LECCIONI 37
Napu aní alué Biblia napu ju alué nóchali ʼlige alué enomí
¿Iʼsínimi ʼwe ʼnátiga ajtí napu ju alué nóchali ʼlige alué enomí gite? ʼWe nóchali ju apirigá nígame niwa napu ramué najkiaru ʼlige abéchigó ʼla niraga Jeobá. Alué Biblia nejí ʼwe aʼlá rejcholi churigá netewa ye oká tábiri.
1. ¿Chu aní alué Biblia napu ju alué nóchali?
Onorúgame najkí napu ramué ʼwe ganíliga nochámala napu ju alué nóchali. Alué Biblia aní «napu nerú ʼwe aʼlá api alué rió [...] ʼwe raʼsálagá etémala boʼné nóchali» (Eclesiastés 2:24). Jeobá ʼwe nóchame ju. Napu ramué netéasa napurigá boʼné, alarigá ju ramué ʼwe nóchame, arigá neteme ju ramué napu Jeobá galeme ju ʼlige alarigá ʼwe ganíliga mochiru.
Alué nóchali ju ʼwe najtékame, nobi tajsiné nímala ʼwe najtékame napu nirárime Jeobá (Juan 6:27). Jeobá ʼma anile boʼné nejímala napu ramué resí ʼla mochígachi napu ramué bajchá elasa Jeobá.
2. ¿Churigá etewa enomí?
Rekó alué Biblia aní api «alué enomí guʼírame ju ramué», abiena aní alué enomí tabilé nejí apirigá raʼsálagá mochiwa (Eclesiastés 7:12). Alekeri, alué Biblia aní api tabilé galegá etewa alué enomí, ʼlige nejí ye rejcholi: «Pe ʼwe ganíliga mochiwa napu ekí nígame niru» (Leériwa Hebreos 13:5). Napu ramué raʼsálagá mochisa napu ekí nígame niru, alarigá tabilé ʼnátiga mochiwa uché rajpé ʼyáaga enomí. Alarigá tabilé wiká mochiwa (Proverbios 22:7). Alarigá tabilé reʼépua apirigá enomí mewa ʼlige tabilé ramué ʼyáawa nóchali api ʼwe yati weʼká enomí mémala anime ju.
3. ¿Churigá unewa enomí apirigá guʼíriwa uché jaré?
Jeobá ʼwe nejime ju, napu ramué nejime nisa napurigá boʼné «guʼírilime ko uché jaré ralámuli» nejiga napu ramué nígame ju (1 Timoteo 6:18). Ramué ʼwe nejime ju napuʼlige nejiga enomí alé kongregacionchi unériame ju napu resíʼláriame ju alé, aminami guʼíriga napu tabilé nígame ju, nobi abé guʼírame ju ramué ermano. Jeobá tabilé ʼwe niraga eteme ju chekí nejime ju ramué, alué eteme ju chonigá nejime ju ramué. Napu ramué nejí sulachí gite, ʼwe raʼsálagá mochímala ramué ʼlige abiena Jeobá (leériwa Hechos 20:35).
ABÉ BENIBOA
Beníriwa churigá nejkuri taʼmé ʼwe niraga etewa alué nóchali ʼlige raʼsálagá mochiwa napu nígame ju ramué.
4. ʼLa niraga etewa Jeobá napu mué ʼwe nóchame nisa
Napu ramué nísaká amígola Jeobá, ʼwe aʼlá nóchame niru. Eʼnewa alué VIDEO ʼlige raʼichawa ye:
¿Tachiri ʼwe galeme mué napu neteme alué Jason alé nóchali?
¿Tachiri netele apirigá taʼmé ʼwe niraga eté alué nóchali?
Leériwa Colosenses 3:23, 24 TNM ʼlige raʼichawa ye:
¿Chonigá ʼwe najtékame ju apirigá ʼla nochawa «ʼla ganíliga»?
Alué nóchali ju najtékame, nobi tajsiné nímala abé najtékame napu nirárime Jeobá.
5. ʼWe aʼlá raʼsálagá mochisa napu ramué nígame ju arigá nejkuri
Jaré ralámuli weʼká enomí najkí napuíniga, nobi alué Biblia nejí bilé rejcholi seʼwinátiri. Leériwa 1 Timoteo 6:6-8 ʼlige raʼichawa ye:
¿Tachiri rejcholi nejí alué Biblia?
Aʼlá raʼsálagá bejtewa rekó pe uʼkabi nígame niru. Eʼnewa alué VIDEO ʼlige raʼichawa ye:
¿Chonigá ʼwe ʼla raʼsálagá bejté ye ralámuli rekó tabilé nígame ju enomí?
¿Ramué weʼká nígame nisa ʼlige abiena najkiaru ujché rajpé? Esusi unele bilé ejemplo apirigá benírimala ye ʼwe chati ju. Leériwa Lucas 12:15-21 ʼlige raʼichawa ye:
¿Tachiri beniri mué napu anile Esusi? (Eʼnewa alué bersíkulo 15).
Leériwa Proverbios 10:22 ʼlige 1 Timoteo 6:10 ʼlige raʼichawa ye:
¿Tachiri mayé mué tachiri ju abé najtékame: niwa amígola Jeobá, o niga weʼká enomí? ¿Chonigá?
¿Tachiri ʼwe chátiri simírimala ramué nínalisaká weʼká enomí?
6. Jeobá nejímala tábiri napu ramué resí ʼla mochígachi
Napuʼlige ramué tabilé rewáliga nóchali ʼlige tabilé ʼwesi niga enomí ʼla machiaru ramué aʼlá bijchígaru Jeobá. Eʼnewa alué VIDEO apirigá beniri chu ʼsiwa napu ramué nígame nisa ye naʼáutiame ʼlige raʼichawa ye:
¿Tachiri ʼwe resí ʼla simírale alué ermano alé video?
¿Tachiri netele apirigá gatémala alué resí ʼla asale?
Leériwa Mateo 6:25-34 ʼlige raʼichawa ye:
¿Tachiri nejímala ju Jeobá alué ralámuli napu bajchá elasa Onorúgame?
JARÉ RALÁMULI ANÍ: «Ne ʼwe nochámala ju apirigá guʼírimala ne rejimala napu aʼboi resí ʼla mochí. Ne tabilé gayena simiá alé napuíkachi nabí tarali».
¿Tachiri texto bíbliko guʼiri mué apirigá machimela napu ʼwe aʼlá ju elegá bajchá nirálime alué Jeobá?
ABÉ NAJTÉKAME
Napu ju nóchali ʼlige alué enomí ʼwe rokáriame ju, nobi tajsiné aʼrewa niraga Jeobá enomí gite.
Api mué ʼma benile
¿Tachiri guʼírimala mué apirigá taʼmé ʼwe niraga eté alué nóchali?
¿Churigá nejkuri ʼwe aʼlá raʼsálagá mochisa napu ramué nígame ju?
Jeobá ʼma anisáká nejímala napu resí ʼla mochígachi boʼné najátame ju, ʼliko ¿churigá etériame ju mué napu aʼlá bijchigi napu aní Onorúgame?
UCHÉ RAJPÉ ʼYÁAWA
Beniriwa ʼla aní alué Biblia napu alué enomí chátiri ju.
«¿Alué enomí ʼla chojkila ju napu ju suwábaga ʼwe chátiri?» (Artículo de jw.org)
Eʼnewa churigá unewa alué enomí apirigá ganíliga asimela Jeobá.
«¿Tachiri aní alué Biblia napu ramué nejime ju?» (Artículo de jw.org)
¿ʼWe chátiri ju reʼépua apirigá enomí mewa?
«Napu aní alué Biblia: Reʼekia enomí mémiga» (¡Despertad!, marzo de 2015)
Leériwa tachiri guʼírale alué rió reʼeme nile enomí gite aminami chigórame nile apirigá seʼwinátiri nímala.
«ʼWe galeme nile ne napu alué gawé roweme» (La Atalaya, 1 de noviembre de 2011)