LECCIONI 38
Waʼlú cheliera ʼyawa napu alué kóliame ajalila
ʼWe raʼsálagá bejtériame ju napu ju alué tábiri ʼwe semátiri simíriachi. Rekó napu ʼwe resí níliga mochiru, alarigá ʼwe ganíliga mochiru eʼnegá tábiri ʼwe semátiri. ¿Churigá ramué cheliérabá ʼya Jeobá ye kónali gite? ¿ʼLige chonigá ju ʼwe najtékame apirigá cheliera ʼyawa?
1. ¿Chonigá ʼwe niraga etewa alué ajáliame?
Aʼlá niraga etewa alué ajáliame, ju bilé kóliame ramué galeme Oʼnola, Jeobá. Alué ju napu «nejí ajáliame», napugiti boʼné netele napu ju suwábaga ajágame (Salmo 36:9). «Onorúgame nejíguru alawá [o ajalí] ʼlige buchéguru suwábaga ralámuli. Alueka suwábaga nejime júkuru napu ekí resíláru ramué» (Hechos 17:25, 28). Alekeri, Jeobá nejime ju suwábaga tábiri napu ramué resí ʼlachi apirigá ajágame mochiwa. ʼLige neteme ju apirigá ramué ʼwe ganíliga mochiwa (leériwa Hechos 14:17).
2. ¿Churigá ramué cheliérabá ʼya Jeobá ye kónali gite?
Aʼlige rawé napuʼlige mué eyela rojpégame maʼchínale, Jeobá eʼnele mué. Onorúgame anele alué oyérame Rabí rewégame, apirigá animela: «ʼLige ne taʼchó oʼchérachi, mueka yaʼmá ʼwe aʼlá machigá asale» (Salmo 139:16). Jeobá ʼwe ʼla niraga eteme ju mué ajalila (leériwa Mateo 10:29-31). Napuʼlige bilé ralámuli meʼlisá uchechi bilé ralámuli ʼwe aʼlá machiá, ʼlige abiena napu meʼlisá alué boʼné, Jeobá ʼwe resí nílimala (Éxodo 20:13).a Abiena boʼné ʼwe sewékame asimela napu ramué bilé enátiri tábiri netésaká apirigá ramué mukumela o ramué tabilé ʼwe aʼlá repusa ajalila ujché jaré ralámuli. Napuʼlige ramué repúliga mochisa ramué aʼboi ʼlige ʼla niraga etesa ujché jaré ajalila, eʼnériame ju ramué ʼwe ʼla niraga eteme ju alué kóliame ajáliame.
ABÉ BENIBOA
Eʼnewa churigá eʼnériame ju ramué cheliera ʼyawa napu alué kóliame ajalila.
3. Repuwa alué saʼpchila
Alué kristiano api ʼma anele Jeobá api netémala napu boʼné nulame, nabí uneme ju aʼboi ajalila napurigá Jeobá najkí. Aʼboi nejile Onorúgame aʼboi saʼpchila napurigá bilé kóliame ʼwe nirálime, alekeri aʼboi repúmili ju. Leériwa Romanos 12:1, 2 ʼlige raʼichawa ye:
¿Chonigá repúmili ju mué saʼpchila?
¿Churigá ʼsímala ju mué?
4. ʼWe ʼla repúriwa apirigá tabilé chátiri simírimala mué abiena ujché jaré
Alué Biblia nejí rejcholi apirigá repúriwa apirigá tabilé chátiri simírimala. Eʼnewa alué VIDEO ʼlige beníriwa tachiri netémala apirigá repúmala mué boʼné.
Leériwa Proverbios 22:3 ʼlige raʼichawa tachiri netémala aʼpílipi ramué apirigá repúpua...
... alé bejtélachi.
... alé nóchali.
... napu neté reʼí.
... napu oʼtogá alué troka o napu eʼyénega alué trókachi.
5. ʼWe aʼlá repúpua alué uʼtá ranala rekó taʼchó oʼchérachi
Rabí unele ʼwe semátiri raʼíchali apirigá raʼichámala chiena Jeobá ʼwe ʼla niraga eteme ju alué uʼtá ranala ajalila, api ajtígame eyela rojpálachi. Leériwa Salmo 139:13-17 ʼlige raʼichawa ye:
¿Chiéniko eteme ju Jeobá yaʼmá ajágame ju: napu ʼma oʼchersa, o napu alué eyela rojpega ajtime ju?
Napu Jeobá nulale napu nile ʼwe ʼya alué Israeli anilichi repume nile umugí rojpégame ʼlige abiena alué uʼtá ranala taʼchó oʼchérachi. Leériwa Éxodo 21:22, 23 ʼlige raʼichawa ye:
¿Churigá eteme nile Jeobá napu bilé tabilé ʼnátiga meʼlisá uʼtá ranala ajalila taʼchó oʼchérachi?
ʼLiko, ¿chu níliame ju Jeobá napu bilé aʼlá machiá meʼlisá uʼtá ranala ajalila taʼchó oʼchérachi?b
Muégó, ¿tachiri ʼnátame ju napu Onorúgame ʼnátame ju?
Rekó bilé mukí ʼwe niraga eteme ju alué ajáliame, boʼné naʼtámala napu meʼlináliga uʼtá ranala taʼchó oʼchérachi ʼwe aʼlá nímala ju. Leériwa Isaías 41:10 ʼlige raʼichawa ye:
Bilé mukí anesa nisa api meʼáliwa alué uʼtá ranala taʼchó oʼchérame, ¿chieri tánimala guʼírame? ¿Chonigá?
JARÉ RALÁMULI ANÍ: «Aʼpili umugí machime ju napu chu ʼsímala ju napu meʼlinali alué uʼtá ranala taʼchó oʼchérachi o tabilé. Boʼné nila ju boʼné saʼpchila».
¿Chonigá machí mué api Jeobá ʼwe niraga eteme ju alué ajáliame napu ju bilé mukí rojpégame ʼlige alué ajáliame uʼtá ranala?
ABÉ NAJTÉKAME
Alué ajáliame ju bilé kóliame napu Jeobá nejí. Alué Biblia beniri apirigá niraga etewa ʼlige repúpua aminami galewa ramué ajáliame ʼlige abiena ujché jaré.
Api mué ʼma benile
¿Churigá machiboa Jeobá ʼwe niraga eteme ju alué ajáliame?
¿Chu níliame ju Jeobá napu bilé meʼlisá ʼwe aʼlá machiá boʼné ajalila o alué ajalila napu nígame ju ujché jaré ralámuli?
¿Tachiri abé galeme ju mué napu alué kóliame ajalila?
UCHÉ RAJPÉ ʼYÁAWA
¿Churigá cheliera ʼyawa Jeobá napu alué kóliame alué ajáliame?
Alué ajáliame ju bilé kónali ʼwe suétiri (wikali 141) (2:41)
¿Aʼlá eʼkáriame ju Onorúgame bilé mukí ʼwe ʼya meʼlisá uʼtá ranala taʼchó oʼchérame?
«¿Chu aní alué Biblia napu ju meʼlírame uʼtá ranala taʼchó oʼchérachi?» (Artículo de jw.org)
Eʼnewa napu ramué machisá churigá eté Onorúgame alué ajáliame nejkuri apirigá reʼépua tabilé chátiri simírimala ramué.
«¿Aʼlá ju reʼekia alué reʼí enátiri?» (¡Despertad!, 8 de octubre de 2000)
ʼLige ¿Bilé ralámuli naʼtásaká mukunáligá najkí? Machiboa tachiri rejcholi nejí alué Biblia.
a Jeobá aʼlá guʼírame ju alué ralámuli ʼwe seweka ejperégachi (Salmo 34:18). Boʼné ʼwe aʼlá náume ju napu nílisa alué ralámuli ʼwe sewékame mochígame ju ʼlige alekeri suwánale aʼboi ajánali, ʼlige guʼírnali ye ralámuli. Eʼnewa chiena ʼwe aʼlá ju alué Jeobá rejchólila leériga napu aní «¿Aʼlá nejkuri alué Biblia ne ʼma tabilé ajágame asinálisaká ʼlige ne ʼnátale mukunali?», uchúkame alé seccioni «Uché rajpé ʼyáawa», ye leccioni.
b Alué ralámuli napu ʼya meʼale alué uʼtá ranala taʼchó oʼchérachi, tabilé resí níliga asiboa; Jeobá ʼeme eʼkánali. ʼEme rewimela ujché rajpé napu ju ye raʼíchali alé napu aní «¿Chu aní alué Biblia napu ju meʼlírame uʼtá ranala taʼchó oʼchérachi?», uchúkame alé seccioni «Uché rajpé ʼyáawa» ye leccioni.