முன்னேறுகிற பைபிள் படிப்புகளை நடத்துதல்—மாணவர்களை அமைப்பிடம் வழிநடத்துவது
1. ஒவ்வொரு வாரமும் பைபிள் படிப்பின்போது யெகோவாவின் அமைப்பைப் பற்றி ஒரு குறிப்பைச் சொல்வது ஏன் பயனுள்ளது?
1 நம்முடைய மாணவர்களுக்கு பைபிள் கோட்பாடுகளைப் பற்றி கற்பிப்பது மட்டுமே நம் இலக்கு அல்ல, கிறிஸ்தவ சபையின் அங்கத்தினர்களாய் ஆக அவர்களுக்கு உதவுவதும் தான். (சக. 8:23) யெகோவாவின் சாட்சிகள்—அவர்கள் யார்? அவர்களது நம்பிக்கை என்ன? என்ற சிற்றேடு இதற்கு உதவி செய்கிறது. புதிய பைபிள் மாணவர்களுக்கு அதன் ஒரு பிரதியைக் கொடுத்து வாசித்துப் பார்க்கச் சொல்லுங்கள். அதோடு, ஒவ்வொரு வாரமும் படிப்பின்போது யெகோவாவின் அமைப்பைப் பற்றி ஒரு குறிப்பைச் சொல்ல சில நிமிடங்களைச் செலவிடுங்கள்.
2. சபைக் கூட்டங்களுக்கு வரும்படி பைபிள் மாணவர்களை நீங்கள் எப்படி உற்சாகப்படுத்தலாம்?
2 சபைக் கூட்டங்கள்: பைபிள் மாணவர்கள் கடவுளுடைய அமைப்புக்குப் போற்றுதல் காட்டுவதற்கான முக்கிய வழி, சபைக்கூட்டங்களில் நம்முடன் கலந்துகொள்வதாகும். (1 கொ. 14:24, 25) எனவே, ஒவ்வொரு முறை அவர்களை சந்திக்கும்போதும் ஒரு கூட்டத்தைப் பற்றி சொல்லலாம்; இப்படி நமக்கு நடக்கும் ஐந்து கூட்டங்களைப் பற்றி விளக்கமாகச் சொல்லலாம். அடுத்த வார பொதுப் பேச்சின் தலைப்பைச் சொல்லுங்கள். காவற்கோபுர படிப்பிலும் சபை பைபிள் படிப்பிலும் கலந்தாலோசிக்கப்படும் பிரசுரங்களைக் காட்டுங்கள். தேவராஜ்ய ஊழியப் பள்ளியையும் ஊழியக்கூட்டத்தையும் பற்றி விவரியுங்கள். பள்ளியில் உங்களுக்குப் பேச்சு நியமிக்கப்படும்போது அதை அவர்களுடன் சேர்ந்து பழகிப் பாருங்கள். கூட்டங்களில் கேட்ட சிறந்த குறிப்புகளை அவர்களிடம் சொல்லுங்கள். நம் பிரசுரங்களில் உள்ள படங்களைக் காட்டி கூட்டங்கள் எப்படி நடக்கின்றன என்பதை அவர்கள் கண்முன் நிறுத்த முயலுங்கள். படிக்க ஆரம்பித்த முதல் வாரத்திலிருந்தே கூட்டங்களுக்கு வரும்படி அழையுங்கள்.
3. அமைப்பின் என்ன அம்சங்களைப் பற்றி நாம் கலந்துபேசலாம்?
3 நினைவுநாள் நிகழ்ச்சி, மாநாடுகள், வட்டாரக் கண்காணியின் சந்திப்பு போன்றவை வரவிருக்கும்போது அவற்றைப் பற்றி விளக்க சில நிமிடங்களைச் செலவழியுங்கள்; அவர்களும் கலந்துகொள்ள ஆர்வத்தைத் தூண்டுவியுங்கள். பின்வருவதைப் போன்ற கேள்விகளுக்குப் படிப்படியாகப் பதிலளியுங்கள்: நாம் ஏன் யெகோவாவின் சாட்சிகள் என அழைக்கப்படுகிறோம்? கூட்டம் நடக்கும் இடங்களை நாம் ஏன் ராஜ்ய மன்றங்கள் என்று குறிப்பிடுகிறோம்? மூப்பர்களும் உதவி ஊழியர்களும் என்னென்ன வேலைகளைச் செய்கிறார்கள்? பிரசங்க வேலையும் பிராந்தியமும் எப்படி ஒழுங்கமைக்கப்படுகின்றன? நம் பிரசுரங்கள் எப்படித் தயாரித்து வெளியிடப்படுகின்றன? இந்த அமைப்புக்கு எப்படி பண உதவி கிடைக்கிறது? ஊழியத்தை மேற்பார்வையிடுவதில் கிளை அலுவலகத்தின் பங்கென்ன, ஆளும் குழுவின் பங்கென்ன?
4, 5. நம் வீடியோக்கள் எப்படி அமைப்பின் மீது போற்றுதலை வளர்க்கும்?
4 கற்பிக்கும் வீடியோக்கள்: நம் வீடியோக்களின் மூலம் பைபிள் மாணவர்கள் யெகோவாவின் அற்புத அமைப்பைக் காணும்படிச் செய்வது மற்றொரு வழியாகும். பூமியின் கடைகோடிகளுக்கு என்ற ஆங்கில வீடியோ நம் உலகளாவிய பிரசங்க வேலையைப் பற்றி விளக்குகிறது; நம் சகோதர கூட்டுறவு என்ற ஆங்கில வீடியோ நம் உலகளாவிய சகோதரத்துவத்தை வெளிப்படுத்துகிறது. தெய்வீக போதனையால் ஒன்றுபட்டிருத்தல் என்ற ஆங்கில வீடியோ யெகோவாவின் சாட்சிகளின் மத்தியிலுள்ள ஐக்கியத்தைக் காட்டுகிறது. ஒரு பெண்மணி ஐந்து ஆண்டுகளாக, நம் பத்திரிகைகளையும் வேறு பல பிரசுரங்களையும் பெற்று வந்தார். யெகோவாவின் சாட்சிகள்—அந்தப் பெயருக்கு பின்னுள்ள அமைப்பு என்ற ஆங்கில வீடியோவைப் பார்த்தபோது அவரது கண்கள் குளமாயின. தன்னைச் சந்திக்க வந்த சாட்சிகள் மீது அவர் நம்பிக்கை வைத்திருந்தார், ஆனால் அந்த வீடியோவைப் பார்த்த பிறகு அமைப்பின் மீதும் நம்பிக்கை வைக்க ஆரம்பித்தார். முறைப்படி அவருக்கு பைபிள் படிப்பு ஆரம்பிக்கப்பட்டது, மறு வாரமே ராஜ்ய மன்றத்திற்கு வந்து கூட்டங்களில் கலந்துகொள்ள ஆரம்பித்தார்.
5 நம் பைபிள் மாணவருடன் வாரா வாரம் சில நிமிடங்களைச் செலவழிப்பதன் மூலமும், நமக்குக் கிடைக்கும் பைபிள் உபகரணங்களைப் பயன்படுத்துவதன் மூலமும் இன்று யெகோவா பயன்படுத்தி வரும் ஒரே அமைப்பிடம் அவர்களைப் படிப்படியாக வழிநடத்தலாம்.