LECCIONI 30
¡ʼEmi rejimala umebámala ku ajánamala!
Napu ju alué mukúgame ʼwe sewékame ju, aminami ʼwe okóliame ju. Alekeri alué Biblia aní alué mukúriame ju bilé saíla (1 Corintios 15:26). Mué benile alé leccioni 27, Jeobá suwábamala ye saíla. Nobi ¿chu ikimela alué ralámuli ʼma mukule? Ye leccioni, mué benimela uchechi bilé tábiri ʼwe semátiri Jeobá aní napu boʼné netémala: boʼné ku ajánamala weʼká milloni ralámuli apirigá nabí ejperélimala. ¡Ku ajánamala! ¿Aʼlá bijchiá alarigá nímala? ¿Ajánamala jena Wijchimoba o reʼpá rewagachi?
1. ¿Tachiri neténale Jeobá napu ramué rejimala gite napu ʼma mukule?
Jeobá ʼwe najkí apirigá ku ajánamala alué ʼma mukúgame. Bilé rió Jobi anilime, asíriga nígame nile alué fe, boʼné ʼwe ʼla machime nile Onorúgame tabilé weʼkámala napu ju boʼné napu boʼné ʼma mukusá ʼlige napu asá «gaposántochi». Anele Onorúgame: «Mué bayémala ʼlige ne boʼné nejémala mué» (leériwa Job 14:13-15).
2. ¿Churigá machiboa napu alué mukúgame aʼlá ku ajánamala?
Napu Esusi asale jena Wijchimoba, Onorúgame ʼyale alué aʼwalí apirigá ku mochísimala alué mukúgame. Alekeri Esusi ku ajánale alué tewé 12 bamígame ʼlige alué ranala bilé mukí gunámakame (Marcos 5:41, 42; Lucas 7:12-15). Abé aʼkinana Lasro, bilé amígola Esusi mukule. ʼLige, rekó naó rawé simírale napu mukusá, Esusi ku ajánale. Napu ʼma raʼichasa Onorúgame si, pe sinátale eʼnegá alé koche boʼile Lasro: «¡Mué Lasro, yati maʼchina!». ʼLige «ʼma maʼchínale alué napu mukúlige», ¡ʼlige ajágame ajtile! (Juan 11:43, 44). ¿Mué mayé chiena ʼwe raʼsálagá mochile napu ju alué rejimala ʼlige alué Lasro amígola?
3. ¿Aʼlá ku ajánamala ʼeme rejimala ʼma mukúgame?
Alué Biblia aní «ku ajánimio alué ralámuli suwígame» (Hechos 24:15). Alué ralámuli napu Esusi ku ajánale tabilé simígame nile ʼpa rewagachi (Juan 3:13). Suwábaga ye ralámuli ʼwe raʼsálagá mochile ujché siné bejtega jena Wijchimoba. Napu simírale ʼya, pe ʼwe Esusi ku ajánamala weʼká milloni ralámuli apirigá ʼwe raʼsálagá nabí bejtémala jena Wijchimoba ʼwe semátiri gainárime. Boʼné anile api «suwábaga suwígame alé gaposántochi o tumba conmemorativa»—yeka ju, napu Jeobá ʼnátame ju alué—ku mochísimala, abiena alué suwígame ta ʼwesi ʼnátame (Juan 5:28, 29, jena aní).
ABÉ BENIBOA
Eʼnewa napu aní alué Biblia napu ju alué mukúgame ku ajáname ʼlige chonigá aʼlá gainámala ye. Abiena eʼnewa churigá oilárime napu ʼwe sewékame mochiru alué buwélame napu ju alué mukúgame ku ajáname.
4. Esusi etériame nile aʼlá ku asísimala ju alué mukúgame
Tachiri ujché rajpé Esusi netele apirigá guʼírimala boʼné amígola Lasro. Leériwa Juan 11:14 ʼlige 38-44, ʼlige raʼichawa ye:
¿Churigá machiboa Lasro aʼlá bijchiá mukúgame nile? (Eʼnewa alué bersíkulo 39).
Aʼlá bijchiá nísaká alué Lasro simísaká ʼpa rewagachi, ¿mué mayé Esusi guʼírame ujché siné apá jena Wijchimoba?
5. ¡Weʼká ralámuli ku ajánamala!
Leériwa Salmo 37:29 ʼlige raʼichawa ye:
¿Koche bejtémala napu ju alué weʼká milloni napu ku asísimala?
Esusi ku ajánamala napu ju Jeobá najátame nile ʼlige abiena ajánamala napu ju weʼká ujché jaré tabilé najátame nile. Leériwa Hechos 24:15 ʼlige raʼichawa ye:
Napu sébachi alué ku ajáname, ¿chieri eténale mué?
Naʼtawa ye: apirigá bilé oʼnola churigá busureme boʼné inolá, abalieri napu ju Esusi tabilé nóchame nile ajánamala alué ralámuli.
6. Napu ju alué ajáname oilárime napu ramué sewékame mochígachi aminami nejí bilé buwélame
Alué raʼíchali alé Biblia raʼíchame ju napu ju Jairo malala guʼírame ʼlige oilárime weʼká ralámuli napu seʼwékame mochí napugiti mukule bilé rejimala. Leériwa napu simírale alé Lucas 8:40-42 ʼlige 49-56.
Taʼchó ku ajánale boʼné malala, Esusi anele Jairo: «Tase majawa mué rió […], pe ʼla bijchígiwa» (eʼnewa alué bersíkulo 50). ¿Churigá guʼírimala mué napu ju alué buwélame napu ku ajánamala alué mukúgame...
... napu mukusá bilé rejimala?
... napu naʼtálime nisa ʼma mukumela?
Eʼnewa alué VIDEO ʼlige raʼichawa ye:
¿Churigá guʼírile aminami oilárile alué oʼnola Phelicity rewégame alué buwélame alué mukúgame ku mochímala?
JARÉ RALÁMULI ANÍ: «Taʼmé bijchigi ne napu ju alué mukúgame ku bejtémala alé Wijchimóbachi».
¿Tachiri ʼnata mué?
¿Tachiri texto bíbliko unémala mué apirigá benírimala napu alué mukúgame ku bejtémala jena Wijchimoba?
ABÉ NAJTÉKAME
Alué Biblia aní napu weʼká milloni ralámuli ku ajánamala. Jeobá najkí napu ku asísimala alué ralamuli, alekeri ʼyale Esusi aʼwalí.
Api mué ʼma benile
¿Churigá ramué machiaru Jeobá ʼlige Esusi najki apirigá ku bejtémala alué mukúgame?
¿Koche bejtémala alué mili milloni ralámuli napu ku ajánamala: jena Wijchimoba o ʼpa rewagachi? ¿Chonigá ʼnata mué alarigá?
¿Chonigá aʼlá bijchiá mayé mué napu ku bejtémala boʼné rejimala ʼlige amígola napu ma mukúgame?
UCHÉ RAJPÉ ʼYÁAWA
Leériwa ʼwe aʼlá rejcholi napurigá nejkúrimala tabilé seweka asimela.
«Guʼírame napu ʼwe sewékame mochime» (¡Despertad!, núm. 3 2018)
¿Guʼiri alué Biblia bilé ralámuli ʼwe sewékame ajtígame?
Eʼnewa churigá guʼíriwa bilé towí napu mukule bilé rejimala.
¿Asísimala bilé ralámuli ʼpa rewagachi? ¿Nerúmala bilé tabilé ku ajánamala?