Ufalume wa Mungu iyo trini ?

1. Ufalume wa Mungu iyo trini ?

Ufalume wa Mungu, iyo sirikali i lio mbinguni. Ufalume uwo, utso toa piya zi sirikali zi lio shivandreju mwa tsi, ile uwo u tawale. Tsena ufalume uwo utso fanya amba i uvendza ya Mungu i fanyishihe, mbinguni na shivandreju mwa tsi. Iyo haɓari ndjema swafi ! U wanadamu wasu tsaha wa tawaliwe fetre, na i sirikali ya Mungu itso tsimidza hadja ini. Itso fanya amba wanadamu piya shivandreju mwa tsi wa ke shitru shi moja. — Soma Danieli 2:44 ; Lukasi 11:2 ; Matiyo 24:14.

Piya zi ngufalume, zizo u vingwa na mufalume. Jehovah a mu tsahua Mwana wahe Insa Kiristi, au Almasi, a ke ɗe Mufalume wa i sirikali yahe. — Soma 2 Monye 1:11.

Ngalia i video Ufalume wa Mungu iyo trini ?

2. Mana trini Insa a lio ɗe u Mufalume mwafaka ?

Insa ɗe u Mufalume mwafaka mana waye mwema, tsena waye u vendza i haki (Mahebraniya 1:9). Tsena wajau, waye ana ushindzi wa usaidia u wanadamu. Makati a ɓaãthiwa, waye a heya mbinguni. Mbinguni oho, a ketsi kumeni ha Mungu, ha ulindra amba Mungu a mu hetsi Mufalume (Mavingizi Risala 2:34, 35). Mungu a mu va i yezi a tawale, tsena tsi hale, Insa atso rumia i yezi a tawalie i shivandre ya tsi piya, rangu mbinguni. — Soma Danieli 7:13, 14.

3. Mbani ɗe watso tawalao vwamoja na Insa ?

Shikao i hiriwao « u watwaharifu » itso tawala mbinguni vwamoja na Insa (Danieli 7:18). U watru wa handra wa tsahuliwa, ile wa ke harimwa i shikao ya u watwaharifu, ɗe maswahaɓa matuĩvu ya Insa. Alafu ata i leo, Jehovah a endrelea utsahua watru watuĩvu wangina, watru ɓaɓa na watru mama. Wawo u ɓaãthiwa ha mwili wa shi malaika mauri ɗe Insa. — Soma Yuhani 14:1-3 ; 1 Makorintiyo 15:42, 43.

Watru wangavi ɗe watso endrao mbinguni ? Insa a rongoa amba watso ka « mwana ɓangwe [mutiti] » (Lukasi 12:32). Watso ka watru alifu mia wa arɓaini na nne (144 000), tsena watso tawalia i shivandre ya tsi vwamoja na Insa. — Soma Mivenuliyo 14:1.

4. Trini ɗe ya djiri makati Insa a rendreha Mufalume ?

Ufalume wa Mungu u andrisa ufanya hazi mwaha alifu wa tusu mia na kumi na nne (1914)a. Trongo ya handra Insa a i fanya makati a rendreha Mufalume ɗe ivi ? A mu vutsu Shetwani na madjini yahe shivandreju mwa tsi. Iyo i mu jadza Shetwani hasera swafi, ata a andrisa uzidisha zi taãɓu harimwa li dunia piya (Mivenuliyo 12:9, 12). Iyo ɗe i mana amba, rangu vavo, ya maondo ya u wanadamu yasu endra na uengedzeha tu. Zi kondro, zi ndza, ya mawaɗe, na i midridrimiyo ya shivandre ya tsi, zizo za mengoni mwa i « ãlama » i onesedzao amba, tsi hale, Ufalume wa Mungu utso renga zi dhwamana shivandreju mwa tsi, u zi endrese. — Soma Lukasi 21:7, 10, 11, 31.

5. Ufalume wa Mungu usu fanya trini leo, tsena utso fanya trini meso oho ?

Ha i ndzia ya mutekelezeyo wa Urongozi wa Mungu harimwa li dunia piya, ufalume wa Mungu usu ngulidza watru wengi wa zi tsi piya, wa ke shitru shi moja. Miliyoni za wanadamu, watru ɓaɓa na watru mama wanyekevu, wasu mu tuĩ Insa, ile wa ke wakazi wa ufalume wa vingwa na Insa. Ufalume wa Mungu utso wa hifadhwi, makati utso angamidzao li dunia la peu lini. Ha zizo, piya wawo wa tsahao wa pare zi neema za ufalume unu, wa lazimu wa mu tsahue Insa a ke ɗe Mufalume wao, tsena wa mu tuĩ. — Soma Mivenuliyo 7:9, 14, 16, 17.

Harimwa muda wa maha alifu (1 000), Ufalume wa Mungu utso tsimidza iyo Mungu ako i tsaha mwandroni, ha u wanadamu. I shivandre ya tsi piya itso rendreha pevo. Mwisoni mwa i maha alifu, Insa atso mu regezea ɓaɓahe Ufalume (1 Makorintiyo 15:24-26). Eɓa vwa mutru amba watso vendza u lague na waye ya patana na ufalume wa Mungu ? — Soma Zaɓur 37:10, 11, 29.