MUSOMO WA 10
Namna jeje ɗe utso juao i ndzia i ri vingao ha Mungu ?
1. Eɓa ndzia moja tu ɗe i ri vingao ha Mungu ?
« Namudzifahamishe na u watru wadzifanyao amba wao watru washukidziwa marongozi na Mungu wayajudze » (MATIYO 7:15).
Insa a somedza u watru wa mu vendzao Mungu ndzia moja tu, yaani amba vwa dini moja tu ɗe ya kweli. A i fanisa sawa sawa na pare li vingao harimwa ya maesha ya dahari. Tsena a rongoa amba, « watru wa[li]parao, wao [wa] washashi » (Matiyo 7:14). Mwezi Mungu, waye u kuɓali ɗe i dini i somedzao Urongozi wa kweli wahe tu. Piya u warumwa wa kweli wa Mungu, u ɗunga i ndzia Mungu a i vendzao. — Soma Zaɓur 25:5 ; Maefeso 4:4, 5.
Ngalia i video Eɓa Mungu u kuɓali piya zi dini ?
2. Insa a rongoa trini ju la watru wa rongoao amba wasu mu ɗunga ?
« Hanyoni hawo wao urongowa amba wao umujuwa Mungu, ɓadi wasumuhara ha zi zitrendro zawo » (TITUSA 1:16).
Vwa dini nyengi zi rongoao amba zisu mu ɗunga Insa, tsena amba zisu somedza i kweli ju la Mungu. Ɓe risu ona amba, zi dini zizo ne, kazisu afikiana, tsena misomo yazo ya tafauti swafi. Insa a fahamisha wana-zioni wahe amba, vwa watru watso somedzao trambo, tsena watso menya i dini waye a wa somedzayo. Watru wanu wasu fana na watru wa ambuduo Mungu ha kweli. Tsena wasu dji rongoa amba wawo makretien, yaani watru wa mu ɗungao Insa. Ɓe risu jua jeje amba wawo tsi makretien wa kweli ? Mana, ya makretien wa kweli tu, ɗe wa onesedzao swifa na zitrendrwa ndjema za venuha, u wanadamu piya wa zi onao. — Soma Matiyo 7:13-23.
3. Utso jua jeje amba u warumwa wa kweli wa Mungu ɗe wavi ?
Vwa ãlama tsano tsizani zitso hu saidiao u wa jue :
U warumwa wa kweli wa Mungu u stehi i Labiblu, tsena u amini amba iyo ɗe Urongozi wa Mungu. Wawo u fanya djitihadi wa ɗunge i misomo ya kweli ya i Labiblu, harimwa ya maesha yao. I dini ya kweli kai ja na zi fikira za wanadamu (Matiyo 15:7-9). U warumwa wa kweli wa Mungu kawa somedza trongo, amoesa wa fanya ɗe i kinyume. — Soma Yuhani 17:17 ; 2 Timuthausu 3:16, 17.
U warumwa wa kweli wa Mungu u tukuza li dzina la Mungu, Jehovah. Mitrume mauri Musa na Daudu, wako jua, tsena wako rumia, li dzina la Mungu, Jehovah. Insa ako tukuza wajau li dzina la Mungu, ha u li somedza. A saidia watru wa mu jue Mwezi Mungu, tsena a wa fundrisa wa mie amba li dzina la Mungu li twaharishidzihe (Matiyo 6:9). Vu vahanu u eshio, mbani ɗe a somedzao li dzina la Mungu ? — Soma Mahebraniya 13:15 ; Mavingizi Risala 2:21.
U warumwa wa kweli wa Mungu u tekeleza ufalume wahe. Mungu a mu veleha Insa shivandreju mwa tsi, ile a tekeleze i haɓari ndjema ya ufalume wahe. Ufalume wa Mungu, uwo tu ɗe i tama ya u wanadamu. Insa a u somedza ata i hufa yahe (Lukasi 4:43 ; 8:1 ; 23:42, 43). A rongoa amba wana-zioni wahe wajau watso somedza ufalume unu. Eɓa madza vwa mutru a paro lagua na wawe ju la ufalume wa Mungu ? Usu fikiri amba, ɓila shaka i dini ya mutru uwo trini ? — Soma Matiyo 24:14.
U warumwa wa kweli wa Mungu kawa renge fuvu harimwa trongo za li dunia la peu lini. Mutru atso wa jua jeje ? Wawo kawa fanya siasa, wala kawa renge fuvu harimwa trongo mauri mitsutsuho na mishukiyo mavareni (Yuhani 18:36). Tsena kawa ɗungu zi fikira na zi taɓia za peu za watru wa li dunia lini (Yakoɓu 4:4). — Soma Yuhani 17:16.
U warumwa wa kweli wa Mungu u onesa mahaɓa ya kweli wawo na wawo. Urongozi wa Mungu u wa somedza wa stehi u wanadamu wa zi tsi piya. Mara nyengi, zi dini za trambo, zizo u renga fuvu harimwa zi kondro, ɓe u warumwa wa kweli wa Mungu, wawo kawa renge fuvu harimwa zi kondro (Mika 4:1-3). Ɗe i kinyume, wawo u rumia wakati wao na zi mali zao, ile wa saidie, tsena wa trie ɓari wanyao. — Soma Yuhani 13:34, 35 ; 1 Yuhani 4:20.
4. Usu fikiri amba i dini ya kweli ɗe ivi ?
Dini ivi ɗe i somedzao Urongozi wa Mungu, i Labiblu ? Dini ivi ɗe i tukuzao li dzina la Mungu, Jehovah ? Dini ivi ɗe i tekelezao amba ufalume wa Mungu, uwo tu ɗe i tama ya u wanadamu ? U watru wa dini trini ɗe wa onesedzao mahaɓa ya kweli, tsena kawa renge fuvu harimwa zi kondro ? Usu fikiri jeje ? — Soma 1 Yuhani 3:10-12.