கஸக்ஸ்தானைச் சுற்றிப் பார்க்கலாமா?

கஸக்ஸ்தானில் மக்கள் நாடோடிகளாக வாழ்ந்தார்கள். இன்றுவரை, சில மேய்ப்பர்கள், தங்கள் ஆடு மாடுகளை பருவகாலத்துக்கு ஏற்ப வெவ்வேறு மேய்ச்சல் நிலங்களுக்குக் கொண்டுபோகிறார்கள். கோடைக் காலத்தில் அவர்கள் குளிர்ச்சியான உயர்ந்த மேய்ச்சல் நிலங்களில் தங்கள் மந்தைகளோடு தங்குகிறார்கள். பனிக்காலம் வரும்போது, கதகதப்பாக இருக்கும் தாழ்வான இடங்களுக்கு தங்கள் மந்தைகளைக் கொண்டு வருகிறார்கள்.

கஸக்ஸ்தானில் வாழும் சிலர், வளர்ச்சியடைந்த நகரங்களில் குடியிருக்கிறார்கள். இருந்தாலும், இவர்களுடைய கலாச்சாரங்கள், உணவு வகைகள், கைவினைப் பொருள்கள் எல்லாம் தங்கள் முன்னோர்கள் நாடோடிகளாக வாழ்ந்ததைக் காட்டுகின்றன. கவிதை, பாட்டு, உள்ளூர் இசைக் கருவிகளை வைத்து இசைக்கப்படும் இசை ஆகியவற்றை மக்கள் இன்றும் ரசிக்கிறார்கள்.

யூர்ட் என்பது நாடோடிகளின் பாரம்பரிய வீடு; இதை இடத்துக்கிடம் மாற்றி அமைத்துக்கொள்ளலாம். இந்த யூர்ட் வீடு, இயற்கையோடு ஒன்றிணைந்து வாழும் மனிதனுக்கு அடையாளமாகவும் ஆகிவிட்டது. யூர்ட்டில் இருக்கத்தான் மேய்ப்பர்கள் இப்போதும் விரும்புகிறார்கள். விசேஷ நிகழ்ச்சிகளுக்காக நகரவாசிகள் இதை அடிக்கடி பயன்படுத்துகிறார்கள். இது, சுற்றுலா பயணிகள் தங்குவதற்கும் வசதியாக இருக்கிறது. இந்த வீட்டின் உட்புற வேலைப்பாடு எல்லாரையும் கவருகிறது. ஏனென்றால், எம்பிராய்டரி, நெசவு, கம்பளம் செய்வது போன்றவற்றில் அங்குள்ள பெண்களுக்கு இருக்கும் பலவிதமான திறமைகளை அவை எடுத்துக்காட்டுகின்றன.

கிராமப்புறங்களில் இருக்கும் குடும்பங்களுக்கு, குதிரைகள் என்றால் ரொம்ப பிடிக்கும். கஸக் மொழியில், குதிரை என்பதற்கு குறைந்தபட்சம் 21 வார்த்தைகளாவது பயன்படுத்தப்படுகின்றன; அவை ஒவ்வொன்றுக்கும் ஒவ்வொரு அர்த்தம் இருக்கிறது. அதோடு, குதிரையின் நிறங்களை விவரிக்க, 30-க்கும் அதிகமான வார்த்தைகள் பயன்படுத்தப்படுகின்றன. நல்ல குதிரை ஒன்று, விலை மதிப்புள்ள பரிசாக இருக்கிறது. கிராமங்களில் வாழும் பையன்கள், தங்கள் சிறு வயதிலிருந்தே குதிரை ஓட்டக் கற்றுக்கொள்கிறார்கள்.

இவர்களுடைய பாரம்பரிய உணவில் எப்போதும் இறைச்சி இருக்கும். பொதுவாக, இவர்களுடைய உணவு காரமாக இருக்காது. குமிஸ் மற்றும் ஷூபட் என்ற பானங்கள், இவர்களுக்குப் பிடித்த பானங்கள்! பெண் குதிரையின் பாலிலிருந்து தயாரிக்கப்படும் குமிஸில் உடலுக்குத் தேவையான ஊட்டச்சத்து நிறைய இருக்கிறது. ஒட்டகப் பாலிலிருந்து தயாரிக்கப்படும் ஷூபட் கொஞ்சம் புளிப்பாக இருக்கும்.

அல்மாட்டி என்ற இடத்தில் யெகோவாவின் சாட்சிகளுடைய கிளை அலுவலகம் இருக்கிறது. இதைச் சுற்றி பார்க்க யார் வேண்டுமானாலும் வரலாம்.