¿Tachiri ju alué Onorúgame Gobiérnola?

1. ¿Tachiri ju alué Onorúgame Gobiérnola?

Bilé gobierno ʼpa rewagachi ajtígame ju, pe ʼwe suwibámala suwábaga gobiernos jena gawichí mochígame ʼlige ajchámala boʼné Gobiérnola, ye olámala napu Onorúgame najkí jena gawichí ʼlige ʼpa rewagachi. Ralómeli resíʼlá Onorúgame Gobiérnola, ye napuímala suwábaga ralómeli bochígimi gawichí ejperégame. ¿ʼWe aʼlá raʼíchali kantu? Leériwa Lucas 4:43; 1:33, ʼlige 11:2.

Suwábaga gobierno resíʼlá bilé selígame, alekeri, Onorúgame Jeobá chaʼpile boʼné Inolá Esukristo, napurigá selígame nímala Onorúgame Gobiérnola. Leériwa Apocalipsis (Revelación) 11:15.

Eʼnewa alué video ¿Tachiri ju alué Onorúgame Gobiérnola?

2. ¿Chonigá Esusi abé aʼlá selígame ju?

Onorúgame Inolá abé aʼlá selígame ju, napugiti ʼwe aʼlá nejkúrame ju ramué ʼlige nabí ʼwe aʼlá sébali olame ju (Juan 1:14). Abiena, aʼwágame ju ʼlige boʼné aʼwalílate guʼírimia alué ralómeli napuʼlige nulámala jena gawichí rewagachi asigá. Napuʼlige Esusi ku ajánale simile rewagachi ʼlige buwele wajtoná napu ajtí Onorúgame napusí narémala lisensia napu nulámala. Aʼkinana, Onorúgame ʼma nejile Esusi alué aʼwalí apirigá nulá. Leériwa Hebreos 10:12, 13.

3. ¿Ujché jaré ralómeli nulámala Esusi ʼyuga?

Alué Biblia aní jaré Onorúgame oyérame nulámala Esusi ʼyuga. Alué Biblia aní alé Daniel 7:27 napu santos aniliame ju. Alué Esusi apóstoli bajchá chaʼpirúgame nile apirigá santos nímala. Abiena, Jeobá chaʼpigá mochí riótiri ʼlige umugí bijchígime jipe rawé apirigá santos nímala. Napuʼlige ʼma suwisá ye ralómeli, abalieri napurigá Esusi simámala rewagachi ʼlige tabilé etewa, ajagá mochí rewagachi. Leériwa Juan 14:1-3 ʼlige 1 Corintios 15:42.

¿Chekí simámala ʼpa rewagachi? Alué Biblia aní “pe uʼkabi ju” (Lucas 12:32, TNM). Alué ralómeli napu nulámala jena gawichí Esusi ʼyuga, 144.000 ju. Leériwa Apocalipsis 14:1.

4. Napuʼlige Esusi chojkíwale nulá, ¿chu ikile?

Napuʼlige Esusi chojkíwale nulá 1914 bamí nílige, bajchá alué Remónisi págana rewagachi júlale abienachigó alué ánjeli chátiri nóchame, gawichí luʼle.a ʼWe ayoga, alué Remónisi weʼká tábiri chátiri olagá eʼyena bochígimi gawichí (Apocalipsis 12:7-10, 12). Alekeri, jipe ka alué tábiri chátiri jena gawichí abé chátiri ju. Alué aʼwágame noká ichúrimi gawichí, najkome, naulítiri ʼlige eluíka, ekísimi ʼla sébali napu ʼwe ʼya anile alué Biblia ʼlige beniri Onorúgame Gobiérnola pe ʼwe nulámala bochígimi gawichí. Leériwa Lucas 21:7, 10, 11, 31, TNM.

5. ¿Chu ʼsia ajtí Onorúgame Gobiérnola jipe, ʼlige tachiri olámala pe aʼminana?

Alué Onorúgame Gobiérnola napabuga ajtí weʼká ralómeli jena bochígimi gawichí, napuʼlige beniria Onorúgame raʼichálila. Milloni aʼká ralómeli, riótiri ʼlige umugí ʼma Esusi oyérame ʼlige eʼwame ju. Alué oyérame neyúrigame nímala napuʼlige Onorúgame Gobiérnola suwibámala alué ralómeli iníligame. ʼLa ramué narenálisaká alué aʼlá tábiri Onorúgame nejímala, eʼwámili ju Esusi. Leériwa Revelación 7:9, 14, 16, 17, TNM.

Esusi gobiérnola bilé mili bamí inílimala apirigá ku ʼla newámala ye gawí napurigá ʼya chojkichí Onorúgame newale. Alué gawí ʼwe semátiri nímala. Napuʼlige suwibasa alué bilé mili bamí, Esusi ku nejímala alué nóchali Jeobá (1 Corintios 15:24-26). ¿Mué ruyénali ujché jaré ralómeli Onorúgame Gobiérnola? Leériwa 2 Pedro 3:13.