மெய் கிறிஸ்தவ ஒற்றுமை​—⁠எவ்வாறு?

¹ உலகெங்கும் 234 நாடுகளில் சுமார் 380 மொழி பேசும் தொகுதியினரை, அதாவது அறுபது லட்சத்துக்கும் அதிகமானவர்களை ஒன்றுபடுத்துவது எது? யெகோவா தேவனின் வணக்கமே. (மீ. 2:12; 4:1-3) இன்று மெய் கிறிஸ்தவ ஒற்றுமை நிஜமானது என்பதை யெகோவாவின் சாட்சிகள் அனுபவத்தில் அறிந்திருக்கிறார்கள். ‘ஒரே மேய்ப்பனின்’ கீழுள்ள ‘ஒரே மந்தையாக’ நாம், இவ்வுலகின் பிரிவினை உண்டாக்கும் மனப்பான்மையை எதிர்க்க திடத்தீர்மானமாய் இருக்கிறோம்.​—⁠யோவா. 10:16; எபே. 2:2.

² புத்திக்கூர்மையுள்ள எல்லா சிருஷ்டிகளும் மெய் வணக்கத்தில் ஒன்றுபட வேண்டுமென்பதே அன்றும் இன்றும் கடவுளுடைய நோக்கம். (வெளி. 5:13) இதன் முக்கியத்துவத்தை அறிந்த இயேசு தம்முடைய சீஷர்களின் ஒற்றுமைக்காக உருக்கமாய் ஜெபித்தார். (யோவா. 17:20, 21) ஆகவே, கிறிஸ்தவ சபையின் ஒற்றுமைக்கு நாம் ஒவ்வொருவரும் எப்படி பங்களிக்கலாம்?

³ எவ்வாறு ஒற்றுமையாய் இருக்க முடிகிறது: கடவுளுடைய வார்த்தையும், அவருடைய ஆவியும் இல்லாமல் இருந்திருந்தால் கிறிஸ்தவ ஒற்றுமை எட்டாக் கனியாகவே இருந்திருக்கும். நாம் பைபிளிலிருந்து கற்றுக்கொள்பவற்றைக் கடைப்பிடிக்கும்போது கடவுளுடைய ஆவி நம்முடைய வாழ்க்கையில் தங்கு தடையின்றி செயல்படுகிறது. இதுவே ‘சமாதானக்கட்டினால் ஆவியின் ஒருமையைக் காத்துக்கொள்ள’ நமக்கு உதவுகிறது. (எபே. 4:3) அன்புடன் ஒருவருக்கொருவர் பொறுத்துப் போக தூண்டுவிக்கிறது. (கொலோ. 3:13, 14; 1 பே. 4:8) ஆகவே, ஒவ்வொரு நாளும் கடவுளுடைய வார்த்தையைத் தியானிப்பதன் மூலம் ஒற்றுமையின் வளர்ச்சிக்கு நீங்கள் பாடுபடுகிறீர்களா?

⁴ பிரசங்கித்து, சீஷராக்கும்படி நமக்குக் கொடுக்கப்பட்டுள்ள பொறுப்பும் நம்மை ஒற்றுமைப்படுத்துகிறது. மற்றவர்களுடன் சேர்ந்து கிறிஸ்தவ ஊழியத்தில் ஈடுபடும்போது “நற்செய்தியின் விசுவாசத்திற்காக ஒன்றாகப் போரா”டுகையில் ‘நாம் சத்தியத்தில் உடன் வேலையாட்களாய்’ ஆகிறோம். (பிலி. 1:27; 3 யோ. 8; NW) இவ்வாறு, சபைக்குள்ளாக அன்பின் ஐக்கிய கட்டுகள் பலப்படுகின்றன. சமீபத்தில் நீங்கள் எவருடன் சேர்ந்து ஊழியம் செய்யவில்லையோ அப்படிப்பட்ட ஒருவருடன் சேர்ந்து ஏன் இந்த வாரம் ஊழியம் செய்யக்கூடாது?

⁵ இன்று பூமியிலுள்ள ஒரே மெய்யான சர்வதேச சகோதரத்துவத்தின் பாகமாக இருப்பதற்கு நாம் எவ்வளவு கொடுத்து வைத்தவர்கள்! (1 பே. 5:9) சமீபத்தில், “தேவனை மகிமைப்படுத்துங்கள்” சர்வதேச மாநாடுகளில் ஆயிரக்கணக்கானோர் இந்த உலகளாவிய ஒற்றுமையைக் கண்கூடாக கண்டார்கள். ஒவ்வொரு நாளும் கடவுளுடைய வார்த்தையை வாசிப்பது, அன்பான விதத்தில் பிரச்சினைகளைத் தீர்த்துக்கொள்வது, ‘ஏகசிந்தையுடன்’ நற்செய்தியைப் பிரசங்கிப்பது ஆகியவற்றின் மூலம் நாம் ஒவ்வொருவரும் இந்த அருமையான ஒற்றுமைக்குப் பங்களிப்போமாக.​—⁠ரோ. 15:⁠6.