Tlhekefetso ea Malapeng e Tla Fela

MOHLOMONG u tla makatsoa ke ho tseba hore liketsahalong tsena ka bobeli ho buuoa ka banyalani ba le bang.

Joaloka batho ba bangata ba hlekefetsang ba malapa a bona, Frank o tseba ho iketsa eka o lokile ha a le bathong kapa ha a e-na le batsoali ba mosali oa hae. Empa ha a le mong le mosali oa hae, Frank o sehlōhō.

Banna ba bangata ba tšoanang le Frank, ba hōliselitsoe malapeng a mabifi, ’me ha e se e le batho ba baholo ba nahana hore liketso tse joalo li loketse kapa hore lia amoheleha. Empa ha ho letho le tloaelehileng ka tlhekefetso ea malapeng. Ke kahoo batho ba bangata ba halefang ha ba utloa hore monna o hlekefelitse mosali oa hae.

Ho sa tsotellehe seo, tlhekefetso ea malapeng e ntse e ata ka tsela e nyarosang. Ka mohlala, phuputso e ’ngoe e entsoeng United States, e ile ea senola hore ka letsatsi ho ne ho kena lifouno tse 16 ka motsotso, tsa batho ba letsetsang libaka tseo ho thusoang batho ba hlekefetsoang. Tlhekefetso ea malapeng e teng hohle, ho sa tsotellehe hore na batho ke ba morabe ofe, ba boemong bofe ba lichelete le hore na ke ba sechaba sefe. Kaha liketso tse ngata tsa tlhekefetso ha li tlalehoe, ha ho pelaelo hore boemo bo bobe ho feta kamoo lipalo-palo li bontšang kateng.b

Litlaleho tsa tlhekefetso ea malapeng li etsa hore batho ba ipotse: Ke joang monna a ka tšoarang motho e mong​—haholo-holo mosali oa hae—​ka tsela e sehlōhō hakaale? Na banna ba hlekefetsang basali ba bona ba ka thusoa?

Lipaki Tsa Jehova, e leng bahatisi ba makasine ena, li lumela hore keletso e sebetsang ea Bibele e ka thusa balekane ba mabifi hore ba fetole boitšoaro ba bona. Na ho bonolo ho fetola boitšoaro ba motho? Che. Na ke ntho e ka khonehang? E! Thuto ea Bibele e thusitse batho ba bangata hore ba fetole botho ba bona bo mabifi ka hore ba be mosa le ho ba le tlhompho. (Bakolose 3:8-10) Hlahloba se ileng sa etsahalla Troy le Valerie.

Lenyalo la lōna le ne le le joang pele?

Valerie: Bosiung boo ka bona Troy a ileng a nkōpa hore re nyalane, o ile a nkotla ka tlelapa hoo ke ileng ka qeta beke ke ruruhile. O ile a kōpa hore ke mo tšoarele ’me a tšepisa hore a ke ke a hlola a nkotla. Lilemo tse ngata tseo re nyalaneng ka tsona, ke ile ka utloa mantsoe ao hangata.

Troy: Ke ne ke halefisoa ke ntho e ’ngoe le e ’ngoe—e kang ha mosali oa ka a sa lokisa lijo tsa mantsiboea ka nako. Nkile ka otla Valerie ka sethunya. Ka lekhetlo le leng ke ile ka mo otla hampe hoo ke neng ke nahana hore ke mo bolaile. Eaba ke leka ho mo tšosa ka hore ke tla bolaea mora oa rōna ke behile thipa molaleng oa hae.

Valerie: Ke ne ke lula ke tšohile. Ka linako tse ling ke ne ke lokela ho baleha lapeng ’me ke khutle ha Troy a se a khobile matšoafo. Le hoja ke ne ke mamella ha a nkotla habohloko, ke ne ke utloa ho le boima haholo ho mamella ha a ntlhapaola.

Troy, na haesale u le motho ea mabifi?

Troy: E, ho tloha bongoaneng. Ke hōletse tikolohong e mabifi. Ntate o ne a atisa ho otla ’Mè ka pel’a ka le banab’eso. Ka mor’a hore Ntate a tlohe lapeng, ’Mè o ile a lula le monna e mong, ’me le eena o ne a mo otla. O ile a re beta ’na le ausi oa ka. O ile a koalloa ka lebaka la seo. Leha ho le joalo, kea elelloa hore lintho tse nketsahaletseng ha li lokafatse liketso tsa ka.

Valerie, ke hobane’ng ha u ile ua mamella lenyalong la hao?

Valerie: Ke ne ke tšohile. Ke ile ka ipotsa, ‘Ke tla etsa joang ha a ka ntsoma ’me a mpolaea kapa a bolaea batsoali ba ka? Hona ke tla etsa joang haeba nka mo tlaleha ’me boemo ba mpefala?’

Maemo a lōna a ile a ntlafala neng?

Troy: Mosali oa ka o ile a qala ho ithuta Bibele le Lipaki Tsa Jehova. Qalong ke ne ke le mōna ha ke bona mosali oa ka a e-na le metsoalle ena e mecha, ’me ke nahana hore ke lokela ho mo pholosa “sehlotšoaneng” sena se sa tloaelehang. Kahoo ke ile ka ba mabifi le ho feta, eseng ho Valerie feela empa le ho Lipaki. Empa ka letsatsi le leng, mora oa rōna Daniel ea lilemo li ’nè ea tšoeroeng ke lefu la sethoathoa, o ile a kena sepetlele ’me a qeta hoo e ka bang libeke tse tharo a le moo. Nakong eo, Lipaki li ile tsa re etsetsa lintho tse ngata—esita le ho re hlokomella morali oa rōna Desiree ea lilemo li tšeletseng. Ka mor’a ho sebetsa bosiu bohle, Paki e ’ngoe e ile ea qeta letsatsi le Daniel e le hore Valerie a khone ho robala. Mosa oo batho bana ba ileng ba re bontša oona—bona bao ke neng ke ba tšoere hampe—o ile oa nkama maikutlo haholo. Ke ile ka hlokomela hore Lipaki ke Bakreste ba ’nete, kahoo ka kōpa hore li ithute Bibele le ’na. Ha ke ntse ke ithuta Bibele, ke ile ka ithuta kamoo monna a lokelang ho tšoara mosali oa hae kateng. Ke ile ka khaotsa ho ba mabifi. Qetellong, ka ba Paki ea Jehova.

Ke melao-motheo efe ea Bibele e ileng ea u thusa ho fetoha?

Troy: E mengata haholo. Ho 1 Petrose 3:7, Bibele e re ke lokela ho bontša mosali oa ka “tlhompho.” Bagalata 5:23 e re khothalletsa hore re be “bonolo” ’me re be le “boitšoaro.” Baefese 4:31 e nyatsa “puo e nyefolang.” Baheberu 4:13 e re “lintho tsohle . . . li pepesitsoe phatlalatsa” ho Molimo. Kahoo Molimo o bona seo ke se etsang esita le haeba baahelani ba ka ba sa se bone. Ke ile ka boela ka ithuta hore ke lokela ho tlohela metsoalle ea ka ea pele hobane “litloaelano tse mpe li senya mekhoa e metle.” (1 Bakorinthe 15:33) Ha e le hantle, metsoalle ea ka ea pele e ne e nkhothalletsa hore ke be mabifi. E ne e nahana hore mosali o lokela ho otloa e le hore “a mamele.”

Le ikutloa joang ka lenyalo la lōna hona joale?

Valerie: E se e le lilemo tse 25 joale Troy e le Paki ea Jehova. Ho tloha ka nako eo, o ’nile a mpontša lerato, mosa le ho ’nahanela e le kannete.

Troy: Nke ke ka khona ho tlosa bohloko boo ke ileng ka bo bakela lelapa la ka ’me ke ne ke sa lokela ho tšoara mosali oa ka ka tsela eo ke neng ke mo tšoere ka eona. Empa ke lebeletse ho phethahala ha Esaia 65:17, ha karolo eo e bohloko ea bophelo ba rōna e tla hlakoha likelellong tsa rōna.

Ke keletso efe eo le ka e fang malapa a anngoeng habohloko ke tlhekefetso ea malapeng?

Troy: Haeba u hlekefetsa ba lelapa la hao, ebang u ba hlekefetsa ’meleng kapa u ba hlaba ka mantsoe, amohela hore u hloka thuso le hore u lokela ho e batla. Thuso ea fumaneha. Ho ithuta Bibele le Lipaki Tsa Jehova le ho tloaelana le bona ho nthusitse ho hlōla mekhoa ea ka e mabifi e neng e metse ka metso.

Valerie: U se ke ua potlakela ho bapisa boemo ba hao le ba motho e mong kapa ho latela keletso ea batho ba nahanang hore ba tseba se molemong oa hao. Le hoja e se batho bohle ba ka bang le phello e tšoanang le ea ka, kea thaba hore ebe ha ke ea ka ka hlala monna oa ka, hobane hona joale re thabile.

HO FELISA TLHEKEFETSO EA MALAPENG

Bibele e re: “Lengolo lohle le bululetsoe ke Molimo ’me le molemo bakeng sa ho ruta, bakeng sa ho khalemela, bakeng sa ho otlolla lintho.” (2 Timothea 3:16) Joaloka Troy, eo pale ea hae e boletsoeng ka holimo, balekane ba bangata ba hlekefetsang ba sebelisitse keletso ea Bibele ’me ba khonne ho fetola monahano oa bona le boitšoaro.

Na u ka rata ho ithuta haholoanyane hore na Bibele e ka u thusa joang lenyalong la hao? Ho fumana boitsebiso bo eketsehileng kopana le Lipaki Tsa Jehova tsa sebakeng sa heno, kapa u kene Inthaneteng ho www.jw.org/st.