TSA MONA LE MANE

United States

Koranta ea New York Times e re: “Mosebetsi ea tsubang ea hiriloeng k’hamphaning e ikemetseng, o etsa hore mohiri oa hae a lahleheloe ke . .  chelete e fetang lidolara tse 5 816 [R57 520] ka selemo ha a bapisoa le mosebetsi ea sa tsubeng.” Ho ea ka boitsebiso bo bokelletsoeng ke bafuputsi ba Univesithi ea Ohio State, ho hakanngoa hore tahlehelo eo e bakoa ke ha basebetsi ba nka khefu e le hore ba tsube, ba sa be teng mosebetsing le ha ba lefelloa chelete e ngata bakeng sa phekolo. Ntho e ’ngoe e bakang tahlehelo eo, ke ha basebetsi ba sitoa ho sebetsa hantle ka lebaka la matšoao a bang teng ha ba khaotsa ho tsuba.

Italy

“Baruti le litho tse tšepahalang tsa kereke ha ba etse lintho tseo ba li buang kahoo, seo se etsa hore batho ba se hlole ba tšepa Kereke.”—Mopapa Francis.

Malaysia

Ba boholong Malaysia, ba ile ba fumana lithane tse 24 tsa manaka a mokotsoeng—e leng manaka a tlou a fetang 1 000—a patiloe ka har’a lik’hontheinara tse peli tsa mapolanka. Bahlokomeli ba lintho tsa tlhaho ba ile ba re ba ne ba qala ho fumana manaka a mangata hakaalo a mokotsoeng. Manaka ao a ne a tsoa Togo a isoa Chaena.

Afrika

Ho latela tlaleho ea Mokhatlo oa Lefatše oa Bophelo ea 2012, batho ba 63 ho ba lekholo ba ile ba bolaoa ke mafu a tšoaetsanoang, haholo-holo HIV/AIDS, letšollo, malaria, lefuba le mafu a tšoarang bana.

Australia

Bana ba rata lipapali tsa ho becha tsa mananeo a li-smartphone le a lisebelisoa tse ling. Mananeo a mang a hlahisa lipapali tsa casino, empa ho bonolo ho hlōla ho tsona. Tlaleho ea ’muso e lemosa hore lipapali tse joalo, li ka ’na tsa etsa hore bana ba talime ho becha e le ntho e amohelehang, “’me ha etsa hore nakong e tlang ba be le bothata ba ho becha.”