Ho Folisoa ha Moloko oa Batho ka Mohlolo ho Atametse
“LE KA mohla ha re e-s’o bone ho kang hona.” Seo se ile sa boleloa ke lipaki tse boneng ka mahlo ha Jesu hang-hang a folisa ka mohlolo monna ea neng a shoele litho. (Mareka 2:12) Jesu o ile a boela a phekola lifofu, limumu le lihlotsa, ’me balateli ba hae ba ile ba etsa ho tšoanang. Jesu o ne a phekola ka matla afe? Tumelo e ne e phetha karolo efe? Liphihlelo tsee tsa lekholong la pele la lilemo li fana ka leseli lefe liphekolong tsa mohlolo tse etsoang kajeno?—Matheu 15:30, 31.
“Tumelo ea Hao e U Folisitse”
Ba folisang ka tumelo kajeno ba rata ho qotsa polelo ea Jesu ho mosali ea neng a e-na le phallo ea mali ka lilemo tse 12, ea ileng a tla ho eena ho tla phekoloa: “Tumelo ea hao e u folisitse.” (Luka 8:43-48) Na polelo eo ea Jesu e bontša hore ho fola ha hae ho ne ho itšetlehile ka tumelo ea hae? Na oo e ne e le mohlala oa “ho folisa ka tumelo” ho etsoang kajeno?
Ha re bala tlaleho ea Bibele ka hloko, re hlokomela hore liketsahalong tse ngata Jesu le barutuoa ba hae ha baa ka ba batla hore ba kulang ba phatlalatse tumelo ea bona pele ba phekoloa. Mosali ea boletsoeng ka holimo o ile a tla, ’me a sa re letho ho Jesu, a ama seaparo sa hae a le ka morao ’me “hang-hang phallo ea hae ea mali ea ema.” Ketsahalong e ’ngoe, Jesu o ile a folisa monna ea neng a le har’a ba neng ba tlile ho tla mo tšoara. O bile a folisa le monna ea neng a sa tsebe hore na Jesu ke mang.—Luka 22:50, 51; Johanne 5:5-9, 13; 9:24-34.
Joale, tumelo e ile ea phetha karolo efe? Ha Jesu le barutuoa ba hae ba ne ba le seterekeng sa Tyre le Sidone, mosali oa Mofoenisia o ile a tla ’me a hoeletsa: “Nkhauhele, Morena, Mora oa Davida. Morali oa ka o kenoe ke modemona hampe.” Nahana hore na o ne a feletsoe ke tšepo hakaakang ha a kōpa ka tieo: “Morena, nthuse!” A mo utloela bohloko, Jesu o ile a arabela: “Uena mosali, tumelo ea hao e khōlō; a ho etsahale ho uena joalokaha u lakatsa.” ’Me morali oa hae o ile a fola “ho tloha ka hora eo ho ea pele.” (Matheu 15:21-28) Ka ho hlakileng, ho ne ho ameha tumelo, empa tumelo ea mang? Hlokomela hore Jesu o ile a rorisa tumelo ea ’mè, eseng ea ngoana ea kulang. ’Me e ne e le tumelo ho eng? Ka ho bitsa Jesu “Morena, Mora oa Davida,” mosali eo o ne a bolela phatlalatsa hore Jesu ke eena Mesia ea tšepisitsoeng. E ne e se pontšo feela tjee ea ho lumela ho Molimo kapa matleng a mophekoli. Ha Jesu a ne a re, “Tumelo ea hao e u folisitse,” o ne a bolela hore ntle le hore ba lumele hore ke Mesia, ba tšoenyehang ba ka be ba sa tla ho eena ho tla folisoa.
Ka mehlala ena e ka Mangolong, rea hlokomela hore ho phekola ha Jesu ho ne ho fapane hōle le ho tloaetsoeng ho bonoa kapa ho boleloa kajeno. Batho ba phekoloang ba ne ba sa be le pontšo e matla ea maikutlo—e kang ho hoeletsa, ho bina, ho bokolla, ho ilibana, le tse joalo—’me le Jesu o ne a sa tsukutlehe maikutlong. Ho phaella moo, le ka mohla Jesu ha aa ka a hlōleha ho folisa ba kulang ka boikemelo ba hore ba haelloa ke tumelo kapa ka hore koleke ea bona ha ea lekana.
Ho Phekola ka Matla a Molimo
Jesu le barutuoa ba hae ba ne ba folisa joang? Bibele ea araba: “Matla a Jehova a ne a le moo bakeng sa hae hore a folise.” (Luka 5:17) Luka 9:43 e re ka mor’a ho folisa ho hong, “kaofela ba qala ho hlolloa ke matla a maholo a hlomphehang a Molimo.” Ka ho loketseng, Jesu o ne a sa lebise tlhokomelo ho eena e le mofolisi. Ketsahalong e ’ngoe o ile a bolella monna eo a neng a mo lokolotse tlhorisong ea bademona: “E-ea lapeng ho beng ka uena, ’me u ba tlalehele lintho tsohle tseo Jehova a u etselitseng tsona le mohau oo a bileng le oona ho uena.”—Mareka 5:19.
Kaha Jesu le baapostola ba ne ba folisa ka matla a Molimo, ho bonolo ho hlokomela lebaka leo ka lona e neng e se kamehla ho hlokahalang tumelo ho motho ea phekoloang. Leha ho le joalo, ho ne ho hlokahala tumelo e matla ka lehlakoreng la mofolisi. Ke kahoo ha balateli ba Jesu ba ne ba hlōlehile ho leleka modemona ea neng a hlile a le matla, Jesu a ileng a ba bolella lebaka: “Ka lebaka la tumelo ea lōna e nyenyane.”—Matheu 17:20.
Morero oa ho Folisa ka Mohlolo
Le hoja Jesu a ile a folisa ba bangata nakong ea tšebeletso ea hae ea lefatšeng, ha e le hantle o ne a sa hahamalla ‘tšebeletso ea lipholiso.’ Ho folisa ha hae ka mohlolo—hoo le ka mohla a sa kang a lefisa batho bakeng sa hona kapa ho ba kōpa likoleke—ho ne ho tlatsetsa sepheong sa hae se ka sehloohong, e leng sa “ho bolela litaba tse molemo tsa ’muso.” (Matheu 9:35) Tlaleho e bontša hore ketsahalong e ’ngoe o ile a ba ‘amohela ka mosa ’me a qala ho bua le bona ka ’muso oa Molimo, ’me a folisa ba hlokang phekolo.’ (Luka 9:11) Litlalehong tsa Kosepele, hangata Jesu o ne a bitsoa “Mosuoe” ’me ha ho mohla a kileng a bitsoa “Mofolisi.”
Joale, ke hobane’ng ha Jesu a ile a phekola ka mohlolo? Lebaka le ka sehloohong e ne e le ho itsebahatsa e le Mesia ea tšepisitsoeng. Ha Johanne Mokolobetsi a ne a tšoeroe ntle ho toka, o ile a batla ho kholiseha hore o ne a phethile seo Molimo a neng a mo romme ho tla se phetha. O ile a romela barutuoa ba hae ho Jesu ’me a botsa: “Na u Ea Tlang, kapa re lokela ho lebella ea fapaneng?” Hlokomela seo Jesu a ileng a se bolella barutuoa ba Johanne: “Tsamaeang ’me le tlalehele Johanne seo le se utloang le ho se bona: Ba foufetseng ba boetse baa bona, le ba holofetseng baa tsamaea, balepera ba ntse ba hloekisoa ’me bo-tsebe-tutu baa utloa, le bafu ba ntse ba tsosoa, ’me mafutsana a bolelloa litaba tse molemo.”—Matheu 11:2-5.
Ka sebele, taba ea hore Jesu ha aa ka a folisa feela empa o ile a boela a etsa mehlolo e meng e tlalehiloeng Likosepeleng e paka ka tieo ho itsebahatsa ha hae e le “Ea Tlang,” Mesia ea tšepisitsoeng. Ho ne ho sa hlokahale hore le ea mong a ‘lebelle ea fapaneng.’
Na Liphekolo Tsa Mohlolo li sa Hlokahala Kajeno?
Na joale re lokela ho lebella hore Molimo a bonahatse matla a hae kajeno ka liphekolo? Che. Ka mehlolo eo Jesu a ileng a e etsa ka matla a Molimo, ntle ho pelaelo o pakile hore e ne e le Mesia eo Molimo a neng a tšepisitse hore o tla tla. Liketso tse matla tsa Jesu li tlalehiloe ka Bibeleng e le hore li baloe ke bohle. Ha ho hlokahale hore Molimo a pake matla a hae ka ho pheta liketso tse joalo molokong o mong le o mong oa batho.
Ho thahasellisang ke hore liphekolo le mehlolo e meng li ne li kholisa ho fihlela bohōleng bo itseng feela. Esita le lipaki tse ling tse boneng ka mahlo mehlolo ea Jesu ha lia ka tsa lumela hore o ne a tšehelitsoe ke Ntate oa hae oa leholimo. “Le hoja a ne a entse lipontšo tse ngata hakaalo ka pel’a bona, ba ne ba sa behe tumelo ho eena.” (Johanne 12:37) Ke kahoo moapostola Pauluse, ka mor’a hore a bue ka limpho tse sa tšoaneng tsa mehlolo—ho profeta, ho bua maleme, ho folisa, le tse joalo—tseo Molimo a neng a li file litho tsa phutheho ea Bokreste ea lekholong la pele la lilemo, a ileng a bululeloa ho re: “Ebang ho na le limpho tsa ho profeta, li tla felisoa; ebang ho na le maleme, a tla khaotsa; ebang ho na le tsebo, e tla felisoa. Etsoe re na le tsebo e sa fellang ’me re profeta ka mokhoa o sa fellang; empa ha se feletseng se fihla, se sa fellang se tla felisoa.”—1 Bakorinthe 12:28-31; 13:8-10.
Ke ’nete hore ho lumela ho Molimo ke habohlokoa bakeng sa boiketlo ba rōna. Leha ho le joalo, ho theha tumelo ea rōna litšepisong tsa bohata tsa liphekolo ho tla lebisa feela masoabing. Ho feta moo, Jesu o ile a fana ka temoso ena mabapi le mehla ea bofelo: “Bo-Kreste ba bohata le baprofeta ba bohata ba tla hlaha ’me ba tla fana ka lipontšo le limakatso tse khōlō e le hore ba khelose, haeba ho khoneha, esita le bakhethoa.” (Matheu 24:24) Ntle le bo-kea-tseba le batho ba bomenemene, ho ne ho tla boela ho e-ba le ponahatso ea matla a bodemona. Ka lebaka leo, ha rea lokela ho makatsoa ke ho boleloa ha liketsahalo tse sa hlaloseheng, ’me ka sebele tsena hase motheo oa tumelo ea sebele ho Molimo.
Kaha kajeno ha ho sa na ea phekolang ka mokhoa oo Jesu a neng a etsa ka oona, na see se bolela hore re lahlehetsoe? Le hanyenyane. Ha e le hantle, batho ba neng ba folisitsoe ke Jesu ba ne ba ka kula hape hamorao. Kaofela ba ile ba tsofala ’me ba shoa. Molemo oa ho folisoa oo ba neng ba o fumane e ne e le oa nakoana. Leha ho le joalo, ho phekola ha Jesu ka mohlolo ho sa ntse ho e-na le seo ho se bolelang kaha ho ne ho tšoantšetsa litlhohonolofatso tsa nakong e tlang.
Kahoo, ka mor’a hore ba hlahlobe Lentsoe la Molimo, Alexandre le Benedita ba boletsoeng pejana ha baa ka ba hlola ba lumela lipholisong tsa tumelo tsa kajeno le ho phekoleng ka thuso ea meea. Leha ho le joalo, ba kholisehile hore ho folisa ka mohlolo e ne e se ntho ea nakong e fetileng feela. Hobane’ng? Joaloka ba limilione lefatšeng ka bophara, ba lebeletse ka thabo litlhohonolofatso tsa ho folisoa tlas’a ’Muso oa Molimo.—Matheu 6:10.
Ha ho Kula le Lefu li se li le Sieo
Joalokaha re bone pejana, sepheo se ka sehloohong sa tšebeletso ea Jesu e ne e se ho folisa ba kulang le ho etsa mehlolo e meng. Ho e-na le hoo, o ile a etsa ho boleloa ha litaba tse molemo tsa ’Muso oa Molimo mosebetsi oa hae o ka sehloohong. (Matheu 9:35; Luka 4:43; 8:1) ’Muso oo ke mocha oo ka oona Molimo a tla folisa moloko oa batho ka mohlolo le ho lokisa tšenyo eohle eo sebe le ho se phethahale li e entseng lelapeng la motho. O tla finyella see joang, hona neng?
Ha a ne a bua ka makholo a lilemo a larileng ka pele, Kreste Jesu o ile a fa moapostola oa hae Johanne pono ea boprofeta: “Joale ho hlahile poloko le matla le ’muso oa Molimo oa rōna le tokelo ea ho laela ea Kreste oa hae!” (Tšenolo 12:10) Bopaki bohle bo bontša hore ho tloha ka 1914, Satane, mohanyetsi e moholo oa Molimo, o lahletsoe lefatšeng, ’me hona joale ’Muso oo o sebetsa e le oa sebele! Jesu o hlomamisitsoe e le Morena oa ’Muso oa Bomesia ’me hona joale o itokiselitse ho etsa liphetoho tse khōlō lefatšeng.
Bokamosong bo haufinyane, ’muso oa leholimo oa Jesu o tla busa mokhatlo o mocha oa batho ba lokileng, ha e le hantle, “lefatše le lecha.” (2 Petrose 3:13) Maemo a tla ba joang nakong eo? Tlhasenyana e khanyang ke ena: “’Me ka bona leholimo le lecha le lefatše le lecha; etsoe leholimo la pele le lefatše la pele li ne li fetile . . . ’Me [Molimo] o tla hlakola meokho eohle mahlong a bona, ’me lefu ha le sa tla hlola le e-ba teng, leha e le ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:1, 4.
Na u ka bona ka leihlo la moea hore na bophelo bo tla ba joang ha ho folisa moloko oa batho ka mohlolo e e-ba ntho ea sebele? “Ha ho motho ea ahileng Jerusalema ea tla re: Ke bohloko! Sechaba se ahileng teng se tšoaretsoe libe.” E, Molimo o tla finyella seo ba folisang ka tumelo ba neng ba ke ke ba se etsa le ka mohla. “O tla felisa lefu ka ho sa eeng kae.” Ka sebele, “Morena Jehova o tla felisa meokho lifahlehong tsohle.”—Esaia 25:8; 33:24.
[Setšoantšo se leqepheng la 7]
’Musong oa Molimo, moloko oa batho o tla folisoa ka mohlolo