LECCIONI 16
¿Chu ʼsile Esusi jena ajtígachi Wijchimoba?
Alué ralámuli nabí naʼtasa napu ju alué Esusi, naʼtame ju bilé ta ranala, bilé rió machime o bilé rió amulí mukume. Nobi ¿mué mayé abé beniboa chu ʼsile Esusi jena ajtígachi Wijchimoba ramué abé aʼlá machiboa boʼné? Ye leccioni, beniboa ujché rajpé tábiri ʼwe najtékame napu ʼsile Esusi ʼlige churigá guʼiro mué.
1. ¿Tachiri nígame nile bilé nóchali ʼwe najtékame Esusi?
Alué nóchali ʼwe najtékame Esusi nile benírile «aʼlala rejcholi Onorúgame nila» alué ralámuli (Leériwa Lucas 4:43.) Predikárile ʼwe aʼlá raʼíchali napu Onorúgame ajchámala boʼné Gobiérnola apirigá bujémala alué tábiri chátiri nerú jena Wijchimoba.a Esusi baikiá bamí nasipa eʼyénale beniria ralámuli ʼwe aʼlá raʼíchali (Mateo 9:35).
2. ¿Churigá guʼírile alué milagro napu Esusi ʼsile?
Alué Biblia raʼíchame ju «weʼká eʼkarúgame ʼwe semátiri ʼsile napu tabilé gayéname ju ralámuli alarigá noká. ʼÉmika ʼla etele alarigá ʼsichi. Alekeri ʼwe ʼla machí ʼemi Onorúgame nuléligo alué Esusi» (Hechos 2:22) Onorúgame ʼyale alué aʼwalí Esusi, apirigá bilé waʼlú uʼkú tabilé ená ʼsile, ʼlige goʼame ʼyale weʼká mili ralámuli, saʼwale nayume ʼlige abiena ku ajánale jaré ʼma mukúgame. (Mateo 8:23-27; 14:15-21; Marcos 6:56; Lucas 7:11-17) Alúe weʼká milagro napu ʼsile Esusi beníriame ju napu júlame nile Onorúgame. Abiena beníriame ju Jeobá nígame ju waʼlú aʼwalí apirigá bujémala weʼká tábirí chátiri.
3. ¿Tachiri ramué beniri napurigá Esusi bejtele?
Esusi ʼwe aʼlá eʼwame nile Jeobá. (Leériwa Juan 8:29.) Esusi newale napu ju boʼné Oʼnola táname. Netele ye suwábaga nabí rawé jena gawichí asale, rekó weʼká ralámuli tabilé najkile. Beníriame nile ramué aʼlá najátawa Onorúgame rekó mochí reʼsiru. Alarigá, Esusi «napurigá anáchale» boʼné oyérame «ʼla anachawa resí nili» (1 Pedro 2:21, TNM).
ABÉ BENIBOA
Eʼnewa churigá raʼíchame nile Esusi alué ʼwe aʼlá raʼíchali ʼlige churigá weʼká milagro ʼsile.
4. Esusi raʼíchale ʼwe aʼlá raʼíchali
Esusi eʼyénale weʼká kilómetro alé bowechi ʼwe wemókachi oʼtome nile ʼwe aʼlá raʼíchali weʼká ralámuli. Leériwa Lucas 8:1, ʼlige raʼichawa ye:
¿Esusi buwele bilena alué ralámuli apirigá raʼicha alué ʼwe aʼlá raʼíchali?
¿Tachiri ʼwe nóchali Esusi ʼsile apirigá rewimela alué ralámuli?
Onorúgame ʼma siné anile alué Kristo raʼichámala ʼwe aʼlá raʼíchali. Leériwa Isaías 61:1, 2, ʼlige raʼichawa ye:
¿Churigá netele Esusi napu ʼya osale?
¿Mueka ʼla bijchigi jipe rawé alué ralámuli najkí akériame alué ʼwe alá raʼíchali?
5. Esusi benírile tábiri ʼwe najtékame
Esusi predikárile alué ʼwe aʼlá raʼíchali, abiena benírile tábiri ʼwe najtékame. Eʼnewa ujché jaré tábiri napuʼlige Esusi nawésiga alué reʼpá rabó. Leériwa Mateo 6:14, 34 ʼlige 7:12, ʼlige raʼichawa ye:
¿Tachiri rejcholi ʼwe aʼlá nejile Esusi ye bersículo?
¿Mué ʼnata ye rejcholi guʼiro alué ralámuli jipe?
6. Esusi netele weʼká milagro
Jeobá nejile Esusi aʼwalí apirigá netémala weʼká milagro. Apirigá beniboa ye, leériwa Marcos 5:25-34 o eʼnewa alué VIDEO. ʼLige raʼichawa ye.
Napu aní ye video, ¿tachiri bijchigi asale bilé mukí nayúkame?
¿Tachiri galé mué ye milagro?
Leériwa Juan 5:36, ʼlige raʼichawa ye:
¿Tachiri «beníriame» alué weʼká milagro Esusi ʼsile?
¿Mué ʼma machime nile?
Amulí suwábaga tábiri ramué machí Esusi uchúkame alué naó líburu Evangelio anilime—Mateo, Marcos, Lucas, ʼlige Juan. Aʼpílipi oságame osale seʼwinátiri tábiri Esusi. Napuʼlige leériachi ye naó líburu beniboa napu boʼné newale.
MATEO
alué chojkile osale Evangelio bajchá. Alué líburu beníriame ju Esusi nile beníriame alué Onorúgame Gobiérnola.
MARCOS
osale alué líburu uʼteli. Raʼíchame ju weʼká tábiri ʼwe semátiri.
LUCAS
ra’íchame ju ʼwe najtékame nile api Esusi netea alué oracioni ʼlige ʼwe aʼlá etele neraga alué umugí.
JUAN
ramué aní weʼká tábiri Esusi raʼíchale boʼné amígola si ʼlige ujché jaré si. Ye ramué guʼiro apirigá beniboa churigá nile Esusi.
JARÉ RALÁMULI ANÍ: «Esusi bi’neli nile ʼwe aʼlá rió».
¿Tachiri mué ʼnata?
ABÉ NAJTÉKAME
Esusi predikárile alué Onorúgame Gobiérnola, weʼká milagro ʼsile ʼlige nabí eʼwame nile Jeobá.
Api mué ʼma benile
¿Tachiri nígame nile bilé nóchali ʼwe najtékame Esusi?
¿Tachiri beníriame ju alué weʼká milagro napu ʼsile Esusi?
¿Tachiri benírile Esusi?
UCHÉ RAJPÉ ʼYÁAWA
¿Tachiri ʼwe aʼlá raʼíchali oʼkame nile Esusi?
Eʼnewa chonigá ramué ʼwe aʼlá machí alué weʼká milagro napu ʼsile Esusi ʼla bijchiá ikile.
«Alué weʼká milagro Esusi ʼsile ¿Tachiri beniri alué?» (La Atalaya, 15 julio de 2004)
Leériwa churigá nakulílile bilé rió napuʼlige benile apirigá Esusi ʼwe neteme nile alué ralámuli.
«ʼWe najtékame eteme nile ne boʼné» (La Atalaya, 1 de octubre de 2014)
Eʼnewa napu ju ʼwe najtékame napu netele Esusi arigá churigá simírale.
«Napu jena wijchimoba bejtélachi Esusi» (La Biblia. Traducción del Nuevo Mundo, apéndice A7)
a Alué leccioni 31-33 abé beníriame ju tachiri ju alué Onorúgame Gobiérnola.