Mesebetsi e Metle e ke Keng ea Lebaloa

Bahlanka bohle ba Jehova ba ka khona ho etsa tšebeletso e halalelang eo hamorao ba ka hopoloang ka lebaka la eona. Joalokaha motsoali ea lerato a ananela lintho tseo bana ba hae ba li etsang, Jehova le eena ha a lebale mosebetsi oa rona le lerato leo re le bontšitseng bakeng sa lebitso la hae. (Mat 6:​20; Heb 6:​10) Ke ’nete hore bokhoni le maemo a rona ha a tšoane. Leha ho le joalo, haeba re etsa sohle seo re ka se khonang tšebeletsong ea rona ho Jehova, re tla thaba. (Gal 6:4; Kol 3:​23) Bara le barali babo rona ba likete ba sebelelitse Bethele ka lilemo tse ngata. Na u ka ithaopela ho sebeletsa Bethele? Haeba u sa khone, khothalletsa motho e mong hore a sebeletse teng kapa u thuse ea seng a ntse a sebeletsa Bethele hore, a tsoele pele ka tšebeletso ena e halalelang.

SHEBELLANG VIDEO EA  IKEMISETSE HO SEBELETSA BETHELE, EBE LE ARABA LIPOTSO TSE LATELANG:

• Ke’ng e ka u susumelletsang ho sebeletsa Bethele?

• Batho ba bang ba re ke litlhohonolofatso life tseo ba li fumaneng ka lebaka la ho sebeletsa Bethele?

• Ke litšoaneleho life tse hlokahalang e le hore motho a ka sebeletsa Bethele?

• U ka etsa kopo ea ho sebeletsa Bethele joang?