பலன் தரும் விதத்திலும் சுவாரஸ்யமாகவும் பைபிளைப் படிப்பது எப்படி?

யோசுவா திருச்சட்டத்தைப் படிக்கிறார்; எரிகோவின் மதில்கள் இடிந்து விழுகின்றன, ஆனால் ராகாபின் வீடு அப்படியே இருக்கிறது; வானத்தை நோக்கி கையை உயர்த்தி யோசுவா ஜெபம் செய்கிறார்

யோசுவாவுக்கு முன்னால் ஒரு பெரிய வேலை காத்திருந்தது. வாக்குக் கொடுக்கப்பட்ட தேசத்திற்குள் இஸ்ரவேல் மக்களை அவர் வழிநடத்த வேண்டியிருந்தது. அது ஒரு சவாலான வேலைதான்! அதனால், யெகோவா அவரிடம், “தைரியமாகவும் ரொம்பவே உறுதியாகவும் இரு” என்று சொல்லி அவரைப் பலப்படுத்தினார்; உற்சாகப்படுத்தினார். திருச்சட்டத்தைப் படித்து, அதன்படி செய்தால், ஞானமான தீர்மானங்களை எடுக்க முடியுமென்றும் வாழ்க்கையில் வெற்றி பெற முடியுமென்றும் அவரிடம் யெகோவா சொன்னார்.—யோசு. 1:7, 8.

“சமாளிக்க முடியாத அளவுக்கு நிலைமை படுமோசமாக” இருக்கும் ஒரு காலத்தில் நாம் வாழ்வதால், நம் வாழ்க்கையும் போராட்டம் நிறைந்ததாக இருக்கலாம். (2 தீ. 3:1) யோசுவாவைப் போல நாம் வாழ்க்கையில் வெற்றி பெற வேண்டுமென்றால், யெகோவா அவருக்குக் கொடுத்த ஆலோசனையின்படி நாமும் செய்ய வேண்டும். அதாவது, தினமும் பைபிளைப் படிக்க வேண்டும்; படித்த விஷயங்களின் அடிப்படையில் ஞானமான தீர்மானங்களை எடுக்க வேண்டும்.

ஆனால், நம்மில் சிலருக்கு பைபிளை எப்படிப் படிப்பதென்று தெரியாமல் இருக்கலாம். அல்லது, படிப்பதென்றாலே நமக்கு அலுப்புத் தட்டலாம். இருந்தாலும், பைபிளைப் படிப்பது ரொம்ப முக்கியம். “இப்படிச் செய்து பாருங்கள்” என்ற பெட்டியில், பலன் தரும் விதத்திலும் சுவாரஸ்யமாகவும் பைபிளைப் படிப்பதற்கான சில குறிப்புகள் இருக்கின்றன. அவை உங்களுக்கு ரொம்பப் பிரயோஜனமாக இருக்கும்.

“உங்கள் கட்டளைகளின்படி நடக்க எனக்கு வழிகாட்டுங்கள். நான் அவற்றில் பிரியமாக இருக்கிறேன்” என்று ஒரு சங்கீதக்காரர் பாடினார். (சங். 119:35) அவரைப் போலவே உங்களாலும் பைபிள் படிப்பை சுவாரஸ்யமானதாக ஆக்க முடியும். நீங்கள் தொடர்ந்து பைபிளைப் படிக்கும்போது, அருமையான புதையல்களைத் தோண்டி எடுப்பீர்கள்.

யோசுவாவைப் போல நீங்கள் ஒரு தேசத்தை வழிநடத்த வேண்டியதில்லை என்றாலும், தனிப்பட்ட விதமாக உங்களுக்கு சில பிரச்சினைகள் இருக்கலாம். அதனால், யோசுவாவைப் போல கடவுளுடைய வார்த்தையைப் படியுங்கள்; அதன்படி செய்யுங்கள். அப்படிச் செய்தால், ஞானமான தீர்மானங்களை எடுப்பீர்கள்; வாழ்க்கையில் வெற்றி பெறுவீர்கள்!

இப்படிச் செய்து பாருங்கள்

படிப்பதற்கு முன்பு ஜெபம் செய்யுங்கள். சர்வவல்லமையுள்ள கடவுளின் எண்ணங்கள், நம்முடைய நன்மைக்காக பைபிளில் பதிவு செய்யப்பட்டிருக்கின்றன. அதனால், பைபிளைப் படிப்பதற்கு முன்பு, அதைப் புரிந்துகொள்வதற்காகவும் மனதில் பதிய வைத்துக்கொள்வதற்காகவும் அதன்படி செய்வதற்காகவும் உதவி கேட்டு யெகோவாவிடம் ஜெபம் செய்யுங்கள்.—எஸ்றா 7:10.
சில கேள்விகளைக் கேட்டுக்கொள்ளுங்கள். பைபிளையும் பைபிள் பிரசுரங்களையும் படிக்கும்போது, ‘இந்த பகுதி யெகோவாவ பத்தி என்ன சொல்லுது? பைபிள்ல இருக்குற மையக் கருத்தோட இந்த விஷயம் எப்படி சம்பந்தப்பட்டிருக்கு? மத்தவங்களுக்கு உதவுறதுக்காக இந்த விஷயங்கள நான் எப்படி பயன்படுத்தலாம்?’ போன்ற கேள்விகளை உங்களையே கேட்டுக்கொள்ளுங்கள்.
படித்ததைத் தியானியுங்கள். ஒரு பகுதியைப் படித்துவிட்டு, கொஞ்சம் நிறுத்துங்கள். பிறகு, அதைப் பற்றி யோசியுங்கள். உங்களையே இப்படிக் கேட்டுக்கொள்ளுங்கள்: ‘இப்போ படிச்ச விஷயத்த பத்தி நான் எப்படி உணர்றேன்? ஏன் அப்படி உணர்றேன்? என் கடந்த கால வாழ்க்கையில நடந்த சில விஷயங்கள சமாளிக்க இந்த பதிவு எப்படி உதவியா இருந்திருக்கும்? இப்ப இருக்குற சூழ்நிலையையும், ஒருவேளை எதிர்காலத்துல வர்ற சூழ்நிலையையும் சமாளிக்குறதுக்கு இது எப்படி உதவியா இருக்கும்? இந்த நியமத்த இல்லனா இந்த ஆலோசனைய என் வாழ்க்கையில நான் எப்படி கடைப்பிடிக்கலாம்?’ (யோபு 23:5; சங். 49:3) நீங்கள் தியானித்துப் பார்க்கும்போது, சில பழக்கவழக்கங்களைத் தவிர்க்கும்படி யெகோவா ஏன் சொல்கிறார் என்பதை மற்றவர்களுக்கு விளக்க முடிகிறதா என்று பாருங்கள். அல்லது, நீங்கள் படித்துக்கொண்டிருக்கும் கதாபாத்திரம், குறிப்பிட்ட ஒரு சூழ்நிலையில் வேறு விதமாக நடந்திருந்தால் என்ன ஆகியிருக்கும் என்பதை யோசித்துப்பாருங்கள்.—உபா. 32:28, 29.
கற்பனை செய்துபாருங்கள். உதாரணத்துக்கு, யோசேப்பின் சகோதரர்கள் அவரை இஸ்மவேலர்களிடம் விற்ற காட்சியைக் கற்பனை செய்யுங்கள். (ஆதி. 37:18-28) அங்கே நடந்ததை மனத்திரையில் ஓடவிடுங்கள். அந்தக் காட்சியை... உரையாடலை... வாசனையை... கற்பனை செய்துபாருங்கள். அந்தக் கதாபாத்திரங்களுடைய இடத்தில் உங்களை வைத்துப் பாருங்கள். அவர்களுடைய யோசனைகளையும் உணர்ச்சிகளையும் கற்பனை செய்யுங்கள். இப்படிச் செய்யும்போது, பைபிள் படிப்பு ரொம்ப சுவாரஸ்யமாக இருக்கும்.
படிப்புக் கருவிகளைப் பயன்படுத்துங்கள். அமைப்பு கொடுத்திருக்கும் கருவிகளைப் பயன்படுத்தி, உங்கள் ஆராய்ச்சியை இன்னும் சுவாரஸ்யமானதாக ஆக்குங்கள். உங்கள் மொழியில், அச்சடிக்கப்பட்ட படிப்புக் கருவிகளையும் ஆன்லைனில் கிடைக்கும் படிப்புக் கருவிகளையும் பயன்படுத்தக் கற்றுக்கொள்ளுங்கள். அவற்றை நன்றாகப் பயன்படுத்துவதற்கு, மற்றவர்களிடம் உதவி கேட்கத் தயங்காதீர்கள். உதாரணத்துக்கு, உவாட்ச் டவர் பப்ளிகேஷன்ஸ் இன்டெக்ஸ் (ஆங்கிலம்) அல்லது யெகோவாவின் சாட்சிகளுக்கான ஆராய்ச்சிக் கையேடு போன்ற கருவிகள், குறிப்பிட்ட சில தகவல்கள் சம்பந்தப்பட்ட பிரசுரங்களைக் கண்டுபிடிக்க உதவும். அதோடு, நிறைய வசனங்களுக்கான விளக்கங்களைக் கண்டுபிடிக்கவும் உதவும். உங்களுக்குப் படிக்கத் தெரிந்த மொழியில் புதிய உலக மொழிபெயர்ப்பு பைபிள் இருந்தால், அதில் இருக்கும் இணைப்புகளைப் பயன்படுத்துங்கள். புவியியல், காலவரிசை, எடைகள் மற்றும் அளவுகள் பற்றிய பிரயோஜனமான தகவல்களும் மற்ற சில தகவல்களும் அவற்றில் இருக்கின்றன.
முக்கியக் குறிப்புகளை மறுபார்வை செய்யுங்கள். மறுபார்வை செய்வது, படித்த விஷயங்களை ஞாபகப்படுத்திப் பார்க்க உதவும். நீங்கள் கற்றுக்கொண்டதை மற்றவர்களோடு பகிர்ந்துகொள்வதும் ரொம்பப் பிரயோஜனமாக இருக்கும். ஊழியத்தில் பயன்படுத்துவதற்குத் தேவையான என்ன தகவல்களைக் கற்றுக்கொண்டீர்கள் என்று யோசித்துப்பாருங்கள். இவற்றையெல்லாம் செய்யும்போது, முக்கியக் குறிப்புகளை ஞாபகம் வைத்துக்கொள்ள முடியும். அதோடு, மற்றவர்களும் உங்கள் படிப்பிலிருந்து பிரயோஜனமடைவார்கள்.