Mahaɓari

MUƁAĨSHIYO U watru watso ɓaĩshiwao, watso ketsia zi ziri zi lio u mbeli, kabla ya i hutuba ya muɓaĩshiyo kaya andriswa, i mufumotsi asuɓuhi, ɓadi neka vu ɓuzu trongo zangina. Kula mutru ɓaina yawo, a lazimu a vinge nguo ya usitirifu ya uhoa na sarvieti.

MULAHIKIO U watru wa mu lahikinio, wa vavo ile wa mu saidieni. Namu wa vulikie fetre, ha uɗunga zizo watso mu ambianizo, ya husiana na ulisha ya magari, na uzinga harimwa i mikaɓala li trengwe li fanyishihao, na mutru u hetsia munyahe shiri ya uketsi, na zangina na zangina.

MUSADA WA MARIKE Harama nyengi ɗe za fanyishiha, ile ziri zi toshe, vu ke zombo za ungalia video na uvulikia i ɓarnamadji, na trongo zangina ile li trengwe li stawi, tsena li ri saidie ri ke kariɓu na Jehovah. Kula mutru a tsahao, tsena a jiviwao a saidie, atso jua a toe musada wa marike. Musada unu, utso saidia u live harama zini, tsena utso saidia u mutekelezeyo wa Ufalume wa Mungu, harimwa li dunia piya. Ha ufanya ha wangu, vwa bwati za utria marike, za hetsiwa harimwa li trengwe, harimwa mikaɓala amba mutso zi ona fetre. Mutso jua tsena mu toe musada ha urumia Internet harimwa donate.jw.org. Kula musada wa marike, utso kao wotsi, utso kuɓaliwa. I Shikao dhwamana isu jiviwa i mu vosheleyeni marahaɓa, ha u musada wanyu mwa u toa, ile mu saidie zi hazi za Ufalume wa Mungu.

VAHANU VWA HUSU UNONO Namu elewe fetre amba, ɗe u watru wa para taãɓu za unono wa hafla, au uwaɗe wa hafla tu, ɗe watso juao wa endre. Ɓe vavo tsi vahanu vwa uzihira mawaɗe.

WAHUTADJI Neka musu tsaha mu renge fuvu, harimwa zi hazi za lazimu zi fanyishihe harimwa li trengwe, namu endre mwa dji angihe, vahanu mutru a parao mahaɓari, tsena kula uwo a tsahao a saidie zi hazi a dji angihao.

ZIRI Namu wa fikiri wanyawe. Kaya lazimu mwa hetsia ziri neka tsi ɗe, udjama wanyu, u watru wa pashia gari moja na wanyu, u watru wa eshio vwamoja na wanyu, au u watru wa twalio i Labiblu na wanyu. Musu lishe ata shitru harimwa ziri zangina.

ZITRU ZA RONDROLWA Kula shitru ya ɗalihwana au ya latsiha, i lazimu i vingwe vahanu watru wa hetsio zitru za rondrolwa. Neka mu latsishiwa na shitru, namu endre mwa dzise watru wa lio vavo. Mwana kasu ona wadzaɗe wahe, i lazimu a vingwe tsena vavo. Ɓe, ile risu ke harimwa ushangavu, namu ngalie wana wanyu, tsena nawa ke kariɓu na wanyu.

ƁUNDJILIYO MAHUSUSU

Likoli ya watru wa tekelezao haɓari ndjema ya ufalume Wawo wa vitsao wakati mwengi, ha utekeleza Urongozi wa Mungu, wa liona maha shirini na miraru (23) ata maha sitini na mitsano (65), wa vendzao wa tekeleze zaidi tsena Urongozi wa Mungu, wasu lahikiwa harimwa ɓundjiliyo litso wa vao maeledzo ya lazimu, mufumovili ujoni. U vahanu na i lera, zitso rongolwa wakati wa utoa mahaɓari.