ஊழியத்தில் திறமைகளை மெருகூட்ட...—பத்திரிகை மார்க்கம்

ஏன் முக்கியம்? நிறைய பேர் நம் பத்திரிகையை விரும்பி படிக்கிறார்கள். ஆனால், பைபிள் படிப்பு வேண்டாம் என்று சொல்கிறார்கள். ஒருவேளை, ‘என்னோட மதமே எனக்கு போதும்’ என்று அவர்கள் நினைக்கலாம். இல்லை என்றால், ‘பைபிள் படிப்புக்கெல்லாம் நேரம் இல்லை’ என்று நினைக்கலாம். ஆனால், நம் பத்திரிகைகளை படிக்க படிக்க, பைபிளை பற்றி இன்னும் தெரிந்துகொள்ள வேண்டும் என்ற ஆசை அவர்களுக்கு வரலாம். (1 பே. 2:2) ஏதாவது ஒரு கட்டுரை அவர்கள் மனதை தொடலாம். ஒருவேளை அவர்களுடைய சூழ்நிலை மாறலாம். அதனால், நாம் அடிக்கடி அவர்களை போய் பார்த்து கொஞ்ச நேரம் பேசிவிட்டு வந்தால், அவர்களும் நம்மிடம் மனம் திறந்து பேச ஆரம்பிப்பார்கள். அதை வைத்து அவர்களுக்கு எந்த விஷயத்தில் ஆர்வம் இருக்கிறது, அவர்களுக்கு ஏதாவது பிரச்சினை இருக்கிறதா என்று நாம் தெரிந்துகொள்ள முடியும். இப்படி அடிக்கடி பேசினால், காலப்போக்கில் அவர்களுக்கு ஒரு பைபிள் படிப்பு ஆரம்பிக்க முடியும்.

எப்படி செய்யலாம்?

காவற்கோபுரம், விழித்தெழு! பத்திரிகைகள் கையில் கிடைத்ததும், அவர்களுக்கு கொண்டுபோய் கொடுங்கள். அடுத்த பத்திரிகை வரும் வரை காத்திருக்காமல், அடிக்கடி அவர்களை போய் பாருங்கள். நீங்கள் கொடுத்த பத்திரிகையில் இருக்கிற ஏதாவது ஒரு கட்டுரையை பற்றி பேசுங்கள். அப்போதுதான், அதை படிப்பதற்கு அவர்களுக்கு ஆர்வம் வரும். ஒவ்வொரு மாதமும் எந்த பிரசுரத்தை கொடுக்க வேண்டும் என்று நம் ராஜ்ய ஊழியத்தில் சொல்லியிருக்கிறார்களோ, அதை கொடுங்கள். எந்த தேதியில் போனீர்கள், எதை பற்றி பேசுனீர்கள், எந்த பத்திரிகையை கொடுத்தீர்கள் என்று ஒவ்வொரு முறையும் எழுதி வையுங்கள்.—ஜனவரி 2014 நம் ராஜ்ய ஊழியத்தில் பக்கம் 3-ஐ பாருங்கள்.
நன்றாக தயாரியுங்கள். பத்திரிகையை கொடுத்த உடனே வந்துவிடாதீர்கள், கொஞ்ச நேரமாவது அவர்களிடம் பேசுங்கள், நட்பாக பழகுங்கள். அப்போதுதான் அவர்களை பற்றி தெரிந்துகொண்டு, அவர்கள் ஆர்வத்தை தூண்டுவது போல் பேச முடியும்.
பைபிள் படிப்பு ஆரம்பிப்பதற்கு வாய்ப்பு கிடைக்குமா என்று பார்த்துக்கொண்டே இருங்கள். ஒருவேளை, அவர்கள் ஏதாவது ஒரு விஷயத்தை சொல்லிவிட்டு, ‘இதை பத்தி பைபிள்ல ஏதாவது சொல்லியிருக்கா?’ என்று கேட்கலாம். நேரடியாக பதில் சொல்லாமல், பைபிள் படிப்பு எடுக்க நாம் பயன்படுத்தும் புத்தகத்தில் இருந்து பதிலை காட்டுங்கள். அவர்களோடு கலந்துபேசுங்கள். பேசி முடித்ததும், அது சம்பந்தமாக இன்னொரு கேள்வியை கேளுங்கள். அடுத்த முறை வரும்போது அதை பற்றி பேசலாம் என்று சொல்லுங்கள். பைபிளில் இருந்தோ, பைபிள் சம்பந்தமான பிரசுரத்தில் இருந்தோ அவர்களிடம் தவறாமல் பேசுகிறீர்களா? கொஞ்ச நேரம் பேசினால்கூட, அது ஒரு பைபிள் படிப்புதான். நற்செய்தி சிறுபுத்தகத்தை கொடுத்து, பைபிள் படிப்பு எப்படி நடக்கும் என்று அவர்களுக்கு செய்து காட்டியிருக்கிறீர்களா? பைபிளை ஏன் படிக்க வேண்டும் என்ற வீடியோவையும் பைபிள் படிப்பு எப்படி இருக்கும் என்ற வீடியோவையும் போட்டு காட்டியிருக்கிறீர்களா? ஒருவேளை ஆரம்பத்தில் அவர்கள் பைபிள் படிப்பு வேண்டாம் என்று சொல்லியிருந்தாலும், இப்போது அவர்கள் சூழ்நிலை மாறியிருக்கலாம், இல்லையா? அதனால், பைபிள் படிப்பு ஆரம்பிக்க இன்னொரு முறை முயற்சி செய்து பாருங்களேன்!

இந்த மாதம் இதை செய்து பாருங்கள்:

யாருக்கெல்லாம் பத்திரிகைகளை கொடுக்கலாம் என்று பட்டியல் போடுங்கள். புது பத்திரிகைகள் கிடைத்ததும் அவர்களுக்கு கொடுங்கள். அடுத்த முறை, வேறு பத்திரிகைகளை கொண்டு வந்து தருவதாக சொல்லுங்கள்.