படிப்பு 16
நம்பிக்கையும் உற்சாகமும் தரும்படி பேசுவது
யோபு 16:5
சுருக்கம்: பிரச்சினைகளைப் பற்றியே பேசாமல், அவை எப்படிச் சரியாகும் என்பதைப் பற்றிப் பேசுங்கள். கேட்பவர்களுக்கு நம்பிக்கை தரும் விதத்தில் பேசுங்கள்.
எப்படிச் செய்வது?
கேட்பவர்களை நல்ல கண்ணோட்டத்தில் பாருங்கள். யெகோவாவை வணங்குகிற எல்லாருமே அவருக்குப் பிரியமாக நடக்கத்தான் விரும்புகிறார்கள் என்று நம்புங்கள். சிலசமயங்களில் நீங்கள் ஆலோசனை கொடுக்க வேண்டியிருக்கலாம்; ஆனால், அப்படிச் செய்வதற்குமுன் முடிந்தவரை அவர்களை மனதாரப் பாராட்டுங்கள்.
எதிர்மறையான தகவல்களை முடிந்தவரை குறைத்துக்கொள்ளுங்கள். பிரயோஜனமாக இருந்தால் மட்டுமே இப்படிப்பட்ட தகவல்களைப் பயன்படுத்துங்கள். மொத்தத்தில், நீங்கள் பேசுவது நம்பிக்கையும் உற்சாகமும் தரும்படி இருக்க வேண்டும்.
கடவுளுடைய வார்த்தையை அடிக்கடி பயன்படுத்துங்கள். மனிதர்களுக்காக யெகோவா என்ன செய்திருக்கிறார், என்ன செய்துகொண்டிருக்கிறார், என்ன செய்யப்போகிறார் என்பதையெல்லாம் வலியுறுத்துங்கள். கேட்பவர்களுக்கு நம்பிக்கையும் தைரியமும் தரும் விதத்தில் பேசுங்கள்.