U KA ETSA’NG HA LITHEKO LI NTSE LI PHAHAMA?
Amohela Boemo
Ha litheko tsa lintho li ntse li eketseha hanyane ka hanyane, ho ka ba thata hore re lemohe, haholo haeba mokholo le oona o ntse o eketseha. Ka lehlakoreng le leng, haeba litheko tsa lintho li ntse li phahama empa mokholo oona o ntse o tšoana, re ka tšoenyeha ra ba ra imeloa kelellong. Sena se ka etsahala haholo haeba re e-na le lelapa leo re lokelang ho le hlokomela.
Re ke ke ra thibela litheko ho phahama. Empa haeba re amohela boemo bona, re tla itsoela molemo.
KE HOBANE’NG HA SEE E LE SA BOHLOKOA?
Batho ba nang le pono e nepahetseng ka litheko tse ntseng li phahama, ho ba bonolo hore . . .
ba lule ba khobile matšoafo. Ha re khobile matšoafo, re nahana hantle ebile re etsa liqeto tse nepahetseng.
ba qobe mekhoa e seng bohlale. Ka mohlala, ha se bohlale ho iphapanyetsa ho patala litšenyehelo tsa rona kapa ho sebelisa chelete hampe.
ba qobe ho ngangisana le ba lelapa ka chelete.
ba hlokomele seo ba ka se etsang e le hore ba reke lintho tseo ba li hlokang ’me seo se ka ba thusa hore ba se ke ba senya chelete.
SEO U KA SE ETSANG
Ikemisetse ho fetoha le maemo. Nakong eo litheko li phahamang haholo, ke bohlale ho fokotsa tsela eo re sebelisang chelete ka eona. Batho ba bang ba sebelisa chelete e ngata ho feta eo ba nang le eona ’me seo se etsa hore bophelo ba bona bo be thata joalokaha eka ba sesa khahlanong le maqhubu a noka e phallang haholo! Qetellong, sena se etsa hore ba imeloe haholo. Haeba u na le lelapa, ho loketse hore u tšoenyehe ka ho le hlokomela. Empa hopola sena: Litho tsa lelapa la hao li hloka lerato le nako ea hao ho feta ntho leha e le efe.
Ho phela bophelo bo mabothobotho ka chelete eo u se nang eona ho joaloka ho sesa khahlanong le maqhubu a noka e phallang