¿Tachiri newánali Onorúgame jena gawichí?

1. ¿Chonigá Onorúgame newale ye gawí?

Jeobá newale yé gawí napurigá alué ralómeli ejperélima jena gawichí. Napuʼlige newale Arani ʼlige Eba, bajchá ejperégame ralómeli oká nile, tabilé ejperélima ʼpa rewagachi. Onorúgame ʼwe ʼya newale alué ánjeli apirigá ejperélima ʼpa rewagachi (Job 38:4, 7). Jeobá ajchale bajchá rió alé gawichí ʼwe semátiri, Ereni anilichi (Génesis 2:15-17). Abéchigó najkile napu alué ka ʼlige aʼboi ʼkúchila nabí ʼwe ganíliga ejperélima jena gawichí. Leériwa Salmo 37:29 ʼlige 115:16.

Nobi, alué gawí ʼwe semátiri Ereni anilichi pe uʼchí nile, tabilé suwábaga alué gawí ʼwe semátiri nile. Arani ʼlige Eba weʼká ʼkúchila oʼchéramala napu bochámala gawichí ʼlige kilí kilí neraga weʼlé newame nile alué gawí ʼwe semátiri (Génesis 1:28). Alué gawí nabí nímala napu alué ralómeli ejperélima, tajsiné gajunárigame nímala. Leériwa Salmo 104:5.

Eʼnewa alué video ¿Chonigá Onorúgame newale alué gawí?

2. ¿Chonigá jipe alué gawí tabilé ʼwe semátiri ju?

Napugiti Arani ʼlige Eba tabilé eʼwale Onorúgame, ʼliko Onorúgame buyánale alé Ereni anilichi. Alekeri, alué gawí ʼwe semátiri ʼma weʼkaule ʼlige ta ʼwesi ikiru newá ujchéchigó. Alarigá ju, alué Biblia aní napu alué gawí ʼyárame nile alué ralómeli iníligame (Job 9:24). Leériwa Génesis 3:23,24.

ʼLiko, ¿ʼma guwana wijchime júkó Jeobá napu anílige napu olámala? Tabilé alarigá ju, napugiti alueka abé aʼwágame ju ʼlige nabí neyúrimala (Isaías 45:18). Pe ʼwe, Onorúgame olámala napu alué ralámuli ejperélima napurigá ʼya chojkiná alueka najkile. Leériwa Salmo 37:11, 34.

3. ¿Churigá alué gawí ujchéchigó ʼwe semátiri nímala?

Esúsika, napurigá selígame Onorúgame Gobiérnola, gainámala ʼwe semátiri alué gawí. Napuíka alué ánjeli ʼyuga, suwibámala suwábaga Onorúgame saíla alé boʼné najkome, Armajeroni aniliame. ʼLiko, chaʼpigá ajchámala bilé mili bamí Satanasi, ye ánjeli chátiri napu ʼyégale Arani ʼlige Eba napurigá tabilé eʼwámala. Alué Onorúgame oyérame tabilé suwimela napuʼlige Onorúgame suwibámala alué ralómeli iníligame, napugiti Esusi oʼtomela ʼlige repúmala aʼboi, ʼma nujubapi alé ʼwe semátiri gawichí nabí ejperélima. Leériwa Apocalipsis (Revelación) 20:1-3 ʼlige 21:3, 4.

4. ¿Chiéniko suwibámala alué resí níliame?

¿Chiéniko Onorúgame suwibámala alué tábiri chátiri? Esusi ruwile alué tábiri napu ikimela napuʼlige sébachi aʼlige rawé. Alué tábiri enátiri tabilé suwisaka, ʼla umebámala suwabia ralómeli jena gawichí ejperégame, ʼlige ye beniri napu ramué ejperé nujubá rawé. Leériwa 2 Timoteo 3:1 ʼlige Lucas 21:7-14.

Esusi ʼpa rewagáchika nulámala jena gawichí bilé mili bamí, ʼlige suwibámala alué tábiri chátiri api resí nilia olá (Isaías 9:6, 7; 11:9). Esúsika abéchigó bujemio pecado alué ralómeli napu najkí Onorúgame. Onorúgame alué guʼiri Esusi ʼyuga bujémala alué naulítiri ʼlige suwiyame ʼlige alué ralómeli tabilé oʼchérame gainámala. Leériwa Isaías 33:24 ʼlige 1 Corintios 15:26.

5. ¿Ichka ejperélima alé ʼwe semátiri gawichí?

Alué ralómeli eʼwame Onorúgame ejperélima alé ʼwe semátiri gawichí (1 Juan 2:17). Esusi nulale aʼboi oyérame ʼyámime aʼlá ralómeli napu beniri napurigá eʼwawa Onorúgame. Jipe, Jeobá weʼká milloni ralómeli guʼíriga ajtí napurigá ejperélima alé ʼwe semátiri gawichí (Sofonías 2:3). Alué ralómeli api simí Galí alé napu napuíme ju alué testigos Jeobá, napu rejimala niraga mochí Onorúgame, bení napurigá abé aʼlá gunala ʼlige oʼnola nímala, guʼiri alué ʼwe aʼlá raʼíchali ʼyuga Bíbliachi uchúkame. Leériwa Apocalipsis 15:4.