LECCIONI 23
ʼWe aʼlá ju iʼwériga nochawa apirigá ʼma rewarawa
Esusi benírile api bilé ralámuli rewarámili júkuru apirigá kristiano gainámala (leériwa Mateo 28:19, 20). Nobi ¿tachiri ju alué rewarálime? ¿Chu ʼsímili ju bajchá bilé ralámuli apirigá rewarámala?
1. ¿Tachiri ju alué rewarálime?
Alué raʼíchali rewará nawágame alué raʼíchali griega aniame ju «bokuíka», yeka ju, bokuíka baʼwichí. Napuʼlige Esusi rewarasa, bokuílime nile alé bakochi Jorani anilime, ʼlige pe aʼkinana «maʼchínasa Esusi baʼwichika» (Marcos 1:9, 10). Napuʼlige rewarachi ʼla bijchiá kristiano ju, suwábaga saʼpchila bokuílime ju baʼwichí.
2. ¿Tachiri etériame napuʼlige bilé ralámuli ʼma rewarasa?
Napuʼlige bilé ralámuli ʼma rewarasa etériame ju alué boʼné ʼma ʼnátale Jeobá najatia. ¿Chu símala ju napuʼlige alué boʼné ʼma ʼnátaga Jeobá najátome? Raʼichámili ju Onorúgame si anigá nabí rawé oyérnali. Ye oracioni neteme ju taʼchó rewarachi anilime ju: dedicación. Napuʼlige oracioni neteachi, alué ralámuli ané Jeobá pe biʼlepi nerámala boʼné ʼlige abé aʼlá najtékame ju newá napu Onorúgame najkí. Abiena ʼma ʼnátale netea napurigá Esusi ʼsile ʼlige benírile, ʼlige Esusi anile: «Jaré ralámuli neʼchí oyéranilisaká, nabí rawé eʼwámili ju napu ne nulá ʼlige ʼma aʼrémili ju alué napu boʼné najkí» (Mateo 16:24). Napuʼlige bilé ralámuli ʼma naʼtasa najátimala Jeobá ʼlige ʼma rewarasa, ʼliko alué ralámuli Onorúgame amígola ju ʼlige uché jaré oyérame.
3. ¿Chu ʼsímili ju apirigá rewarámala?
Mué rewaránilisaká, bajchá benimeli ju Jeobá ʼlige uché rajpé bijchígimala boʼné (leériwa Hebreos 11:6). Napuʼlige mué abé machimela ʼlige abé bijchígimala, abiena asíriga abé galémala Jeobá. Arigá mué predikárnali ʼlige bejténali napurigá Jeobá nulá (2 Timoteo 4:2; 1 Juan 5:3). Napuʼlige bilé ralámuli ʼla sébali olasa «suwábaga napu nulá Onorúgame», ʼliko ʼma umeba ʼnata najatia Onorúgame ʼlige rewarámala (Colosenses 1:9, 10).a
ABÉ BENIBOA
Beniboa chonigá Esusi rewarale ʼlige chu iʼsiwa bilé ralámuli apirigá rewarámala.
4. Tachiri benirú alué Esusi rewarálime
Apirigá abé machimela alué Esusi rewarálime, leériwa Mateo 3:13-17. Abiena raʼichawa ye:
Napuʼlige Esusi rewarasa, ¿bilé uʼtátiri nile?
Napuʼlige Esusi rewarachi, ¿pe uʼtá baʼwí ujchele amoba moʼólachi? O ¿churigá nile?
Napuʼlige Esusi rewarale, chojkile predikaria napu Onorúgame nulale. Leériwa Lucas 3:21-23 ʼlige Juan 6:38, ʼlige raʼichawa ye:
Napuʼlige Esusi ʼma rewarasa, ¿chieri nóchali ʼwe ʼla niraga etele?
5. Mué ʼla umebámala rewarámala
Kerékó siné bajchá ʼwe majáriame nímala ʼnátaga Onorúgame najátome ʼlige rewaraga. Nobi, mué aminami benisáká ʼlige abé machisáká Jeobá, ʼliko mué boʼné naʼtámala Onorúgame najátamala. Apirigá mué machimela jaré ralámuli tachiri netele, eʼnewa alué VIDEO.
Leériwa Juan 17:3, TNM ʼlige Santiago 1:5, ʼlige raʼichawa ye:
¿Tachiri guʼírimala bilé ralámuli apirigá ʼla umebámala rewarámala?
Napuʼlige ramué aneru Jeobá nabí oyérnali arigá ʼma ʼnátaga Onorúgame najátome.
Napuʼlige ramué ʼma rewarasa, ujché jaré machimela api ʼma anele Jeobá: «ne boʼné ʼnátaga mué Onorúgame najátome».
6. Napuʼlige ʼma rewarasa ʼliko ʼma gainárime ju Jeobá rejimala
Napuʼlige ʼma rewarasa, ʼma niru bilé rejimala napuíkame bochígimi gawichí mochígame. Tabilé eʼnéniga koche oʼchérale nibilé napu ʼya nokale, suwábaga bijchígame ju napu aní alué Biblia ʼlige nokame ju napu Jeobá nulá alé Bíbliachi. Leériwa Salmo 25:14 ʼlige 1 Pedro 2:17, ʼlige raʼichawa ye:
Napurigá aní ye bersíkulo, ¿churigá nejkuri alué rewarálime?
JARÉ RALÁMULI ANÍ: «Ne mayé taʼchó umeba rewarámala».
Rekó mué arigá ʼnata, ¿mué mayé ʼwe aʼlá ju rewarámala?
ABÉ NAJTÉKAME
Esusi anile apirigá bilé ralámuli kristiano gainámala rewarámili ju. ʼLige, apirigá ʼla umeba rewarámala, ʼwe bijchígimili ju Jeobá, eʼwámili ju napu boʼné nulá ʼlige anémili ju Onorúgame napu mué nabí ʼma oyérnali.
Api mué ʼma benile
¿Tachiri ju alué rewarálime, ʼlige chonigá ʼwe najtékame ju?
¿Chonigá bajchá naʼtámili ju Onorúgame najatia ʼlige aʼkinana rewarámala?
¿Chu ʼsímili taʼchó ʼnata Onorúgame najatia ʼlige rewarámala?
UCHÉ RAJPÉ ʼYÁAWA
Beniboa napu jaré ʼnátame ju alué rewarálime, nobi tabilé bijchiá ju.
Ku eʼnewa jaré rejcholi guʼírimala mué apirigá rewarámala.
«Ramué rewarálime ju napuʼlige ʼwe galé Jeobá ʼlige cheliera ʼyánili» (La Atalaya, marzo de 2020)
Leériwa churigá bilé rió bajchá ʼwe ʼla nátale apirigá rewarámala.
«Aʼboi najkile apirigá ne boʼné rewimela alué bijchiá» (La Atalaya, 1 de febrero de 2013)
Eʼnewa chonigá alué rewarálime ʼwe najtékame ju ʼlige tachiri ʼsímili ju mué bajchá apirigá rewarámala.
a ʼLa jaré ʼma rewarárigame ju uchechi bilé relijionchi, uchéchigo rewarámili ju. ¿Chonigá? Napugiti alué relijioni tabilé benírile alué bijchiá napu alué Biblia aní (eʼnewa Hechos 19:1-5 ʼlige alué leccioni 13).