Ya madjini yasi triliya shime uansuifu kinyume na Mungu

Be mana trini Shetwani na ya madjini yahe waliyo na djitihadi nori de ini ya hu poteza wanadamu ? Mana wasi tsaha wa ri vinge harimwa uansuifu wao. Wasi tsaha ri wa ambudu de wao. Wasi tsaha ri amini zi trambo zao na hu fanya zi trongo zi mu tukiyao Jehovah. Mengoni mwa zi trongo zizo, vwa mila nyengi za patana na wafu.

Y hufa ya mutru ri mu vendzao uwo wakati u sikitishao swafi. Kaya lazimu ra ona haya au ra ona amba iyo kaya stahiki wasi hu enyesa y hamu yatru. Insa « a shukiwani matsozi » baanda ya y hufa ya mwandzani wahe Lazare (Jean 11:35).

Vwa mila nyengi za patana na y hufa, amoesa zizo marwahi marwahi harimwa li dunia. Wengini mwazo kazendre kinyume na musomo wa y Labiblu ; be, vwa za saliya amba musomo wazo au musingi wazo u vinga wantru wahi fikiri amba wafu wao wasi eshi tsena, amoesa u shindro ona wendza mo. Hu ngalia mufu uku mdzima, hu sika yeda ya upwari, na madziho ya harama nyengi, mila zizo piya zisi enyesa amba wantru wasi riya hu tukiza wafu. Be, makati iliyo amba wafu « wao kawa mayizi trongo itsokao yotsi », wao wa fanyao trongo zizo wasi kubali zi trambo za Shetwani (Ecclésiaste 9:5).

Vwa mila zangina tsena au misherehiyo y jao na uaminifu u rongowao amba wafu wasi tsaha musada wa wendza mo amoesa wao u taambisha wendza mo neka kawasi wa trulidza. Harimwa baandhui za tsi, wantru u fanya misherehiyo na hu towa masadaka vwahi vira mwaha au suku 40 baanda ya mutru a fa. Misherehiyo na ya masadaka yayo yasi rongolwa amba ari yasi saidiya u mufu ya mu vinge ata a waswili harimwa li dunia la sirini. Udzevu wangina tsena u onehuanao mara nyengi de hu elesheya u wafu shahula na shahunwa.

Trongo zini kaza stahiki mana zisi kubali zi trambo za Shetwani za patana na wafu. Jehovah katso kubali ata suku ra renga fuvu harimwa mila ya misomo ya lawa ha madjini ! (2 Corinthiens 6:14-18).

Warumwa wa Mungu wa kweli kawa renge fuvu litsokao lotsi harimwa maendreleyo ya endresao mbeli zi trambo za Shetwani. Ha kinyume, vwa moja na mahaba, wao u fanya djitihadi wa saidiye wao wendza mo na hu wa trulidza zi roho. Wao u juwa amba Jehovah tu de atso shindrao a saidiye mutru a fa (Job 14:14, 15).

Trongo za shi ugangi zi remwa na Mungu

Baandhui za wantru wao u hadisi na madjini maswa ha maswa au u vira ha magangi. Iyo u hiriwa ugangi. Hu hedza madjini, y ilimu dunia, utsai, hu ngalidziya na hu hadisi na wafu zizo piya mifano ya ugangi.

Y Labiblu isu rema trongo zini ha hu rongowa namna ini : « Kaya lazimu vwa parihuana ata mutru moja [...] a ngalidziyao au a fanyao utsai au mutru a vurao tso, wala mwalimu dunia, wala mutru a vutsao masahiri, wala mutru a endrao ha mugangi, wala mutru a rongowao trongo zitso hidjirio, wala mutru a hodjio wafu. Mana mutru a fanyao trongo zizo iyo shitru shi engefu swafi ha Jehovah » (Deutéronome 18:10-12).

Mana trini Jehovah a ri fahamishao tsena ha nguvu na maendreleyo yayo ?

Ile rike fetre, Jehovah asi ri fahamisha na kalite piya za ugangi. Waye u vendza wanadamu, amoesa u shahiliha na wao, tsena asi juwa amba wao waliyo na miparano na ya madjini wasi dji vinga harimwa maondo.

Mugangi wa dago la Bresil, a hiriwao Nilda asi lawa shahidi ha trongo zini. Madjini ya ngamidza maesha yahe. Asi rongowa : « Ya madjini [...] yako ni heya, yako ni mba amuri. Sa moja nako ka na fikira zangu, sa moja zako ni lawa, muisoni tsi baliwa harimwa lapitali ya wendza masera. Ya madjini yako ni taambisha halisi ata tsi fanyiha muwade. Nako renga malalao ya hu ni trulidza amoesa tsi ngiya harimwa ulevi na uvura siga vavo na vavo. Na iyo y renge maha mengi. »

Alafu, ha sibabu ya musada wa Jehovah na Mazahidi zahe shivandreju mwatsi, Nilda a dji buliya na zitriko za ya madjini. Avasani ana maesha ya rahara, ya jaya fetre. Asi rongowa : « Nisi usiya wantru piya : musike na mukataba utsokao yotsi na ya madjini, laukani ha ushashi tu. »