Lepheo la Serurubele le Monyang Khanya

BORASAENSE ba batla ho ntlafatsa ho etsoa ha lintho tse sebetsang ka mahlaseli a letsatsi, e le hore batho ba se ke ba itšetleha haholo ka lirafshoa. Rasaense e mong o ile a re: “E ka ’na eaba tharollo ea bothata bona . . . e ntse e fofa ka pel’a rōna.”

Nahana ka sena: E le hore lirurubele li futhumale mariha, li otlolla mapheo a tsona letsatsing. Mapheo a lirurubele tse bitsoang swallowtail a khona ho monya mocheso oa mahlaseli a letsatsi ka tsela e hlollang. Lirurubele ha li thusoe feela ke mapheo a tsona a ’mala o lefifi empa li thusoa hape ke makhekhebu a palamaneng, a manyenyane hoo a ka bonoang ka microscope. Makhekhebu ana a na le mekoti e bōpehileng joaloka matlo a linotši e arohantsoeng ke liforo tse kenyang khanya ka mekoting. Sebōpeho sena se entsoeng ka mokhoa o bohlale, se monya khanya ea letsatsi e leng se etsang hore mapheo a be matšo le ho feta, ebe serurubele sea futhumala.

Koranta ea Science Daily e re: “Le hoja lepheo la serurubele e le e ’ngoe ea lintho tse fokolang ka ho fetisisa, le susumelitse borasaense hore ba batle mokhoa o mocha oa theknoloji o tla etsa hore khase ea haedrojene, e leng peterole ea ka moso e sa senyeng tikoloho e imene habeli ’me e tla etsoa ka metsi le khanya ea letsatsi.” Hape theknoloji eo e ka thusa ho ntlafatsa lisebelisoa tsa mahlo le lintho tse hlokang mahlaseli a letsatsi.

U nahana’ng ka see? Na mapheo a serurubele a khonang ho monya khanya a bile teng ka ho iphetola ha lintho? Kapa na a entsoe?