Tsa Mona le Mane
◼ Nakong ea lilemo tse 35, pakeng tsa 1970 le 2005, kotara ea liphoofolo tse nang le lesapo la mokokotlo—e leng litlhapi, linqaqana, lihahabi, linonyana le lianyesi—li ile tsa fela.—SÜDDEUTSCHE ZEITUNG, JEREMANE
◼ E le ho sebetsana le theko ea lintho e phahameng ka liphesente tse limilione tse 2,2, ka August 2008, ’muso oa Zimbabwe o ile oa tlosa linoto tse leshome cheleteng ea oona. Kahoo chelete ea pampiri ea lidolara tse limilione tse likete tse leshome e ile ea theoleloa ho “dolara e le ’ngoe ea Zimbabwe.”—AGENCE FRANCE PRESSE, ZIMBABWE.
◼ “Ho tlalehoa hore ka 2005, ho ile ha bolaoa batho ba fetang 12 000 ka sethunya United States. Empa lenane la ba ntšitsoeng likotsi ka ho thunngoa le la ba thuntsoeng ’me ba phela ka mor’a moo le holimo le ho feta—ke batho ba ka bang 53 000 ba ileng ba mathisetsoa lipetlele ka 2006.”—THE SEATTLE TIMES, U.S.A.
Na Keresemese ke Nako ea “Thabo”?
Koranta ea Sydney e bitsoang Sunday Telegraph e re banyalani ba etsang karolo ea 20 lekholong ba Australia baa hlalana hang feela ka mor’a Keresemese le Selemo se Secha. Barry Frakes, eo e leng leqoetha litabeng tsa tlhalo, o re: “Re bona batho ba bangata ba loana kapa ba arohana ’me ba tla liofising tsa rōna, hang feela ha re qeta ho bula. Batho ba lebeletse hore Keresemese e tla ba monate joalokaha ho bontšoa mananeong a thelevishene kapa lipapatsong.” O phaella ka hore ha lintho li sa tsamaee kamoo ba neng ba nahanne kateng, joale ba batla ho hlalana. Leha ho le joalo, Angela Conway, eo e leng ’muelli oa Mokhatlo oa Malapa oa Australia, o re: “Ke ka seoelo tlhalo e rarollang mathata a nako e telele kapa e tlisetsang batho thabo le khotso tseo ba nahanang hore ba tla li fumana.” O khothalletsa sena: “Ke habohlokoa ho tiisetsa lenyalong le ho leka ho le atlehisa.”
“Libaka Tsa ho Pepela” li Pholosa Bophelo
Peru e entse boiteko bo matla ba ho fokotsa lenane la baimana ba shoang. E le ho khothalletsa basali ba Andes hore ba fumane thuso ea lingaka tleliniking ho e-na le ho pepela hae, lilemong tse leshome tse fetileng, ho butsoe ‘libaka tse 390 tsa ho pepela’ Peru. Mosali oa moimana le ba lelapa la hae ba ka lula ho e ’ngoe ea matlo ana a haufi le tleliniki, ho fihlela a pepa. Tlaleho ea litaba ea Reuters e hlahang Cuzco, e re lebaka le leng leo litleliniki tsena li ratoang ka lona ke hore li kopanya “mekhoa ea kajeno ea bongaka le mekhoa ea setso,” e kang ea “ho beleha motho a eme,” e leng “se fokotsang nako ea pelehi . . . ’me se nolofalletsa ’mè hore a bone hantle ha lesea le hlaha ho feta ha a kakaletse.”
Kamehla li Lieha ho Fihla
Ho ea ka tlaleho e fanoeng ka 2008 ke Lefapha la Lipalangoang la United States, hoo e ka bang karolo ea 30 lekholong ea lifofane tsohle tsa United States, li lieha ho fihla ka metsotso e fetang 15. Se seng sa lifofane tse lulang li lieha ho fihla ke se tlohang Texas se ea California.