Eɓa ya Marongozi ya Mungu ya gaudziwa ?

Ɓaãdhwi za watru wasu dji dzisa neka ya Marongozi ya Mungu (i Miangishio mitwaharifu) ya gaudziwa. Mutrume Isaya a rongoa amba Urongozi wa Mungu « uwo wa daima » (Isaya 40:8). Namna jeje ɗe ritso juao ri kena yakini amba zi nguwahadi za Mungu zi hifadhwiwa harimwa ukamilifu wazo ?

Hale oho, makati watru wako angiha ya makalima yaka ya angihwa na i mitrume, wako hasiɓu kula harufu ya i miangishio mitukufu pare wa kena yakini amba kawa gaudza shitru, kawa engedza, wala kawa vungudza shitru. Ha ivo wanadamu kawasi wakamilifu, ɓaãdhwi za wawo wako angiha wa fanya wana halati. Ɓe Mungu ana ushindzi wa uhifadhwi Marongozi yahe na u ya ɓalilia amba yasu gaudziwe.

NAMNA JEJE ƊE RITSO JUAO RI KENA YAKINI AMBA LEO I MIANGISHIO MITWAHARIFU I VINGI YA MAHAƁARI YA MWANDRO YA MUNGU ?

Vwa zaidi ya kirtasi alifu za hale za vinga i Miangishio mitwaharifu. Neka vwa kirtasi i liona mwana tafauti, mutru ujua a fanise kirtasi ini na kirtasi zangina za i Miangishio mitwaharifu, ile a pare ya mahaɓari ya mwandroa.

Nari vumbue zi kirtasi za hale zi hiriwao Kirtasi za verwa za ɓahari ya Fa (Rouleaux de la mer Morte) za parihana u mwaha alifu wa tusu mia wa arɓaini na saɓa (1947) na watru wa shi Araɓiya, harimwa magumbo kariɓu na i ɓahari ya Fa (mer Morte). Zi kirtasi za hale zini zina magudru ya i Miangishio mitwaharifu, zi kirtasi zini zina zaidi ya maha alifu mbili. Wataãlamu wa Labiblu wa fanisa zi kirtasi zini na i Miangishio mitwaharifu ri lionayo leo. Wa para trini ?

Wa para amba zizo zi lio harimwa i Miangishio mitwaharifu ri lionayo leo za sawa sawa na miangishio ya handrab. Utunduzi wa kusudi wa kirtasi za hale u hakikisha amba zizo ri zi somao harimwa i Miangishio mitwaharifu, zizo zi vingi ya mahaɓari ya mwandro ya Mungu. Ritso jua ri kena yakini amba Mungu a hifadhwi ha kusudi i Miangishio mitwaharifu ile i miangishio ri lionayo leo i ke ya kweli.

Ɓasi, ritso jua ri some i Miangishio mitwaharifu ha ukana yakini amba iyo ya kweli. Ha usika iyo fikirani, nari one avasa vanu izo i mitrume wa ri somedzao ju la Mungu.