SEHLOOHO SE KA NTLE | U KA ITLOAETSA HO ETSA LINTHO TSE MOLEMO JOANG?
2 Lokisa Maemo a Hao
Le hoja u ipoleletse hore u batla ho ja hantle, u utloa u khaletse ice cream.
U ikemiselitse ho khaotsa ho tsuba, empa motsoalle oa hao ea tsebang hore u batla ho khaotsa ho tsuba o u fa sakerete.
Le hoja u ikemiselitse ho ikoetlisa kajeno, u tsoafa le ho sheba lieta tsa ho matha ka otoropong!
Mehlala ee e tšoana ka’ng? Rea hlokomela hore maemo ao re ipehang tlas’a ’ona le batho bao re tloaelaneng le bona ba ka re sitisa ho khaotsa ho etsa lintho tse se nang thuso.
MOLAO-MOTHEO OA BIBELE: “Ea masene ke ea boneng tlokotsi ’me a ipata, empa ba se nang phihlelo ba fetetse pele ’me ba tla fumana kotlo.”—Liproverbia 22:3.
Bibele e re khothalletsa hore re nahane esale pele. Ha re etsa joalo, re tla qoba maemo le ha e le a fe a ka re sitisang ho finyella lintho tse itseng. (2 Timothea 2:22) Ka mantsoe a mang, re lokela ho lokisa maemo a rōna.
Ithatafalletse ho etsa lintho tse se nang molemo ’me u inolofalletse ho etsa lintho tse molemo
SEO U KA SE ETSANG
Ithatafalletse ho etsa lintho tse se nang molemo. Ho etsa mohlala, haeba u batla ho khaotsa ho ja lijo tse se nang phepo, ho ka ba molemo hore ho hang u se ka ua li reka. Kaha ho ka ba thata ho fumana lijo tseo ha u li lakatsa, ho ka ba bonolo hore u khaotse ho li lakatsa.
Inolofalletse ho etsa lintho tse molemo. Ho etsa mohlala, haeba u batla ho ikoetlisa hoseng ha u tsoha, beha liaparo tseo u ikoetlisang ka tsona pel’a bethe letsatsi pele u e’o matha. Ha u etsa joalo, ho ka ba bonolo hore u qalelle ho matha.
Khetha metsoalle ka hloko. Hangata re tšoana le batho bao re tloaelaneng le bona. (1 Bakorinthe 15:33) Kahoo, u se ke ua tloaelana le batho ba tla u thatafalletsa ho tlohela lintho tse se nang thuso empa u khethe metsoalle e tla u khothalletsa ho etsa lintho tse molemo.