Jambo hilo lingeweza kuathiri maoni yako juu ya matukio ya Biblia. Ungeweza kusoma hivi juu ya jinsi Eliya alivyomweka rasmi mrithi wake: “Akamkuta Elisha mwana wa Shafati, aliyekuwa akilima [kwa plau, NW], mwenye jozi za ng’ombe kumi na mbili mbele yake.” (1 Wafalme 19:19) Wewe wafikiri hilo lilitukia katika mwezi gani, na nchi ingeonekanaje? Na kwenye Yohana 4:35, Yesu alisema: “Hamsemi ninyi, Bado miezi minne, ndipo yaja mavuno? . . . Inueni macho yenu myatazame mashamba, ya kuwa yamekwisha kuwa meupe, tayari kwa mavuno.” Ingawa alitaja wakati fulani hususa, je! wewe waelewa ni lini?

Elisha alikuwa akishiriki katika shughuli kubwa ya kulima kwa plau alipoitwa awe nabii. Hiyo yaelekea kuweka wakati huo katika Tishri (Septemba-Oktoba), wakati ambapo joto kali mno la kiangazi lilikuwa limekwisha. Mvua za mapema zilikuwa zimeanza kulainisha udongo, zikiwezesha ulimaji wa plau, kufuatwa na upandaji.