Sebelisa Chelete ea Hao ka Bohlale

KE HOBANE’NG HA SEE E LE SA BOHLOKOA?

Haeba u sa sebelise chelete ea hao hantle, u ka iphumana u tetebetse ka har’a mathata a lichelete. Le haeba u se na chelete e ngata ho ntse ho e-na le lintho tseo u ka li etsang ho e boloka.

SEO U KA SE ETSANG

U se ke oa reka lintho tseo u se nang chelete ea ho li reka. Haeba u etsa sena, u tla khona ho laola maemo a hao a lichelete le haeba u hlaheloa ke mathata a tšohanyetso.

E le hore u se ke oa sebelisa chelete e fetang eo u nang le eona, qala pele ka ho ngola mokholo oa hao fatše ebe u o bapisa le litšenyehelo tsa hao. Ka mor’a ho tseba hore na u hloka ho sebelisa chelete e kae, etsa bonnete ba hore u reka lintho tseo u li hlokang e le kannete. Leka ka hohle hore u sebelise chelete ho latela tsela eo u rerileng ka eona ’me u e fetole haeba litheko kapa mokholo oa hao o fetoha. Haeba u lenyalong, etsa liqeto tseo le molekane oa hao.

Leka sena: Ho e-na le ho reka lintho ka sekoloto, patala hang-hang haeba ho khoneha. Ba bang ba fumane hore ho sebelisa chelete ka tsela ena, ho ba thusa ho sebelisa chelete ka tsela eo ba e rerileng esale pele le ho ba thusa hore ba se ke ba tetebela likolotong. Hape, nka nako ea hao u bala litokomane tsa hao tsa banka ’me u hlahlobisise hore na u ntšitse chelete e kae ’me oa sebelisa e kae ka khoeli. Ho tseba hore na u na le chelete e kae ho tla u thusa hore u se ke oa tšoenyeha.

Ho sebelisa chelete eo u nang le eona ho ka ba thata. Empa ho rera esale pele hore na u tla sebelisa chelete e kae ho ka u thusa. U tla atleha ho laola maemo a hao a lichelete.

Sebetsa ka thata hore u se ke oa lahleheloa ke mosebetsi. Ke lintho life tseo u ka li etsang e le hore u se ke oa lahleheloa ke mosebetsi? Tse ling tsa tsona ke tsena: Fihla ka nako mosebetsing. E-ba le maikutlo a matle ka mosebetsi oa hao. Thusa ba bang ’me u sebetse ka thata. E-ba motho ea hlomphang. Latela melao ’me u ntlafatse bokhoni ba hao.

Qoba ho sebelisa chelete ea hao hampe. Ipotse: ‘Na ke na le mokhoa oa ho reka lintho tse turu kapa oa ho senya chelete?’ Ka mohlala, batho ba bangata ba senya chelete eo ba e sebelelitseng ka thata ka ho sebelisa lithethefatsi hampe, ho becha, ho tsuba le ho noa joala ka tsela e feteletseng. Mekhoa ena e ka ba kulisa ea ba ea etsa hore ba lahleheloe ke mosebetsi.

Boloka chelete bakeng sa maemo a tšohanyetso. Ha ho khoneha, behella chelete e seng kae ka thoko bakeng sa maemo a tšohanyetso le litšenyehelo tse sa lebelloang. Chelete eo e tla u thusa hore u se ke oa tšoenyeha haeba e mong oa lelapa a kula, a lahleheloa ke mosebetsi kapa ho etsahala ntho e ’ngoe eo u sa e lebellang.