ba ka ’nang ba tšoantšetsa hantle “bongata bo boholo ba batho” boo hona joale bo sebeletsang Molimo ‘tempeleng ea oona motšehare le bosiu.’ (Tšenolo 7:9, 15) Le hoja ba phela lefatšeng le kang la Bakanana, bana lipelong hase ‘karolo ea lefatše.’ Pele, ba ile ba lokela ho mamella lijo tsa moea tse ‘bolileng,’ tse kang tse fumanoang likerekeng tsa Bokreste-’motoana, ’me ba ne ba se na “veine” ea thabo. Ha ba kopana le batho ba Molimo, ba hlokometse hore Jehova o etsa mesebetsi e matla ka lipaki tsa hae. Ba nkile leeto le lelelele ho tloha lefatšeng la Satane e le hore ba ka hlobola liaparo tse ‘tabohileng’ ’me bakeng sa tsona ba fumana lebitso le lecha e le bahlanka ba ikokobelitseng ba Jehova, ba apereng botho bo bocha.—Johanne 14:6; 17:11, 14, 16; Ba-Efese 4:22-24.

Tšehetso ea Mokhatlo o Hlophisitsoeng

9. (a) Joale ho ile ha latela tlokotsi efe? (b) Joshua a arabela joang, hona e le ka tiiso efe?

⁹ Ha Adoni-Tsedeke, morena oa Jerusalema, a utloa hore Bagibeone ba bōpile khotso le Iseraele, “a tšoha haholo, hobane Gibeone e be e le motse o moholo, o kang o mong oa metse ea moreneng, . . . le banna bohle ba teng e ne e le linatla.” A kopanya mabotho le marena a mang a mane, eaba ba futuhela Gibeone. Bagibeone ba potlakela ho ipiletsa ho Joshua: “Tlo ho rōna kapele, u re namolele, u re thuse.” Joshua a arabela hang feela, ’me Jehova a khothatsa Joshua, a re: “U se ke ua ba tšaba, etsoe ke tla ba neela matsohong a hao; ha ho le a mong ho bona ea tla ema pel’a hao.” Joshua le banna ba hae ba linatla ba kena tseleng “bosiu bohle” e le hore ba ka tsometsa sera ka ho feletseng.—Joshua 10:1-9.

10. (a) Ke bohato ba mofuta ofe kajeno bo tšoanang le ho futuheloa ha Gibeone? (b) Bagibeone ba kajeno ba bontša boikemisetso bofe?

¹⁰ Ho tšoana le marena ao a mahlano, lihlooho tse ling tsa mebuso kajeno li halefisoa ke ho bona batho ba bangata hakana ba tsona—le “linatla”—ba emela Joshua e Moholoanyane le ’Muso oa hae oa ho loka oa lefatše lohle. Babusi bana ba lumela hore meeli ea bochaba e lokela ho tloheloa e le joalo, le hoja lichaba li ntse li omana le ho loantšana nako le nako. Ka hona ba leka ho khaola phepelo ea lijo tsa moea e eang ho “bongata bo boholo ba batho” bo ratang khotso, ho thibela liboka moo bo jang “lijo” tsena, le ho bo thibela ho bua le ba bang ka litaba tsa moea. Empa Bagibeone bana ba kajeno ba eme ka botšepehi le Iseraele oa moea, ba re: “Re tla ea le lōna.”—Zakaria 8:23; bapisa Liketso 4:19, 20; 5:29.

11. Lipaki tsa Jehova li sebetsa litlokotsi joang kajeno?

¹¹ Ha “bongata bo boholo ba batho” bo ipiletsa bakeng sa thuso ho mokhatlo o hlophisitsoeng oo e leng “’mè” oa bona, e fanoa hang-hang le ka tekanyo e ntle. Karabelo e potlakileng eo Lipaki tsa Jehova li etsang lintho ka eona e bonoa hape ka litsela tse ling tse ngata—joaloka ho lokisetseng liphallelo hang-hang kamor’a likoluoa tsa tlhaho le ka ho haha ka potlako Liholo tsa ’Muso tse hlokahalang le libaka tse ling tsa ho kopana bakeng sa ho aba “lijo.” Ha ho ne ho lokiselitsoe kopano ka Phuptjane monongoaha Yankee Stadium, New York, lebotho la baithaopi ba hloekisang le ile la kena mosebetsing ka khitla ka morao ho papali ea baseball; ha ho mohla lebala leo la lipapali le kileng la shebahala le hloekile le le makhethe ho feta matsatsing ao a mane a ileng a latela. Baholo ba ikarabellang ba Lipaki tsa Jehova ba boetse ba kenella ka potlako ho sebetsa litlokotsi tse hlahang ka lebaka la ho bolela litaba tse molemo.—Ba-Filippi 1:6, 7.

Jehova o Loanela Iseraele

12. Jehova o etsa mehlolo efe ha a loanela Iseraele ho sireletsa Bagiheone? (Bapisa Habakuke 3:1, 2, 11, 12.)

¹² Empa ak’u talime ka Gibeone joale. Jehova o ferekanya makhotla ao a sera. Iseraele e ba lelekisa ka polao e khōlo. ’Me ke eng eo re e bonang e theoha leholimong? Leqhoa le leholo! Boholo ba bolaoa ke sefako sena se linaka ho feta ho bolaoa ke bahlabani ba Iseraele. Joale, mamela. Joshua o bua le Jehova, hona o re’ng “pontšeng ea bana ba Iseraele”? O re: “Letsatsi, ema holim’a Gibeone, le uena khoeli, sekhutlong sa Ajalone!” Mohlolo o mong o tšabehang! Hoo e ‘batlileng e e-ba ka letsatsi le le leng,’ letsatsi la chabela lebala leo la ntoa, ho fihlela ha boiphetetso ba Molimo bo phethahatsoa ka ho feletseng. Ha ho ho rōna ho ngangisana ka hore na Jehova o ile a etsa mohlolo oo joang, joalokaha re ke ke ra botsa hore na o ‘entse’ maseli a mabeli a maholo joang hore a khanye e le hore a bonahale ka “letsatsi” la hae la bone la pōpo. (Genese 1:16-19; Pesaleme ea 135:5, 6) Tlaleho e khaola khang: “Ha hoa ka ha e-ba letsatsi le joalo, leha e le pele, leha e le morao, leo Jehova a utloileng lentsoe la motho ka lona; hobane Jehova o na a loanela Iseraele.”—Joshua 10:10-14.

13. Joshua o khothatsa balaoli ba hae joang ho ea pele, hona e le ka phello efe?

¹³ Ho qetelloa ka hore ho bolaoe marena a mahlano, e leng nako eo ka eona Joshua a reng ho balaoli ba hae: “Se tšabeng, le se ke la tšoha, itiiseng, le be banna; hobane Jehova o tla etsa joalo le ka lira tsohle tsa lōna tseo le tla li loantša.” Hona ho se ho ipakile e le ’nete mabapi le marena a supileng a Kanana, ’me e ntse e le ’nete ha ho lihuoa palo e ’ngoe e feletseng ea mebuso e 24. Joale naha e phomola feela kamorao ho lilemo tse tšeletseng tsa ntoa.—Joshua 10:16-25; 12:7-24.

14. Re lokela ho talimana le Harmagedone ka boikutlo bofe le ka tšepo efe?

¹⁴ Kajeno, ha re talimane le ntoa ea ho qetela ea Harmagedone, e se eka re ka ba sebete ’me ra ba matla joaloka Joshua, banna ba hae ba linatla le lebotho lohle le leholo la Iseraele. Re ka tšepa hore joalokaha Jehova a ile a kenya Baiseraele ba limillione tse ngata Lefatšeng la Pallo ba sa tsoa kotsi ea letho, o ntse a ka ’na a etsa mehlolo e meng e tšosang ho fetisa batho ba hae ba se nang tšabo Harmagedone ho ba kenya tsamaisong ea hae e ncha.—Tšenolo 7:1-3, 9, 14; 19:11-21; 21:1-5.

Qeto ea Rōna

15. “Linku tse ling” li ka lebella likabelo tsa mofuta ofe tsamaisong e ncha ea Molimo?

¹⁵ Le hoja joale a ne a atamela lilemo tse 90, Joshua o ne a talimane le mosebetsi o mong o moholo—oo oa ho arolela meloko ea Iseraele naha. Hona ho ne ho sa bolele hore bophelo bo tla ba bonolo bakeng sa Baiseraele. Ha e le hantle, Kalebe o ile a kōpa sebaka Hebrone, moo ho neng ho phela Baanake ba lifonthoane; o ne a batla ho tsoela pele a itšebelisa ka matla ho hlaoleng lira tsa ho qetela tsa Jehova. Hona hase pontšo ea hore Pusong ea Kreste ea Lilemo tse Sekete holim’a lefatše ho tla ba le lira tsa batho. Empa ho tla ba le mosebetsi o etsoang. Tsamaisong e ncha ea lintho, ha rea lokela ho lebella bophelo bo bonolo le ba botsoa. Hoba li amohele likabelo tsa tsona ‘lefatšeng le lecha,’ “linku tse ling” tsa Morena li tla ba le mosebetsi o mongata mosebetsing o moholo oa ho ntlafatsa lefatše le ho le fetolela Paradeiseng ea sebele.—Joshua 14:6-15; Mareka 10:29, 30; Ba-Roma 12:11.

16. Tokisetso ea Jehova ea “metse ea setšabelo” e tšoantšetsoa ka eng kajeno?

¹⁶ Ha Joshua a aba naha, a beella ka thōko metse e tšeletseng ea Balevi ho ba “metse ea setšabelo,” e meraro ka lehlakoreng le leng le le leng ho Jordane. Ena e ne e le tokisetso ea Jehova bakeng sa ho sireletsa motho ea sa bolaeang motho e mong ka boomo ea neng a ka ’na a balehela ho o mong oa metse ena. ’Molai ea joalo o ne a lokela ho paka hore letsoalo la hae le hloekile pel’a Molimo, ’me hona o ne a ho etsa ka ho lula motseng oo ho fihlela ho e-shoa moprista e moholo. Ka ho tšoanang, ka lebaka la setsoalle sa bona sa nakong e fetileng le lefatše lena le molato oa mali, “bongata bo boholo ba batho” kajeno bo tlameha ho batla ho ba le letsoalo le letle ho Molimo. Bo fumana letsoalo leo le letle ka ho ipolela libe tsa bona, bo baka, bo sokoloha, bo ineela ho Jehova le ka ho kolobetsoa metsing. Joale bo tlameha ho boloka boemo boo. “Bongata bo boholo ba batho” bo hlokoa hore bo lule ka “motseng” oo ho fihlela Jesu a e-shoa ka tšoantšetso mabapi le mosebetsi oa hae oa boprista bo boholo, qetellong ea Puso ea hae ea Lilemo tse Sekete.—Joshua 20:1-9; Tšenolo 20:4, 5; 1 Ba-Korinthe 15:22, 25, 26.

17. Ke phello efe e thabisang eo re e lebelletseng kajeno?

¹⁷ Jehova o ne a hlohonolofalitse batho ba hae ba Iseraele ka ho hlollang hakaakang! Tsela e ne e bile thata, ’me liteko li le ngata. Empa qetellong ba ne ba kene Lefatšeng la Pallo ’me ba tsitsitse teng. Lipelo tsa bona e tlameha e be li ile tsa tlala teboho hakaakang ho Jehova! ’Me ha re ipaka re tšepahala ho Molimo oa rōna, re ka ba le thabo e tšoanang ha re kena tsamaisong ea hae e ncha, e akarelletsang “lefatše le lecha.” Ka sebele, e tla ba ’nete ka rōna, joalokaha e bile ’nete mehleng ea Joshua: “Ha hoa ka ha hlokeha taba leha e le ’ngoe ea tsohle tse molemo tsee Jehova a neng a li boleletse ntlo ea Iseraele; tsohle tsa etsahala.” (Joshua 21:45) E se eka u ka ba le karolo e thabisang moo!

18. (a) Joshua o ile a phetela baholo ba Iseraele eng? (b) Re lokela ho ba le takatso efe mabapi le tsamaiso e ncha ea Jehova?

¹⁸ Qetellong, ha a le lilemo li 110, Joshua a phutha baholo ba Iseraele. A ba phetela tsela e hlollang eo ka eona Jehova a neng a hlohonolofalitse batho ba hae ba tšepahalang ho tloha mehleng ea Abrahama ho tla fihlela mohlang oo. Jehova joale a re ho bona: “Ka le nea lefatše leo le neng le sa ka la le lema, le metse eo le neng le sa ka la e haha, ’me la lula teng le ntse le e-ja litholoana tsa merara le tsa mehloare eo le sa kang la e hloma.” Ka tokisetso ena e khaphatsehang, ruri Iseraele e ne e tla batla ho ‘tšaba Jehova le ho mo sebeletsa ka sebele le ka ’nete’ ka linako tsohle. ’Me ha re sheba ka pele feela tsamaisong e ncha e khanyang ea lintho ea Jehova bakeng sa lefatše lena, ka sebele e mong le e mong ho rōna o lokela ho ba le takatso e tšoanang.—Joshua 24:13, 14.

19. (a) Joshua joale o ile a bea khetho efe ka pel’a sechaba, ’me se ile sa arabela joang? (b) Re lokela ho batla ho tšoana le mang? (c) Re lokela ho etsa khetho efe, hona ka boikemisetso bofe?

¹⁹ Joale Joshua a totobaletsa sechaba: “Ha le sa rate ho sebeletsa Jehova, ikhetheleng kajeno eo le tla mo sebeletsa, . . . HA E LE ’NA LE BA NTLO EA KA, RE TLA SEBELETSA JEHOVA.” Na mantsoe aa a ka phetoa ke e mong le e mong oa rōna, re le batho ka bomong, litho tse lumelang tsa malapa a rōna, liphutheho tsa rōna, “ntlo ea Molimo” lefatšeng ka bophara? Ruri a ka phetoa! (Ba-Efese 2:19) Sechaba mehleng ea Joshua se ile sa mo arabela, se re: “Jehova, Molimo oa rōna, ke eena eo re tla mo sebeletsa, re utloe lentsoe la hae.” (Joshua 24:15, 24) Empa ka masoabi, lilemong tsa morao ba ile ba hlōleha ho etsa joalo. Ha re batle ho tšoana le bao ba ileng ba hlōleha. Re batla ho tšoana le Joshua le ba ntlo ea hae, ho tšoana le Kalebe, ho tšoana le Bagibeone le ho tšoana le Rahaba. E, “RE TLA SEBELETSA JEHOVA.” E se eka hona re ka ho etsa ka sebete le ka tšepo e feletseng ea hore ha ho letho “le tla tseba ho re arohanya le lerato la Molimo, le leng ho Jesu Kreste, Morena oa rōna.”—Ba-Roma 8:39.

Re Ithuta Eng Bukeng ea Joshua—

◻ Ka ho rua molemo ka likeletso tse pheta-phetoang?

◻ Ka ho hlokomela Bagibeone ba kajeno?

◻ Ka hore na Jehova o tla loana joang Harmagedone?

◻ Ka bohlokoa ba ho balehela “motseng oa setšabelo”?

◻ Ka ho khetha hore na ke mang eo re tla mo sebeletsa?