போலி நண்பன்

நீங்கள் இளைஞராக இருந்தபோது உங்களுக்கு ஒரு “நண்பன்” கிடைக்கிறான். அவன் உங்களோடு இருப்பதால் மற்ற நண்பர்களும் உங்களை ஏற்றுக்கொள்கிறார்கள். மற்றவர்கள் முன்பு, உங்களைப் ‘பெரிய ஆளாக’ காட்டிக்கொள்வதற்கும் அவன் உதவி செய்கிறான். நீங்கள் ரொம்பச் சோகமாக இருக்கிற சமயங்களில் அவன் உங்களுக்கு, ஒருவிதமான “ஆறுதலை” தருகிறான். சொல்லப்போனால், நிறைய சமயங்களில் நீங்கள் அவனை நம்பிதான் இருக்கிறீர்கள்.

ஆனால், போகப்போக உங்களுக்கு அவனுடைய இன்னொரு முகம் தெரியவருகிறது. அவன் எல்லா சமயங்களிலும் உங்கள் கூடவே இருக்க வேண்டும் என்று சொல்கிறான். அவன் கூட இருந்தால் நான்கு பேர் உங்களை மதிக்க மாட்டார்கள் என்ற சூழ்நிலையிலும், அவன் ‘உங்களை விட்டு போக மாட்டேன்’ என்கிறான். உங்களை ஒரு பெரிய ஆளாக காட்டிக்கொள்ள அவன் உதவியிருந்தாலும், உங்களுடைய ஆரோக்கியத்தை அவன் கெடுத்துப் போட்டிருக்கிறான். எல்லாவற்றுக்கும் மேலாக, உங்களுடைய சம்பளத்திலிருந்து கொஞ்சத்தை அவன் திருடி இருக்கிறான்.

கொஞ்ச நாட்களுக்கு அவனை விட்டு எப்படியாவது விலகி இருக்க வேண்டும் என்று நினைக்கிறீர்கள், ஆனால் அவன் ‘உங்களை விடவே மாட்டேன்’ என்கிறான். சொல்லப்போனால், அவன் உங்கள் தலைமேல் ஏறி உட்கார்ந்துவிட்டான். ‘ஏன்டா அவன சந்திச்சோம்’ என்று நீங்கள் யோசிக்கிற நிலைமைக்கு அவன் உங்களைக் கொண்டுவந்து விடுகிறான்.

சிகரெட் பிடிப்பவருக்கும் சிகரெட்டுக்கும் இடையில் இருக்கிற உறவைப் பற்றித்தான் இந்த வார்த்தைகள் காட்டுகின்றன. 50 வருஷங்களாக சிகரெட் பிடித்துக்கொண்டிருந்த எர்லின் என்ற பெண் இப்படிச் சொல்கிறார்: “யாராவது என் கூட இருந்தாகூட எனக்கு அவ்ளோ சந்தோஷமா இருக்காது; ஆனா, சிகரெட் பிடிக்கும்போது எனக்கு அவ்ளோ நல்லா இருக்கும். என்னை நல்லா புரிஞ்சிக்கிட்ட ஒரு பழைய ஃபிரெண்டு என் கூட இருக்குற மாதிரி இருக்கும். சிலசமயத்துல, அதுமட்டும்தான் ஒரு ஃபிரெண்டு மாதிரி என் கூடவே இருக்கும்.” சிகரெட் என்பது ஆபத்தான, போலியான ஒரு நண்பன் என்பதை போகப்போக எர்லின் புரிந்துகொண்டார். அறிமுகத்தில் நாம் பார்த்த விஷயங்கள் இவருக்கும் பொருந்தும். ஆனால், ஒரு விஷயத்தைத் தவிர! சிகரெட் பிடிப்பது கடவுளுக்குப் பிடிக்காது என்றும், அது உடலைக் கறைபடுத்தும் என்றும் தெரிந்தவுடன் எர்லின் அந்தப் பழக்கத்தை விட்டுவிட்டார்.—2 கொரிந்தியர் 7:1.

ஃபிராங்க் என்ற ஒருவரும் கடவுளுக்குப் பிடித்த மாதிரி நடக்க வேண்டும் என்று நினைக்கிறார். அதனால், சிகரெட் பிடிப்பதை விட்டுவிட வேண்டும் என்று முடிவெடுக்கிறார். அப்படி முடிவு எடுத்து இரண்டு நாட்கள்கூட ஆகவில்லை, ஏற்கெனவே பிடித்துப் போட்ட சிகரெட் துண்டுகள் வீட்டில் எங்கேயாவது இருக்குமா என்று பார்க்க தவழ்ந்து போய் எல்லா இடங்களிலும் தேடி இருக்கிறார். அதைப் பற்றி ஃபிராங்க் இப்படிச் சொல்கிறார்: “பழைய சிகரெட் துண்டு இருக்கானு குப்பைலயெல்லாம் போய் தேடுறோமே, இவ்ளோ கேவலமா நடந்துக்குறோமேனு அப்பதான் மண்டையில உரைச்சது. அதுக்கு அப்பறமா, நான் சிகரெட் பக்கமே போகல.”

சிகரெட் பிடிப்பதை நிறுத்துவது ஏன் இவ்வளவு கஷ்டமாக இருக்கிறது? அதற்குச் சில காரணங்களை ஆராய்ச்சியாளர்கள் சொல்கிறார்கள்: (1) போதைப்பொருள்களைப் போலவே புகையிலைக்கும் நம்மை அடிமையாக்கும் தன்மை இருக்கிறது. (2) நிக்கோடினை சுவாசிக்கும்போது, அது ஏழே நொடிகளில் மூளையைப் போய் சேர்ந்துவிடுகிறது. (3) சாப்பிடும்போதும் குடிக்கும்போதும் பேசிக்கொண்டிருக்கும்போதும் சோகமாக இருக்கும்போதும் என எல்லா சமயங்களிலும் சிகரெட் பிடிப்பதால் அது ஒருவருடைய வாழ்க்கையில் பின்னி பிணைந்து விடுகிறது.

இருந்தாலும், புகைப்பிடிக்கும் பழக்கத்தைக் கண்டிப்பாக நம்மால் விட முடியும். அதைத்தான் எர்லின் மற்றும் ஃபிராங்க் அவர்களின் வாழ்க்கை காட்டுகிறது. புகைப்பிடிக்கும் பழக்கத்தை நீங்கள் நிறுத்த வேண்டும் என்று நினைக்கிறீர்களா? அப்படியென்றால், இதற்கு பின் வருகிற கட்டுரைகளைப் படியுங்கள். ஒரு புது வாழ்க்கையை ஆரம்பிக்க அவை கண்டிப்பாக உங்களுக்கு உதவும்.

தனியாகப் போராடாதீர்கள், உதவியை ஏற்றுக்கொள்ளுங்கள்

“தனியாக இருப்பவனை ஒருவன் சுலபமாக வீழ்த்திவிடலாம். ஆனால், இரண்டு பேராக இருந்தால் அவனை எதிர்த்து நிற்க முடியும்.”—பிரசங்கி 4:12.

தனியாகப் போராடுவதைவிட இன்னொருவருடைய உதவியோடு போராடும்போது எதிரியை ஈஸியாக ஜெயித்துவிடலாம். அந்த எதிரி யாராக இருந்தாலும் சரி, என்னவாக இருந்தாலும் சரி! புகைப்பழக்கம் என்ற எதிரியை ஜெயிக்க நினைக்கிறீர்கள் என்றால் உங்கள் குடும்பத்தில் இருக்கிறவர்களுடைய மற்றும் நண்பர்களுடைய உதவியை ஏற்றுக்கொள்ளுங்கள். அல்லது, உங்களிடம் அக்கறையாகவும் பொறுமையாகவும் நடந்துகொள்கிற ஒருவரின் உதவியை ஏற்றுக்கொள்ளுங்கள்.

ஏற்கெனவே புகைப்பிடிக்கும் பழக்கத்தை விட்டுவிட்ட ஒருவரின் உதவியைக்கூட நீங்கள் ஏற்றுக்கொள்ளலாம். நீங்கள் எப்படியெல்லாம் போராடுகிறீர்கள் என்பதை அவரால் புரிந்துகொள்ள முடியும்; உங்களுக்கு உண்மையிலேயே உதவி செய்யவும் முடியும். டென்மார்க்கில் இருக்கிற டார்பன் என்ற ஒரு கிறிஸ்தவர் இப்படிச் சொல்கிறார்: “மத்தவங்க செஞ்ச உதவிய என்னால மறக்கவே முடியாது. அது எனக்கு உண்மையிலேயே கை கொடுத்துச்சு.” இந்தியாவில் வாழ்கிற ஆபிரஹாம் இப்படி எழுதுகிறார்: “என் குடும்பத்தில் இருக்கிறவர்களும் சபையில் இருந்தவர்களும் காட்டின உண்மையான அன்புதான் புகைப்பழக்கத்தை நிறுத்துவதற்கு எனக்கு உதவியது.” ஆனால், சிலசமயங்களில் குடும்பத்தில் இருப்பவர்களும் நண்பர்களும் செய்கிற உதவி மட்டுமே போதாது.

பகவான்தாஸ் என்ற ஒருவர் என்ன சொல்கிறார் என்று கவனியுங்கள்: “நான் 27 வருஷமா புகைப்பிடிச்சேன். ஆனா, கெட்ட பழக்கங்கள பத்தி பைபிள் என்ன சொல்லுதுனு தெரிஞ்சிக்கிட்டப்போ, புகைப்பிடிக்கிறத விடணும்னு முடிவு பண்னேன். அதனால கம்மியா சிகரெட் பிடிக்க ஆரம்பிச்சேன், கெட்ட நண்பர்கள்கிட்ட பழகுறத நிறுத்துனேன், கவுன்சிலிங்கூட போனேன். ஆனா, எதுவுமே வேலைக்கு ஆகல. கடைசியா யெகோவாகிட்ட, இந்த பழக்கத்தை எப்படியாவது விடுறதுக்கு எனக்கு உதவி செய்யுங்கனு ஒருநாள் ராத்திரி கெஞ்சி கதறுனேன். அதுக்கு அப்புறம்தான் ஒரு வழியா என்னால அத விட முடிஞ்சுது.”

புகைப்பழக்கத்தை நிறுத்துவதில் இன்னொரு முக்கியமான விஷயமும் இருக்கிறது. அது: புகைப்பிடிப்பதை நிறுத்துவதால் வரும் பிரச்சினைகளைப் பற்றி முன்பே யோசித்து அதற்காக தயாராக இருப்பது. அப்படி என்னென்ன பிரச்சினைகள் வரும்? அதைப்பற்றி அடுத்த சில கட்டுரைகளில் பார்ப்போம்.

[பெட்டி]

நீங்கள் சிகிச்சை எடுத்துக்கொள்ள வேண்டுமா?

புகைப்பழக்கத்தை விடுவதற்காகவே நிக்கோடின் பாட்ச் (nicotine patch) மாதிரியான நிறைய மருந்துகளை இப்போது விற்கிறார்கள். அது பலகோடி லாபம் தருகிற தொழிலாக மாறிக்கொண்டு வருகிறது. அந்த மாதிரி மருந்துகளை எடுத்துக்கொள்வதற்கு முன்பு இந்தக் கேள்விகளைப் பற்றி யோசித்துப்பாருங்கள்.

என்ன நன்மைகள் இருக்கின்றன? இதுபோன்ற சிகிச்சை முறைகள், சிகரெட் பழக்கத்தை விடுவதால் வரும் பின்விளைவுகளைக் குறைப்பதாக நம்பப்படுகிறது. இருந்தாலும், இந்தச் சிகிச்சை முறைகளில் அவ்வளவாக பலன் கிடைப்பதில்லை என்ற கருத்தும் மக்கள் மத்தியில் இருக்கிறது.

என்ன ஆபத்துகள் இருக்கின்றன? சில மருந்துகளால் சில பின்விளைவுகள் வரலாம். உதாரணத்துக்கு குமட்டல், மன அழுத்தம், தற்கொலை எண்ணங்கள் போன்ற பின்விளைவுகள் வரலாம். நிக்கோடின் மாற்று மருத்துவ முறைகளில்கூட நிக்கோடினை வேறு வழியில் கொடுப்பதற்குத்தான் முயற்சி செய்வார்கள் என்பதை மனதில் வைத்துக்கொள்ளுங்கள். அப்படிப் பார்த்தால், இந்தச் சிகிச்சை முறைகளை எடுத்துக்கொள்கிற ஒருவர் இன்னமும் நிக்கோடினுக்கு அடிமையாகத்தான் இருப்பார்.

மாற்று வழிகள் என்ன இருக்கின்றன? ஒரு அறிக்கை என்ன சொல்கிறது என்றால், சிகரெட் பழக்கத்தை வெற்றிகரமாக நிறுத்திய 88 சதவீதம் பேர் எந்த மருந்து மாத்திரையின் உதவியும் இல்லாமல் திடீரென்று நிறுத்தியவர்கள்தான்!