Eba, Walanguluka?

Eba, waakisoma wapoozeleko maano ma kazeeti a Lupungu Lwakue Kamwenenena a onu muaka? Kine ni evio, ale asuka beebi biipuzio bili paapa:

Twakaba kunoonkelamo siani kine twapisia nsita twalondolola ni Yehova, twamutuilizia ni kutontonkania palwakue?

Twakaba kuya twakwata bupinguzi buweeme, twakaba kwaluka bafundi mu kusambilizia, kiketelo kyetu kyakaba kukila kukosa, kabili ntono yeetu kuli Yehova yakaba kukila.​—w22.01, lub. 30-31.

Kumuswapila Yehova pamo ni bantu baasaakuile kunti kwatukwasia siani?

Onu i musita wa kusambilila kuswapila nzila yakue Leeza ya kukitilamo bintu kupitila kutiina kutwisika palua butunguluzi ni bupinguzi buli bwakwatua na bakote. Kine tuswapiile butunguluzi butuli twapeelua loonu ni kuya twaleengele kunakila, kunti twamona kyaleengele kukita evio vyenka ni mu lyemo likata, atasie kine twapeelua malaizio amonekele kuya ali a kyeni ao amonekele nangue te apalile.​—w22.02, lub. 4-6.

Malaika waali wakeba kulanda ki musita lwaamulandile Zekaria palua “lukamba lwa kupiiminako mu minue yakue [Guvernere] Zerubabeli”? (Zek. 4:8-10)

Keeki kimonua kyaabasininkiziizie bantu bakue Leeza nangue anzia kine ekalu ya leenu yaali yamonekele kuya yali ya pansi kupusana ni elia ya ntaanzi, yakapua kukuulua, kabili yakaba yali nga evelia Leeza vyatonene iye yali.​—w22.03, lub. 16-17.

Kunti twaaluka siani “kilangililo . . . mu bulanzi”? (1 Tim. 4:12)

Kine tuli twalanda mu nzila iweeme kabili ya mukinzi mu miilo yeetu ya kusimikila, kwimba kwa mutima onse ni kuya twaasukapo lingi ku kulonghaana, kulanda mu nzila ya kukuula bange, kuya twalanda kisinka ni kutiina kubombia bulanzi bwa matuka.​—w22.04, lub. 6-9.

Juu ya ki tulangi twa binama bina (ma bukolo) bizimbuilue mu kitabu kya Danieli katue ka 7, tonse twazimbuluasie ku kinama kimo mu lileembo lya Nfyulo 13:1, 2?

Kinama kya mu kisonso kizimbuilue mu Nfyulo 13 te kilangiliilesie buteeko bumo, nga bolia bwa Roma. Inzi, kilangiliile ma buteeko onse a politike ateeka kale bantu.​—w22.05, lub. 9.

Ni nzila ki ikata ili yatukwasia kulangilila nangue tuswapiile nsaambu yakue Leeza?

Kine muntu waakitutuka, waakituluvia ni kutukitila kintu kibiipile, tuli twatiina kusuunga kipuki ni mbikizi, kisia tuli twasia bintu mu minue yakue Yehova. Weene wakaba kupuisia misa yonse yaakileetua na lizaambi.​—w22.06, lub. 10-11.

Lupua ali mukupepa ku kulonghaana apalile kuya walangulukile ki?

Lipepo te lipalile kubombiiwa juu ya kusoka kilonghaano ao juu ya kubuila bantu mpunda. Asa kine ni lipepo lya kutendeka kulonghaana, “kulanda bingi,” te kupalile. (Mat. 6:7)​—w22.07, lub. 24-25.

Ni mu nzila ki “baalia baakitile bintu bibiipile bakatuntumunua palua bupinguzi”? (Yoane 5:29)

Te bakapingulua ovio kukoonkana ni buikazi bwabo bwa kale. Bakatoosiiwa kukoonkana ni aali ni lwendo lwabo lubakalangilila kisia kutuntumunua.​—w22.09, lub. 18.

Ku kulonghaana kukata kwaakitikile mu Muezi wa 09, 1922 J. F. Rutherford waabakinkiziizie bantu kukita ki?

Ku kulonghaana kukata saana kwaakitikile mu Cedar Point, Ohio, ku Amerika, J. F. Rutherford waapundile eevi: “Likolo ali mukuteeka! Muli ni miilo ya kumubuila evio kila muntu. Pakaako, punde, punde, punde palwakue Likolo ni Bukolo bwakue!”​—w22.10, lub. 3-5.

Lileembo lya Isaya katue ka 30 lizimbuile bintu ki bitatu bili byabombia Leeza eevi kutukwasia kusipikizia?

Leelio lileembo lilangiliile nangue Yehova ali watukwasia (1) kupitila kutuilizia ni kwasuka mapepo etu, (2) kupitila kututungulula, ni (3) kupitila kutupeela mpaalo loonu, kabili wakakita evio ni musita uli mukuiza.​—w22.11, lub. 9.

Juu ya ki kunti twalanda nangue milandu ili mu Malumbo 37:10, 11, 29 yaafikiliziiziwe mu musita waapitile, kabili nangue yakaba kufikiliziiwa ni mu musita uli mukuiza?

Milandu yakue Daudi ilondoluele mpaalo ingi ibanga yali mu Israeli, nga evelia mu kipindi kya buteeko bwakue Sulemani. Yesu waalandiile palua paradiso ili mukuiza ni kuzimbula milandu ya mu mulongo wa 11. (Mat. 5:5; Luk. 23:43)​—w22.12, lub. 8-10, 14.