Biipuzio Kufuma Ku Bakabeleenga

Musita Daudi lwaaleembele milandu ili mu Malumbo 61:8, waalandile nangue wakalumbania liina lyakue Leeza “loonse.” Eba, keekio kilangiliile nangue waali watontonkania nangue takafuapo ata limo?

Ata. Beelia byaaleembele Daudi bibanga byali bya kisinka.

Mona beelia byaaleembele mu ozo mulongo, pamo ni mu milongo ya Malumbo ipaleene ni ezio. Waaleembele eevi: “Nakaba kulumbania loonse liina lyobe mu lwimbo musita undi nalipa bilapo byane kila busiku.” “Nakulumbania We Yehova Leeza wane, na mutima wane onse, kabili nakaba kulumbania liina lyobe loonse.” “Nakaba kulumbania liina lyobe loonse kabili muyayaya.”​—Malum. 61:8; 86:12; 145:1, 2.

Musita Daudi lwaali waleemba ezio milandu, tabanga watontonkania nangue manake takafuapo ata limo. Abanga wamanine nangue bantu bapalile kufua juu ya lizaambi lyabo, kabili nangue ni weene abanga wali wa lizaambi. (Kut. 3:3, 17-19; Malum. 51:4, 5) Abanga wamanine nangue atasie bantu baali baitabiilue na Leeza, nga evelia Abrahamu, Isaka ni Yakobo, ni beene baafuile. Kabili, Daudi waali wamanine nangue atasie weene wakafikiila kufua. (Malum. 37:25; 39:4) Inzi, milandu yakue ili mu Malumbo 61:8, ilangiliile nkulu ni bupinguzi bwakue bwa kumulumbania Leeza loonse, i kulanda musita onse wa buikazi bwakue.​—2 Sam. 7:12.

Nsita inge, Daudi waali waleemba bintu byaasaakeene nabio mu buikazi bwakue, nga evelia vili milandu ili pa muulu Malumbo a 18, 51, ni 52. Mu Malumbo a 23, Daudi wamulondolola Yehova kuya wali nga musuungi, ali waleeta butunguluzi, ali walengia twiunvue buino, kabili ali wasuungana. Daudi abanga wali musuungi wa evio. Kabili abanga watonene kumubombela Leeza ‘nsiku yonse ya buikazi bwakue.’​—Malum. 23:6.

Languluka nangue Yehova i waamutunguluile Daudi kupitila mupasi kuleemba bintu byonse byaaleembele. Bebio byaaleembele, bibanga byabiikile mukati bintu byaali byapalile kuiza kukitika kisia musita kupita. Kwa mufuano, mu Malumbo a 110, Daudi waaleembele palua nsita Mulopue wakue lwaali wapalile ‘kwikala ku kuboko [kwakue Leeza] kwa kulio’ ku muulu ni kupeelua buviinde bukata. Eevi akite ki? Eevi abiike baluani bakue Leeza pensina buviinde bwakue, ni ‘kuleeta bupinguzi ku ntundu’ ya ku kyalo. Daudi abanga kikolue wakue Masia, olia apalile kuteeka wali ku muulu, kabili apalile kuya wali “koani loonse.” (Malum. 110:1-6) Yesu waalandile nangue bukabika buli mu Malumbo a 110 bubanga bwalandiile juu yakue, kabili bubanga bwali bwa kufikiliziiwa mu musita uli mukuiza.​—Mat. 22:41-45.

Yehova waamutunguluile Daudi kuleemba palua bintu bya kukitika mu musita wakue, ni beelia bya kukitika mu musita uli mukuiza lwali wakatuntumunua ni kusekelela kumulumbania Yehova loonse. Kansi, milandu ili mu Malumbo 37:10, 11, 29 ilandiile palua musita waaleembelue ezio milandu, ni palua musita uli mukuiza. Ezio milandu yaafikiliziiziwe mu nsita ya kale mu kyalo kya Israeli, kabili yakaba kufikiliziiwa Leeza lwali wakaba kukita bintu byalaile musita uli mukuiza.​—Mona lifungu lya 08, mu lyasi lilandile, “Weewe, ‘Wakaba Pamo ni Neene mu Paradiso’” lili mu kaanu kazeeti.

Kansi, milandu ili mu Malumbo 61:8 pamo ni milongo inge ipaleene ni ezio, ilangiliile nangue Daudi waali watonene kumulumbania Yehova mu Israeli ya kale mpaka kufikiila kufua kwakue. Kabili, ilangiliile bintu byali wakakita mu musita uli mukuiza, Yehova lwali wakamubuezia ku bukose.