¿Neruga arepa apirigá buwémala alué suwígame?

1. ¿Tachiri buwega alué suwígame?

Napuʼlige Esusi bejtele jena gawichí, boʼné amígola Lasro aniliame mukule. Alué Lasro Betania anelichi bejtégame pe aʼbé nile alé Rusaleni. Napuʼlige Esusi sébale, Lasro ʼmáchigo naó rawé nílige mukusá. Alué mukúgame rejimala, Marta ʼlige María napuíka Esusi alé resochí sébale alé ewachi napu boʼílige alué Lasro, ayó weʼká napuíle ralómeli. ¿Chu nílilale Marta ʼlige María etega napuʼlige Lasro ku ajánale boʼné Esusi ʼsile achá aʼlige ku ajínale? Leériwa Juan 11:21-24, 38-44.

Ramué ʼla buwé alué ralómeli ʼma mukule ku ajánamala, ye ʼwe aʼlá raʼíchali beniri alué Biblia. Marta ʼma machile api Jeobá anile ku ajánamala alué ralómeli suwígame napu ujchéchigó ejperémala jena gawichí. Leériwa Job 14:14, 15.

2. ¿Churigá mochí alué suwígame?

Alué ralómeli “eʼwé niru” (1 Corintios 15:47). Ramué saʼpá ʼlige oʼchí ju, ʼlige tabilé iníligo ramué pachá bilé alawala napu tabilé mukumea, tabilé ajágame ju alawala ramué mukusá. Napuʼlige alué cerebro ʼma mukú, ʼma tabilé ʼnata, alué suwígame tabilé nílimala nibilé resí nílimala, alekeri Lasro ʼma ku ajánale tabilé tábiri anile. Leériwa Eclesiastés 9:5, 6, 10.

Jaré ralómeli bijchígame ju nerú bilé injiérnochi, bijchígame ju apirigá Onorúgame ʼwe gastigárimala alué ralómeli napuʼlige ʼma mukusá, nobi ye tabilé bijchiá ju. Ramué ka ʼma benirú alué suwígame ʼma tabilé tábiri machí, napu aní ralómeli injiérnochi ʼyégali ju, ʼlige Jeobá sewékame ju ramué tabilé ʼla raʼíchali ko ramué. Jeobá ʼwe galeme ju ʼlige tajsiné resí nokinali eʼkósiga alué ralómeli. Leériwa Jeremías 7:31.

Eʼnewa alué video ¿Chu ikí napuʼlige mukusá?

3. ¿Ramué ikiru raʼicha alué suwígame ʼyuga?

Alué suwígame tabilé ikiru raʼicha nibilé gepú (Salmo 115:17), nobi nerú jaré ánjeli ʼwe chati ju, ye ikiru raʼicha alué ralómeli ʼyuga ʼlige alué olá alué ralómeli ʼnata raʼicha suwígame ʼyuga (2 Pedro 2:4, TNM). Alekeri, Onorúgame ʼwe kijchí napuʼlige ramué raʼichánali alué suwígame ʼyuga. Leériwa Deuteronomio 18:10, 11.

4. ¿Ichka ku ajánamala?

Milloni ralómeli ʼma mukule ku ajánamala napu ejperémala ujchéchigó jena gawichí. Abéchigó ku ajánamala jaré ralómeli tabilé machile Onorúgame ʼlige cha nokame nile. Leériwa Hechos 24:15.

Alué ralómeli ku ajánimala aʼlige benimela aʼlá bijchiá Onorúgame, alué ralómeli najkí apirigá ʼla bijchígimala Esusi ʼlige eʼwámala (Revelación 20:11-13, TNM). ʼLa alué olásaká ye tábiri, aʼlá nabí ʼla ganíliga ejperélimala jena gawichí. Leériwa Juan 5:28, 29, TNM.

5. ¿Tachiri beniri Jeobá ramué alué ku ajánilime alué suwígame?

Alué suwígame ku ajánamala, ramué beniwá Onorúgame ʼwe galeme ramué ʼlige naʼtemame ju ramué. Alekeri, Jeobá júlale boʼné ranala mukumea ramué gite, apirigá ramué ʼla nabí ejperéliwa. ʼLige mué, ¿ichka ku eténili mué napuʼlige alué suwígame ku ajánamala? Leériwa Juan 3:16, TNM ʼlige Romanos 6:23, TNM.