¿Tachiri guʼírimala alué newíkame ʼlige ʼkúchila apirigá ʼwe ganíliga ejperélima?

1. ¿Chonigá ʼwe najtékame ju newímala napurigá nulá alué gobierno?

Alué ʼwe aʼlá raʼíchali Onorúgame nila ju. Onorúgame ganílime ju, ʼlige Onorúgame najkí apirigá oʼnola ʼlige eyela ʼlige ʼkúchila ʼwe ganíliga ejperélimala (1 Timoteo 1:11, TNM). Onorúgame newírale alué rió ʼlige alué mukí napu bajchá ejperégame nile jena gawichí. Napuʼlige rió ʼlige mukí newísaká napurigá nulá alué gobierno, guʼiri alué ʼkúchigame ju apirigá ʼwe aʼlá neseri aʼboi ʼkúchila ʼlige apirigá ʼwe ganíliga ejperélima. Alué Esusi oyérame eʼwámili júkuru napu nulá gobierno ʼlige ʼla iniga mochíure bilé apeli napu aní ʼla newíkame ju. Leériwa Lucas 2:1, 4, 5.

¿Tachiri ʼnata Onorúgame alué newíkame? Onorúgame aní api newíkame nabí napuíka mochímili ju. Alué najkí api alué newíkame tabilé aʼré boʼné gunala o boʼné upila (Hebreos 13:4). Jeobá ʼwe kijchí ku rojanalia (Malaquías 2:16). Onorúgame aní bilé rió rewisá boʼné upila seʼnú rió ʼyuga gojchichi, ʼliko ʼla ju aʼrelia alué mukí, ʼliko ʼla ju ujché bilé mukí ʼyuga newilia, aʼchigóriga bilé mukí rewisá boʼné gunala seʼnú mukí ʼyuga gojchichi, ʼliko ʼla ju aʼrelia alué rió, ʼliko ʼla ju ujché bilé rió ʼyuga newilia. Leériwa Mateo 19:3-6, 9.

2. ¿Churigá alué newíkame nímili ju?

Jeobá newale rió ʼlige mukí apirigá newísaká aʼnagupi guʼírimala (Génesis 2:18). Alué gunala ʼla tebúmala ju upila ʼlige ʼkúchila, alekeri ʼwe iwériga nochámili júkuru apirigá nejí goʼame ʼlige beniri Onorúgame boʼné rejimala. Abéchigó, Onorúgame najkí napurigá mué galema mué upila, aʼrémala ju mué napu mué galé mué upila tabilé galésaká. Alué newíkame aʼnagupi galémili ju ʼlige nirámili ju. Ta ʼwesi newíkame tabilé ʼla sébali olame ju, alekeri benímili ju eʼkawia aʼnagupi apirigá ʼwe ganíliga ejperélima. Leériwa Efesios 4:31, 32; 5:22-25, 33, ʼlige 1 Pedro 3:7, TNM.

3. Alué newíkame tabilé ganílime nísaká, ¿ku rojámili ju?

ʼLa newíkame naʼáusaká, ʼwe iwériga nochabo okaka apirigá ʼwe najkigá mochiwa (1 Corintios 13:4, 5). Onorúgame nila raʼíchali tabilé beniri alué newíkame rojámala apirigá suwimela aʼboi naʼáwili. Leériwa 1 Corintios 7:10-13, TNM.

4. ¿Tachiri najkí Onorúgame apirigá alué ʼkúchila?

Jeobá najkí api alué ʼkúchila ʼwe ganíliga nímala. Alekeri beniri churigá umeba ʼla ganíliga ejperélima alué ejtemali. Abéchigó najkí api alué ʼkúchila benimela napu oʼnola ʼlige eyela ʼma machí, napugiti alué abé machime ju ʼlige ʼma ejperele abé weʼká bamí (Colosenses 3:20, TNM). Abéchigó najkí apirigá ʼwe ganíliga ejperéliwa ʼla eʼwawa Onorúgame ʼlige boʼné Inolá Esusi. Leériwa Lucas 18:15-17 ʼlige Mateo 21:15, 16.

5. ¿Churigá umeba guʼiria ʼkúchila alué oʼnola ʼlige eyela napu ganíliga ejperélima?

Alué ʼkúchigame ju ʼwe iwériga nochabo apirigá ʼyámala aʼboi ʼkúchila goʼame, galí ʼlige oʼpacha (1 Timoteo 5:8). Abéchigó, ujché jaré tábiri nokimeli ju, benírimili ju napurigá ʼwe galémala Onorúgame, aʼchigóriga nokimea napurigá Onorúgame (Efesios 6:4, TNM). Napuʼlige alué ʼkúchigame ju ʼwe galé Onorúgame, aʼboi ʼkúchila eté ʼlige beniwá ʼlige abienachigó galé Onorúgame. Napuʼlige beniri aʼboi ʼkúchila Onorúgame raʼichálite guʼiri apirigá ʼwe ʼla ʼnátame nímala. Alué Biblia aní: “Aʼlá rejcholi ʼyawa alué towí jipe mochígame ʼlige ʼma oʼchérame ka, tabilé aʼrémala alué rejcholi” (Proverbios 22:6). Leériwa 2 Timoteo 3:15.

Alué ʼkúchila resíʼlá ʼwe semáriga raʼichawa ʼlige oiláriwa napuʼlige ʼwe aʼlá nokachi. Iʼsínimi resíʼlá rejcholi ruyewa napuʼlige tabilé aʼlá ʼnátachi, napurigá ku ʼla naʼtámala, ʼlige tabilé cha ikimela (Proverbios 22:15). Nobi, tajsiné ená anigá ruyewa, napurigá ʼla tase sewémala. Leériwa Colosenses 3:21.

Alué testigos Jeobá osale jaré líburus apirigá api ʼkúchigame ju ʼla umebámala beniria aʼboi ʼkúchila. Suwábaga ye líburus beniri napu aní alué Biblia. Leériwa 2 Timoteo 3:16.