LECCIONI 17
¿Chieti ju Esusi?
Abé beniá napu netele ʼlige anile Esusi jena Wijchimoba, beníriame ju tábiri ʼwe aʼlá boʼné netériame aʼbeka mochiru boʼné si ʼlige boʼné Oʼnola si, Jeobá. ¿Chieri ju alué tábiri ʼwe aʼlá? ¿Tachiri ramué olámala apirigá nímala achigórigá Esusi?
1. ¿Tachiri ju alieri Esusi boʼné Oʼnola?
Esusi ajtile ʼpa rewagachi weʼká mili milloni bamí eʼnegá boʼné galeme Oʼnola ʼlige beniá alué. Alekeri naʼtame ju, chu níliame ju ʼlige newá apirigá boʼné Oʼnola (leériwa Juan 5:19). Alekeri Esusi etériame ju napu boʼné Oʼnola, anile: «Bilé rió neʼchí eteme ka, alueka ne Oʼnola Onorúgame abiena eteme júkuru» (Juan 14:9). ʼLiko ʼla mué abé aʼlá machí Esusi, ʼwe aʼlá machimela Jeobá. Esusi ʼwe na’temame nile alué ralámuli, ye beníriame ju chu nili Jeoba mué gite.
2. ¿Churigá etériame nile Esusi galeme ju boʼné Oʼnola?
Esusi anile: «Napurigá ralámuli jena wijchimoba mochígame ʼla machimémpá ne ʼwe galeo Oʼnó Onorúgame, napurigá ʼla etémempá ne ʼla eʼwame ko napu ne Oʼnola Onorúgame nulá» (Juan 14:31). Napu boʼné asale jena Wijchimoba, Esusi etériame nile alué waʼlú galériame napu chu níliame ju boʼné Oʼnola si ʼwe aʼlá eʼwame nile rekó ʼwe nóchali nile. Aminami Esusi ʼwe ganíliame nile raʼicha ujché jaré boʼné Oʼnola ʼlige nejkúriame nile apirigá jaré nímala amígola Onorúgame (Juan 14:23).
3. ¿Churigá etériame ju Esusi ʼwe galé alué ralámuli?
Alué Biblia raʼíchame ju Esusi «nígame ju bilé galériame ʼwe aʼlá alué ralámuli» (Proverbios 8:31). Etériame ye galériame napu oilárime nile ʼlige guʼíriga alué ralámuli tabilé guʼíname tábile tábiri. Aminami netele weʼká milagro alarigá etériame nígame aʼwalí abienachigó ʼwe naʼtemame nile (Marcos 1:40-42). ʼWe aʼlá raʼíchame nile suwábaga eteme nile alieri. Boʼne raʼíchali nijime nile apirigá kilí mochiwa ʼlige nijígame nile alué buwélame suwábaga ralámuli ʼwe aʼlá nígame sulachí napu akeme nile. Aminami nejile rekó ʼwe resí olárime nile rekó mukúriame nile ʼwe galeme nile suwábaga ralámuli gite ʼwe galériame napu eʼwame nile boʼné beníriame nile (leériwa Juan 15:13, 14).
ABÉ BENIBOA
Abé aʼlá machiboa chieti ju Esusi ʼlige beniboa churigá ramué niwa napu boʼné galériame nile ʼlige ʼwe nejime nile.
4. Esusi ʼwe galeme ju boʼné Oʼnola
Alarigá Esusi nile, beniri ramué churigá etériame ju ramué galériame Onorúgame. Leériwa Lucas 6:12 ʼlige abiena Juan 15:10 ʼlige 17:26. Pe aʼminana leérile aʼpílipi texto, raʼichawa ye:
Etega napu Esusi newale, ¿churigá niwa etériame ju ramué galériame Jeobá?
Esusi ʼwe galeme nile boʼné Oʼnola ʼpa rewagachi ajtígame ʼlige neteme nile oracioni aʼkuepi.
5. Esusi ʼwe resí naʼtemaka eteme ju alué tabilé nígame
Esusi ʼwe resí naʼtemaka eteme nile abé jaré boʼné taʼmé. Rekó resibaka asale, uneme nile alué ʼora ʼlige aʼwalí apirigá guʼírimala ujché jaré. Leériwa Marcos 6:30-44 ʼlige raʼichawa ye:
Napu aní ye raʼíchali, ¿churigá ʼwe niraga etele nile Esusi ujché jaré? (Eʼnewa alué bersículo 31, 34, 41 ʼlige 42).
¿Chonigá guʼírale Esusi alué ralámuli? (Eʼnewa alué bersículo 34).
Esusi ju napu boʼné Oʼnola, ¿tachiri beniri suwábaga ye napu ju Jeobá?
¿Churigá niwa ramué ujché jaré apirigá Esusi ʼsile?
6. Esusi ʼwe nejime ju
Esusi ʼwe nejime nile rekó tabilé nígame weʼká tábiri, boʼné ramué aní arigá ramué niwa. Leériwa Hechos 20:35 ʼlige raʼichawa ye:
Napu anile Esusi, ¿tachiri ʼwe raʼsálagá nejí ramué?
Eʼnewa alué VIDEO ʼlige raʼichawa ye:
¿Churigá nejiwa rekó tabilé nígame weʼká tábiri?
¿Mué ʼma machime nile?
Alué Biblia beniri netea oracioni Jeobá unega rewalá Esusi (leériwa Juan 16:23, 24). Alarigá etériame ʼwe najtékame ju napu Esusi ʼsile apirigá ramué guʼiro niwa amígola Jeobá.
JARÉ RALÁMULI ANÍ: «Onorúgame tabilé ʼwe niraga eté alué ralámuli napuʼlige resí nilia».
Esusi ju napu boʼné Oʼnola, ¿churigá beníriame napu Esusi ʼsile ʼla Onorúgame ʼwe niraga eté ramué?
ABÉ NAJTÉKAME
Esusi galeme Jeobá abiena alué ralámuli. Boʼné ju napu boʼné Oʼnola, abé machisá Esusi, abé machimela Jeobá.
Api mué ʼma benile
Eteria napu netele Esusi, ¿churigá etériame napu ramué galé Jeobá?
Eteria napu netele Esusi, ¿churigá etériame ramué galé alué ralámuli?
¿Tachiri galé mué napu ju Esusi?
UCHÉ RAJPÉ ʼYÁAWA
Eʼnewa jaré ʼwe aʼlá tábiri nígame Esusi napu ramué aʼchigóriga niwa napurigá boʼné.
«Niwa apirigá Esusi» (Jesús: el camino, la verdad y la vida, página 317)
Machiboa alué ʼwe najtékame ju Esusi napu netériachi alué oracioni.
«¿Chonigá unega rewalá Esusi alué oracioni?» (La Atalaya, 1 de febrero de 2008)
¿Aní alué Biblia chieti nile boʼné banalá Esusi?
Napurigá nirame eteme nile Esusi umugí, ¿tachiri beniri ramué?
«Onorúgame ʼwe niraga eteme ju umugí» (La Atalaya, 1 de septiembre de 2012)