Mwandro

Dauda, wa shi Sierra Leone, asu rongowa : « Tsi lelesheha harimwa mwana dago mtiti wa upandre wa kiblani. Suku, makati naka mwanamtsa, udjama wangu na udjama wangina u manihana ha sibabu ya shandza. Wowaili wako y tsaha. Ha hu namuwa trongo zini, wa hiri mwalimu dunia. Mwalimu unu a va mutru tsuwani shido, amoesa a mu vihidza harimwa dara ndjeu. Kaya homa na mutru ule, aka harimwa y dara, andriso dridrima na hu lawa hari. Makati a ngaliya harimwa y shido a rongowa : “Nisu ona mutru baba mduhazi tsuwani a tsengeleyao mbeli zangu ! A triya nguo ndjeu. Na waye mbole amoesa mduhazi, na nyele zahe vi trupu, na waye asi endra ha hu vereha mwanashteku.”

« Uwo de bakoko wangu de ako mu rongowa vanu ! Amoesa a andrisa hu limbiha na hu lawa keme na hu rongowa amba : “Neka kamusi amini zizo ni rongowao, namu je mu ngaliye wanyu wanyewe !” Bila shaka, kavwa parihuana ata mutru moja mengoni na wasi a shindra a para li bari la waye hu endra a ngaliye ! U mwalimu a mu trulidza mutru unu ha hu mu tsomoleya maji yaka ya tsanganisiwa na malavo aka a ya vinga monimwa kudjukudju.

« Ha mutru ule aka na y shido, “bakoko wangu” a katra amba y shandza iyo ya udjama watru. A mu ambia koko wangu amba y mu lazimu a fanye hazi harimwa y shandza iyo wala asi riye. Udjama umoja ule u kubali ya mahukuma. Umani u ziya vavo. »

Trongo nori de zini kazi lawa hu hidjiri harimwa y Afrika ya juwa la hutswa. Harimwa mkabala unu wa li dunia, nori harimwa mikabala yangina tsena, miliyoni za wantru wao u amini amba wafu wao wendra harimwa li dunia la sirini, na vahano vani waliyo, wao u shindro ona amoesa u shindro fanya trongo harimwa ya maesha ya wanadamu shivandreju mwatsi. Eba zizo kweli ? Eba u wafu kweli wasu eshi ? Na neka zizo trambo, mbani de a rengao zi plasi za u wafu ? Ya muhimu swafi wasi hu juwa li djawabu la kweli la ya masu’ala yayo. Isi endra na ya maesha yatru.