LECCIONI 47
¿Yaʼmá rewaránale mué?
Mué ʼma abé machí napu ju Jeobá napugiti mué beniá ajtí alué Biblia. Abiena, mué ʼma aʼrele weʼká tábiri napu Jeobá tabilé galeme ju. Kerékó nerú jaré tábiri napu tabilé aʼré mué najátamala Jeobá ʼlige rewarámala. Ye leccioni eʼnériame nímala alué resí níliame napu jaré benime simírale apirigá rewarámala ʼlige chu ʼsímala mué.
1. ¿Chekí machimela ju mué alué Biblia taʼchó rewaraga?
Apirigá mué rewarámala, mué ʼwe aʼlá «námamala churigá ko alué ʼla bijchiá raʼíchali» (1 Timoteo 2:4). Ye tabilé aniame ju napu mué taʼchó rewarálime mué machimela suwábaga napu aní alué Biblia napuʼlige jaré rukériame nisa. Abiena napu ju alué kristiano napu ʼma weʼká bamígame ju napu aʼboi rewarasa abiena beniá mochí (Colosenses 1:9, 10). Nobi, mué ʼla námala ju: napu ju abé najtékame napu beníriame ju alué Biblia. Napu ju alué anciano alé kongregación nejkúrimala apirigá machimela ʼla náume ju mué alué Biblia.
2. ¿Chu ʼsímala mué taʼchó rewaraga?
Alué Biblia aní: «ʼWe cha oláligo ʼemi, […]. Jipe weʼká ʼnata ʼemi […]. Jípeko alekeri ku roʼiwa» (leériwa Hechos 3:19). Ye ju napu mué netémili ju taʼchó rewaraga. ¿Chu aniame ju ye? Napu mué ʼwe seweka ajtí napu mué cha netele ʼlige mué najkí eʼkali napu nejime ju Onorúgame. Abiena napu mué gichiga eté mué napu tabilé galeme ju Jeobá ʼlige mué bejténali napu churigá najkí Jeobá. Abiena aniame ju napu mué ʼma simí ajtí alé napuíkachi ʼlige mué ʼma publikador taʼchó rewarágame ju.
3. ¿Chonigá tabilé aʼrewa napu alué majáliame elámala apirigá mué rewarámala?
Jaré majágame ju tabilé gainámala netea napu aʼboi anile Jeobá. Iʼsínimi mué tabilé ʼwe aʼlá netémala, arigá simírale jaré rió ʼlige umugí napu aní alué Biblia. Mué naʼtawa, Jeobá ʼwe aʼlá machime ju napu boʼné oyérame ju tabilé ʼwe aʼlá sébali olámala ju (leériwa Salmo 103:13, 14). Alué ʼwe raʼsálagá asimela mué abé ʼla netéasa napu mué neteme ju. ʼLige abiena Jeobá nejkúrimala. Alué aní napu ta ʼwesi «rojanárime nímala ramué napu ju alué ʼwe galériame Onorúgame» (leériwa Romanos 8:38, 39, TNM).
ABÉ BENIBOA
Eʼnewa oká tábiri napu mué guʼírimala apirigá tabilé elámala napu mué rewaránisa: abé machiá alué Jeobá ʼlige narekia napu boʼné nejkúrime ju.
4. Abé machiá alué Jeobá
¿Chekí machiboa niwa napu ju Jeobá taʼchó rewáraga? Mué ʼwe machimela nímala Jeobá apirigá galémala ʼlige eʼwánali. Eʼnewa alué VIDEO apirigá machiboa tachiri netele jaré benime alué Biblia nerume ju bochígimi gawichí apirigá rewarámala. ʼLige raʼichawa ye:
Napu eteru alé vidéochi, ¿tachiri guʼírale alué benime apirigá rewarámala?
Leériwa Romanos 12:2 ʼlige raʼichawa ye:
¿Mué aʼlá bijchigi suwábaga napu alué Biblia beniri? ¿Mué mayé napu alué testigo Jeobá beniri ʼla bijchiá?
Mué tabilé bijchígasa suwábaga, ¿chu ʼsímala mué?
5. Simíriwa apiépiri tábiri rekó ʼwe resí níliame nisa
Suwábaga ramué ʼwe resí níliame simíriame niru napu ramué naʼtasa najátamala Jeobá ʼlige rewarámala. Apirigá machiboa churigá ikírale bilé ralámuli, eʼnewa alué VIDEO. ʼLige raʼichawa ye:
¿Tachiri resí níliame simírale Narangerel apirigá najátowa Jeobá?
¿Churigá guʼírale napu ju alué galériame Jeobá apirigá simírimala alué ʼwe resí níliame?
Leériwa Proverbios 29:25 ʼlige 2 Timoteo 1:7, ʼlige raʼichawa ye:
¿Koche neraga nawágame ju alué aʼwalí apirigá simírimala alué ʼwe resí níliame?
6. Bijchiwa api Jeobá nejkúrimala mué
Jeoba nejkúrimala mué apirigá netémala napu boʼné najkí. Eʼnewa alué VIDEO ʼlige raʼichawa ye:
¿Chonigá tabilé rewarame nile alué benime napu maʼchíname ye video?
¿Tachiri guʼírale apirigá abé bijchígimala napu ju Jeobá?
Leériwa Isaías 41:10, 13 ʼlige raʼichawa ye:
¿Chonigá mué ʼla umebámala netea napu mué anele Jeobá nabí najátamala?
7. ʼWe galegá etewa napu Jeobá ʼwe galériame ju
Napu mué ʼwe asíriga naʼtasa chiena Jeobá ʼwe galeme ju mué, ʼliko abé galegá eteme ju mué Jeobá ʼlige abé najkimela mué nabí najátimala. Leériwa Salmo 40:5 ʼlige raʼichawa ye:
¿Tachiri napu ju alué kónali napu Jeobá nejime ʼwe niraga eté mué?
Alué profeta Jeremíasi ʼwe galeme nile Jeobá ʼlige alué Onorúgame raʼíchala, ʼlige boʼné ʼwe ʼla niraga eteme nile oʼtó Onorúgame rewalá. Boʼné anile: «Mué raʼíchala nile ne raʼsálagá, ne oʼtó mué rewalá, oh, Onorúgame Jeobá» (Jeremías 15:16). Jipe, mué nejewa ye rukéliame:
¿Chonigá ju ʼwe nirárime apirigá niwa testigo Jeobá?
¿Mué rewaránali apirigá nímala testigo Jeobá?
¿Nerú jaré tábiri napu tabilé aʼré?
¿Chu ʼsímala mué apirigá rewarámala?
JARÉ RALÁMULI ANÍ: «Ne majánale tabilé umébasa netea napu neteme ju bilé Testigo Jeobá».
¿Arigá ʼnátame ju mué?
ABÉ NAJTÉKAME
Napu Jeobá nejkúrime, mué simírimala apiépiri tábiri napu ju resí níliame napu elame ju apirigá mué rewarámala.
Api mué ʼma benile
¿Chekí machimela ju mué alué Biblia apirigá rewarámala?
¿Chu ʼsímala mué taʼchó rewaraga?
¿Chonigá tabilé aʼrewa napu alué majáliame elámala apirigá mué rewarámala?
UCHÉ RAJPÉ ʼYÁAWA
Eʼnewa chu nílimala mué bajchá apirigá rewarámala.
Beníriwa churigá simírimala mué jaré resí níliame napu elame ju apirigá mué rewarámala.
«¿Tachiri tábiri tabilé aʼré apirigá ne rewarámala?» (La Atalaya, marzo de 2019)
Eʼnewa tachiri netele bilé rió apirigá gainámala simírimala ʼwe resí níliame apirigá rewarámala.
ʼYa bajchá, bilé rió Ataa rewégame ʼwe ʼnátame nile aʼlá rewarámala nímala boʼné. Eʼnewa tachiri guʼírale alué apirigá rewarámala.