LECCIONI 31
¿Tachiri ju alué Onorúgame Gobiérnola?
Alué raʼíchali abé najtékame alé Biblia uchúkame beniria napu ju alué Onorúgame Gobiérnola. Ye Gobiérnola, Jeobá netémala napu boʼné najkí siné bajchá. ¿Tachiri ju alué Onorúgame Gobiérnola? ¿Churigá machirú ʼya ʼma nulaga? ¿Tachiri neté jipe si? ¿ʼLige tachiri netémala pe aʼminana? Ye rukélime nejémala ye jena leccioni aminami ujchechi bilena okaná.
1. ¿Tachiri ju alué Onorúgame Gobiérnola, ʼlige chieri ju alué Selígame?
Onorúgame ilile alué Onorúgame Gobiérnola. Alué Selígame ju Esukristo nulame ju ʼpaka rewagachi (Mateo 4:17; Juan 18:36). Raʼíchiga napu ju Esusi, alué Biblia aní: «Nuleme nímala [...] nabí rawé» (Lucas 1:32, 33). Napu ju boʼné Selígame Onorúgame Gobiérnola, nulámala suwábaga ralámuli ejperégame bochígimi gawichí.
2. ¿Chieri nulámala Esusi si?
Esusi tabilé nulame ju biʼneli. «Ralámuli seʼwinátiri raʼíchame ke jaré, ʼlige rekó uché raʼíchame ke jaré [...] nulame niwa» (Apocalipsis 5:9, 10). ¿Chekí nulámala Kristo si? Napu boʼné asale jena Wijchimoba, milloni ralámuli ʼma gayénale kristiano. Pe 144.000 simámala ʼpa rewagachi api nulámala Esusi si (leériwa Apocalipsis 14:1-4). Suwábaga ujché jaré kristiano bejtémala jena Wijchimoba (Salmo 37:29).
3. ¿Chonigá alué Onorúgame Gobiérnola abé aʼlá ju ujché jaré gobiérnola napu nulá ralámuli?
Rekó nerú nulame napu guʼírnale ujché jaré, tabilé umeba netémala suwábaga napu aʼboi najkí. Pe aʼkinana ujché jaré nulame kérémá tabilé guʼírnale alué ralámuli. ʼLige alué Esusi, alué Selígame Onorúgame Gobiérnola ta ʼwesi bujémala boʼné. Onorúgame ujchámala «bilé Gobiérnola, ye tajsiné suwibámala» (Daniel 2:44). Esusi nulámala bochígimi Gawichí ʼlige suwábaga ralámuli ʼla ʼwe aʼlá nirame ju. Alué ʼwe aʼlá galeme ju, aminami ʼwe aʼlá netémala, abiena benírima ujché jaré ralámuli apirigá nímala aʼchigóriga boʼné: ʼwe aʼlá galeme aminami ʼwe aʼlá nímala ujché jaré si (leériwa Isaías 11:9).
ABÉ BENIBOA
Eʼnewa chonigá alué Onorúgame Gobiérnola abé aʼlá ju ujché jaré gobiérnola napu nulá ralámuli.
4. Alué Gobiérnola napu aʼwágame ju nulámala bochígimi Gawichí
Esukristo inígame ju aʼwalí ʼlige abé aʼlá umeba ʼwe aʼlá nulá meʼtigá ujché jaré nulame. Leériwa Mateo 28:18 ʼlige raʼichawa ye:
¿Chonigá napu Esusi nulá abé aʼlá ju ujché jaré ralámuli napu nulame ju?
Napu ju alué ralámuli nulame ju bilena chojkena Wijchimóbachi ʼlige apiépiri rawé bujériame ju. ¿Alieri ikimela alué Onorúgame Gobiérnola? Leériwa Daniel 7:14 ʼlige raʼichawa ye:
¿Chonigá ʼwe aʼlá ju napu alué Onorúgame Gobiérnola tajsiné suwibámala?
¿Chonigá ʼwe aʼlá ju napu nulámala bochígimi Gawichí?
5. Alué selígame napu nerú jena Wijchimoba bujémili
¿Chonigá resí ʼla mochirú alué Onorúgame Gobiérnola bujémala suwábaga selígame? Eʼnewa alué VIDEO ʼlige raʼichawa ye:
¿Tachiri tábiri ʼwe chátiri nokale alué selígame napu nerú jena Wijchimoba?
Leériwa Eclesiastés 8:9 ʼlige raʼichawa ye:
¿Mué mayé alué Onorúgame Gobiérnola bujémili suwábaga selígame napu nerú jena Wijchimoba? ¿Chonigá?
6. Alué selígame alué Onorúgame Gobiérnola ʼwe aʼlá námala ramué
Napurigá ramué Selígame, Esusi, ralámuli nile napu bejtele jena Wijchimoba, alekeri «alueka asíriga ʼla námame ju chonigá tabilé ʼla sébali oliame ko ramué» (Hebreos 4:15). Jeobá ʼla chaʼpile 144.000 rió ʼlige umugítiri ʼwe eʼwame nile apirigá nulámala Esusi si. Ye ralámuli «seʼwinátiri raʼíchame ke jaré, ʼlige rekó uché raʼíchame ke jaré» (Apocalipsis 5:9).
¿Oilari mué naʼtasa napu Esusi ʼlige suwábaga selígame napu nulámala boʼné ʼwe aʼlá machí churigá ju ejperé jena Wijchimoba? ¿Chonigá?
Jeobá chaʼpile rió ʼlige umugítiri ochérale nile tabilé alieri bamí ʼlige seʼwináriga ajtígame weʼkaná kachi apirigá nulámala Esusi si.
7. Alué nulalí Onorúgame Gobiérnola meʼtigá nulalí ralámuli neteme
Alué selígame neteme ju nulalí apirigá guʼírimala ʼlige repúmala alué ralámuli. Alué Onorúgame Gobiérnola abiena nígame nulalí, ʼlige alué ralámuli eʼwámili. Leériwa 1 Corintios 6:9-11 ʼlige raʼichawa ye:
¿Churigá nímala napuʼlige suwábaga ralámuli jena Wijchimoba eʼwámala suwábaga napu Onorúgame nulá?a
¿Aʼlá ju napu Jeobá najkí api suwábaga ralámuli napu nirárime boʼné Gobiérnola eʼwámala suwábaga napu boʼné nulá? ¿Chonigá mué alarigá aní?
¿Churigá ramué machí napu alué ralámuli napu jipe tabilé eʼwame ye nulalí umeba gainámala? (Eʼnewa alué bersíkulo 11).
Alué selígame neteme ju nulalí apirigá guʼírimala ʼlige repúmala alué ralámuli. Alué Onorúgame Gobiérnola nígame nulalí meʼtigá nulalí neteme ralámuli, abiena repúmala ʼlige guʼírimala napu nirárime boʼné Gobiérnola.
JARÉ RALÁMULI ANÍ: «Alué Onorúgame Gobiérnola ju pachágana sulachí».
¿Tachiri animela mué?
ABÉ NAJTÉKAME
Alué Onorúgame Gobiérnola ʼla bijchiá ju ʼpa rewagachi ajtígame ʼlige nulámala jena Wijchimoba.
Api mué ʼma benile
¿Chieri ju alué selígame Onorúgame Gobiérnola?
¿Chonigá alué Onorúgame Gobiérnola abé aʼlá ju ujché jaré gobiérnola napu nulá ralámuli?
¿Tachiri najkí Onorúgame napu neteme ju napu nirárime boʼné Gobiérnola?
UCHÉ RAJPÉ ʼYÁAWA
Leériwa api Esusi benírile koche asimela alué Gobiérnola.
«¿Alué Onorúgame Gobiérnola bilé ju ajtígame pachágana sulachí?» (Artículo de jw.org)
¿Chonigá alué testigo Jeobá eʼwame ju bajchá napu ju Onorúgame Gobiérnola meʼtigá alué ralámuli gobiérnola?
Beniboa napu alué Biblia aní alué 144.000 ralámuli napu Jeobá chaʼpile apirigá nulámala Esusi si.
¿Tachiri guʼírile bilé mukí napu bajcháriga asale apirigá námala pe boʼné biʼneli Onorúgame bujémala napu ju alué ʼwe chátiri?
«Benile ne napu churigá suwámala napu ju alué ʼwe chátiri» (¡Despertad!, noviembre de 2011)
a Alé seccioni 3 ruyémala jaré nulalí.